(ສພຊ) ໃນວັນທີ 10 ພຶດສະພາ 2023, ທ່ານ ຮສ. ປອ. ລິນຄໍາ ດວງສະຫວັນ ກໍາມະການສຳຮອງສູນກາງພັກ, ຄະນະປະຈໍາສະພາແຫ່ງຊາດ, ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດນະໂຍບາຍ ແລະ ນິຕິກໍາ ທີ່ຕິດພັນກັບການສົ່ງເສີມການຜະລິດກະສິກໍາ; ການຄຸ້ມຄອງການນໍາເຂົ້າສິນຄ້າ, ລາຄາສິນຄ້າ ແລະ ການຟື້ນຟູປ່າໄມ້ ຢູ່ແຂວງສາລະວັນ.

ໃນຕອນເຊົ້າ ຄະນະ ໄດ້ເຂົ້າພົບທ່ານ ປອ. ດາວວົງ ພອນແກ້ວ ເລຂາພັກແຂວງ, ເຈົ້າແຂວງສາລະວັນ ເພື່ອລາຍງານກ່ຽວກັບຈຸດປະສົງຂອງການເຄື່ອນໄຫວເຮັດວຽກຢູ່ແຂວງສາລະວັນ; ຈາກນັ້ນ ເຮັດວຽກຮ່ວມກັບສະພາປະຊາຊົນແຂວງ ແລະ ບັນດາພະແນກການອ້ອມຂ້າງແຂວງ ທີ່ຫ້ອງປະຊຸມສະພາປະຊາຊົນແຂວງ ໂດຍການຕ້ອນຮັບຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານສະພາປະຊາຊົນແຂວງ, ມີຄະນະປະຈໍາສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ບັນດາພະແນກການໃນຂົງເຂດເສດຖະກິດ, ພະນັກງານ-ລັດຖະກອນ ສະພາປະຊາຊົນແຂວງ ເຂົ້າຮ່ວມ.

ໂອກາດດັ່ງກ່າວ ຄະນະ ໄດ້ຮັບຟັງການລາຍງານກ່ຽວກັບຜົນສໍາເລັດການເຄື່ອນໄຫວວຽກງານໂດຍຫຍໍ້ໃນໄລຍະຜ່ານມາ ຂອງສະພາປະຊາຊົນແຂວງ ພ້ອມນັ້ນ, ບັນດາພະແນກການ ກໍໄດ້ລາຍງານຜົນຂອງການຈັດຕັ້ງປະຕິບັດວຽກງານຂອງພະແນກການ ກ່ຽວກັບການອະນຸຍາດລົງທຶນ ໃນຂົງເຂດການຜະລິດເປັນສິນຄ້າ; ການສົ່ງເສີມການຜະລິດເປັນສິນຄ້າ; ການຈັບຈອງ ແລະ ບຸກເບີກທີ່ດິນ ສໍາລັບການປູກມັນຕົ້ນ, ການສ້າງລານຕາກມັນຕົ້ນ; ລາຍງານກ່ຽວກັບການເກັບຊື້, ການສົ່ງອອກ ແລະ ຂອດການຈໍລະຈອນສິນຄ້າກະສິກໍາ ແລະ ຂອດການນໍາເຂົ້າສິນຄ້າອຸປະໂພກ-ບໍລິໂພກ; ລາຍງານກ່ຽວກັບການຄຸ້ມຄອງ ແລະ ອໍານວຍຄວາມສະດວກໃນການຂົນສົ່ງສິນຄ້າ ເພື່ອສົ່ງອອກ ແລະ ນໍາເຂົ້າ; ລາຍງານສະພາບການດໍາເນີນທຸລະກິດການຜະລິດ ແລະ ການສົ່ງອອກສິນຄ້າກະສິກໍາ, ການນໍາເຂົ້າສິນຄ້າອຸປະໂພກ-ບໍລິໂພກ ຂອງແຂວງ; ໂດຍກ່ຽວພັນກັບ ພະແນກແຜນການ ແລະ ການລົງທຶນແຂວງ, ພະແນກກະສິກໍາ ແລະ ປ່າໄມ້; ພະແນກອຸດສາຫະກໍາ ແລະ ການຄ້າ, ພະແນກໂຍທາທິການ ແລະ ຂົນສົ່ງ, ສະພາການຄ້າ ແລະ ອຸດສາຫະກໍາ; ປະທານກອງປະຊຸມ ພ້ອມດ້ວຍຄະນະ ໄດ້ມີຄໍາຖາມເຈາະຈີ້ມໃນວຽກງານຕ່າງໆ ທີ່ເຫັນວ່າມີຄວາມສົນໃຈ. ຈາກນັ້ນ, ບັນດາພະແນກການ ກໍໄດ້ຜັດປ່ຽນກັນອະທິບາຍຊີ້ແຈງຕໍ່ຄໍາຖາມເຈາະຈີ້ມ ດ້ວຍບັນຍາກາດອັນຟົດຟື້ນ ເຊິ່ງສະແດງໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ຂໍ້ສະເໜີ ຈາກພະແນກການ ຈໍານວນໜຶ່ງ ດ້ວຍຄວາມເປັນເອກະພາບ ເເລະ ເພື່ອຂໍຊີ້ນໍາໃນຕໍ່ໜ້າ.

ທ່ານ ຮສ. ປອ. ລິນຄໍາ ດວງສະຫວັນ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດ ໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ເນັ້ນໃຫ້ສືບຕໍ່ຈັດຕັ້ງປະຕິບັດວຽກງານໃນຕໍ່ໜ້າ ເປັນຕົ້ນ: ເອົາໃຈໃສ່ໃນການສ້າງນິຕິກໍາໃຕ້ກົດໝາຍ ກ່ຽວກັບການສົ່ງເສີມຜະລິດຕະພັນພາຍໃນ ເພື່ອເປັນບ່ອນອີງໃນການຈັດຕັ້ງປະຕິບັດ; ສືບຕໍ່ຊຸກຍູ້ປະຊາຊົນໃນການເພີ່ມພູນຜະລິດຜົນ ໂດຍສະເພາະແມ່ນການປູກຝັງ-ລ້ຽງສັດ ໂດຍກໍານົດເຂດການຜະລິດຂອງແຂວງ ເພື່ອຊ່ວຍຫຼຸດຜ່ອນການນໍາເຂົ້າ; ສົ່ງເສີມອໍານວຍຄວາມສະດວກໃຫ້ຜູ້ປະກອບການໃນການສ້າງຜະລິດຕະພັນທີ່ເປັນເອກະລັກຂອງເມືອງ; ເອົາໃຈໃສ່ໃນການອອກອະນຸຍາດສິນຄ້າສົ່ງອອກ, ອະນຸຍາດການເຄື່ອນຍ້າຍສິນຄ້າພາຍໃນ ແລະ ກວດກາສິນຄ້າຢູ່ດ່ານສາກົນ; ເອົາໃຈໃສ່ໃນການຄຸ້ມຄອງລາຄາສິນຄ້າ ແລະ ສະໜອງສິນຄ້າໃຫ້ໄດ້ຕາມຄວາມຕ້ອງການໃນສັງຄົມ; ເອົາໃຈໃສ່ອອກນິຕິກໍາຂອງແຂວງໃນການປົກປັກຮັກສາ 3 ປະເພດປ່າຂອງແຂວງ ໃຫ້ຍືນຍົງ; ສືບຕໍ່ຈັດຕັ້ງຜັນຂະຫຍາຍນະໂຍບາຍວ່າດ້ວຍການປະຢັດ ແລະ ຕ້ານການຟຸມເຟືອຍ; ຊຸກຍູ້ການຈັດເກັບລາຍຮັບໃຫ້ໄດ້ຕາມແຜນການປະຈໍາປີ.

ຕອນບ່າຍຂອງວັນດຽວກັນ, ຄະນະ ໄດ້ເຄື່ອນໄຫວຕິດຕາມສະພາບການຄຸ້ມຄອງດ່ານຊາຍແດນ ແລະ ແຜນຄວາມຄືບໜ້າກະກຽມສ້າງຂົວມິດຕະພາບຊາຍແດນ ລະຫວ່າງ ດ່ານປາກຕະພານ ເມືອງລະຄອນເພັງ ແລະ ດ່ານປາກແຊງ ອຳເພີນາຕານ ຈັງຫວັດອຸບົນ ປະເທດໄທ.

ຜົນຂອງການຕິດຕາມກວດກາຄັ້ງນີ້ ຈະນໍາເອົາຂໍ້ມູນດັ່ງກ່າວ ເພື່ອສະເໜີຕໍ່ກອງປະຊຸມ ຄະນະປະຈໍາສະພາແຫ່ງຊາດ ແລະ ເປັນຂໍ້ມູນໃຫ້ແກ່ກອງປະຊຸມຮ່ວມລະຫວ່າງ ລັດຖະບານ ກັບ ສະພາແຫ່ງຊາດ, ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະມາເຖິງ.

(ຂ່າວ: ນາງ ຄັດສອນ ຮຸ່ງສະຫວ່າງ, ພາບ: ດີລຳພົນ ພົມມະຈັນ)