(ສປ ນວ) ຕອນເຊົ້າ ວັນທີ 18 ພຶດສະພາ 2023, ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ, ທ່ານ ນາງ ເກດມະນີ ບັນດາສັກ, ປະທານ ຄະນະກຳມະການວັດທະນະກຳ-ສັງຄົມ ແລະ ບັນດາເຜົ່າ ແລະ ທ່ານ ນາງ ຄຳແຫວນ ສິງບັນດິດ ຮອງປະທານຄະນະກຳມະການ ວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນ ນວ ພ້ອມດ້ວຍຄະນະ ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 06 ເດືອນຕົ້ນປີ 2023 ຢູ່ພະແນກແຮງງານ ແລະ ສະຫວັດດີການສັງຄົມ ນວ ໃຫ້ກຽດຕາງໜ້າຕ້ອນຮັບໂດຍ ທ່ານ ສາລະພິດ ສູນວໍລະວົງ, ຫົວໜ້າ ພະແນກແຮງງານ ແລະ ສະຫວັດດີການສັງຄົມ ນວ, ມີບັນດາທ່ານຫົວໜ້າຫ້ອງການພະແນກແຮງງານ ແລະ ສະຫວັດດີການສັງຄົມ 9 ເມືອງ, ບັນດາທ່ານຫົວໜ້າຂະແໜງກ່ຽວຂ້ອງ ແລະ ພະນັກງານວິຊາການ ຈຳນວນໜຶ່ງໄດ້ໃຫ້ການເຂົ້າຮ່ວມ.
ໃນການລົງເຄື່ອນໄຫວຄັ້ງນີ້, ທ່ານ ສາລະພິດ ສູນວໍລະວົງ ໄດ້ລາຍງານ ກ່ຽວກັບຜົນການຈັດຕັ້ງປະຕິບັດບັນດາຄາດໝາຍສູ້ຊົນຕາມມະຕິ ສະບັບເລກທີ 009/ສປນວ, ລົງວັນທີ 15 ກຸມພາ 2023 ນັ້ນ, ເຊິ່ງໃນ 6 ເດືອນຕົ້ນປີ 2023 ວຽກງານທີ່ຕິດພັນກັບວາລະແຫ່ງຊາດ ກ່ຽວກັບການພັດທະນາສີມືແຮງງານໃຫ້ຜູ້ບໍ່ມີອາຊີບ, ຜູ້ວ່າງງານ, ຜູ້ຕ້ອງການປ່ຽນອາຊີບ ແລະ ຜູ້ທີ່ຈະເຂົ້າສູ່ຕຳແໜ່ງງານໃໝ່ ແມ່ນປະຕິບັດໄດ້ 2.799 ຄົນ, ຍິງ 1.828 ຄົນ ລື່ນແຜນການປີ 1.759 ຄົນ; ດ້ານການສົ່ງເສີມການຈັດຫາວຽກເຮັດງານທໍາໃຫ້ແຮງງານທີ່ຕ້ອງການມີວຽກເຮັດງານທໍາ ໃຫ້ເຂົ້າສູ່ຕະຫຼາດແຮງງານ ປະຕິບັດໄດ້ 2.674 ຄົນ, ຍິງ 1.787 ຄົນ ເທົ່າກັບ 59.42% ຂອງແຜນການປີ. ດ້ານການຄວບຄຸມອັດຕາການວ່າງງານຢູ່ໃນລະດັບ 0,8%, ປະຕິບັດລື່ນແຜນ 0,7% ຂອງແຜນການປີ; ໄດ້ຂະຫຍາຍອັດຕາປົກຄຸມປະກັນສັງຄົມ ປະຕິບັດໄດ້ 160 ຄົນ, ຍິງ 85 ຄົນ ເທົ່າກັບ 61,53% ຂອງແຜນການປີ; ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດປະຕິວັດຊາດ ປະຊາທິປະໄຕ ປະຕິບັດໄດ້ 17 ທ່ານ ເທົ່າກັບ 54,83% ຂອງແຜນການປີ ແລະ ໄດ້ຊ່ວຍ ເຫຼືອຜູ້ອອກຢາເສບຕິດດ້ວຍການຝຶກອົບຮົມວິຊາຊີບ ແລະ ສ້າງໂອກາດມີວຽກເຮັດງານທຳ ໄດ້ 53 ຄົນ ເທົ່າກັບ 53% ຂອງແຜນການປີ. ຄຽງຄູ່ກັບການລາຍງານຜົນສໍາເລັດນັ້ນ ກໍຍັງມີຂໍ້ຄົງຄ້າງຫຼາຍດ້ານ ເປັນຕົ້ນ ການພັດທະນາສີມືແຮງງານ ຍັງບໍ່ທັນຕອບສະໜອງໄດ້ຕາມຄວາມຕ້ອງການຂອງຕະຫຼາດແຮງງານ, ດ້ານງົບປະມານນຳໃຊ້ໃນວຽການດັ່ງກ່າວ ຍັງບໍ່ພຽງ ພໍ; ການໂຄສະນາເຜີຍແຜ່ກົດໝາຍ, ລະບຽບການ ກ່ຽວກັບວຽກງານແຮງງານ ແລະ ການສ້າງຄວາມເຂົ້າໃຈໃຫ້ຜູ້ໃຊ້ແຮງງານ, ຜູ້ອອກແຮງງານ ໃນພາກວິສາຫະກິດ ຍັງບໍ່ໄດ້ຮັບການຈັດຕັ້ງປະຕິບັດກ້ວາງຂວາງ; ການຄຸ້ມຄອງວຽກງານສັງຄົມສົງເຄາະ ແລະ ໄພພິບັດ ຍັງບໍ່ທັນເຂັ້ມແຂງ ເປັນຕົ້ນ: ການຊ່ວຍເຫຼືອສຸກເສີນໃຫ້ແກ່ຜູ້ປະສົບໄພພິບັດຕ່າງໆ ຍັງຊັກຊ້າ. ເຖີງຢ່າງໃດກໍຕາມ ທ່ານ ນາງ ລຳພອຍ ສີອັກຄະຈັນ ກໍໄດ້ມີຄຳເຫັນຊີ້ນຳຕໍ່ກອງປະຊຸມ ພ້ອມທັງມີຄຳເຫັນແລກປ່ຽນຕໍ່ບັນດາຂໍ້ຄົງຄ້າງຕ່າງໆ ແລະ ໃນຕອນທ້າຍກອງປະຊຸມ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນຳຂອງພະແນກ, ທຸກຂະແໜງການກ່ຽວຂ້ອງ ທີ່ໄດ້ຕັ້ງໜ້າປະຕິບັດໜ້າທີ່ດ້ວຍຄວາມຫ້າວ ຫັນໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍທີ່ໄດ້ກຳນົດໄວ້ໃຫ້ບັນລຸຜົນ ແລະ ສຳເລັດຕາມແຜນການ ປະຈຳປີ 2023 ທີ່ວາງໄວ້ ຢ່າງມີປະສິດທິພາບ ແລະ ປະສິດທິຜົນ.
ໃນໂອກາດດັ່ງກ່າວ, ໃນພາກບ່າຍຂອງມື້ດຽວກັນນັ້ນ ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນວ ພ້ອມດ້ວຍຄະນະ ກໍໄດ້ລົງຢ້ຽມຢາມ ບໍລິສັດ ສິຣິວັດທະນາ ອິນເຕີເນເຊິນນໍ 2005 ກຳຈັດຜູ້ດຽວ.
