ວັນທີ 9 ພຶດສະພາ 2023 ທີ່ຫ້ອງປະຊຸມລັດວິສາຫະກິດສະຕາໂທລະຄົມ ແຂວງຫຼວງນ້ຳທາ ທ່ານກົງເພັດ ແກ້ວບົວພາ ສະມາຊິກສະພາແຫ່ງຊາດປະຈຳເຂດເລືອກຕັ້ງ ຮອງປະທານສະພາປະຊາຊົນແຂວງ ພ້ອມດ້ວຍສະມາຊິກສະພາປະຊາຊົນແຂວງປະຈຳເຂດເລືອກຕັ້ງ ໄດ້ເຂົ້າຮ່ວມກອງປະຊຸມ ທາບທາມຮ່າງກົດໝາຍຈໍານວນ 11 ສະບັບ ທີີ່ຈະນໍາເຂົົ້າພິຈາລະນາຮັບຮອງເອົາໃນ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX  (ດ້ວຍຮູບແບບອອນລາຍ) ຢູ່ທີ່ຫ້ອງປະຊຸມລັດວິສາຫະກິດສະຕາໂທລະຄົມ  ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ຈສ.ປອ ຈະເລີນ ເຢຍປາວເຮີ ກຳມະການສູນກາງພັກ ຮອງປະທານສະພາແຫ່ງຊາດ ຜູ້ຊີ້ນຳກຳມາທິການຍຸຕິທຳ ຂອງສະພາແຫ່ງຊາດ ມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງ, ພະແນກການ, ອົງການລັດທຽບເທົ່າຂັ້ນແຂວງ ທີ່ກ່ຽວຂ້ອງທົ່ວປະເທດເຂົ້າຮ່ວມ.

ກອງປະຊຸມໄດ້ຮັບຟັງການຊີ້ແຈງຄໍາເຫັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃສ່ຮ່າງກົດໝາຍຈໍານວນ 11 ສະບັບຄື ຮ່າງກົດໝາຍວ່າດ້ວຍການຈັດຫາງານ, ຮ່າງກົດໝາຍວ່າດ້ວຍການຊົດເຊີຍຄ່າເສຍຫາຍຈາກລັດ, ຮ່າງກົດໝາຍວ່າດ້ວຍການປົກຄອງ, ຮ່າງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ, ຮ່າງກົດໝາຍວ່າດ້ວຍການພີມຈຳໜ່າຍ, ຮ່າງກົດໝາຍວ່າດ້ວຍສາທາລະນະສຸກ, ຮ່າງກົດໝາຍວ່າດ້ວຍສານທະຫານ, ຮ່າງກົດໝາຍວ່າດ້ວຍສັດນ້ຳ ແລະ ການປະມົງ, ຮ່າງກົດໝາຍວ່າດ້ວຍສັດປ່າ, ຮ່າງກົດໝາຍວ່າດ້ວຍທະນາຄານທຸລະກິດ, ຮ່າງກົດໝາຍວ່າດ້ວຍອາກອນທີ່ດິນ

ພ້ອມນັ້ນ ບັນດາທ່ານທີ່ເຂົ້າຮ່ວມກອງປະຊຸມໄດ້ພ້ອມກັນສຸມໃສ່ປະກອບຄຳຄິດເຫັນຢ່າງມີຈຸດສຸມ ເປັນຕົ້ນແມ່ນດ້ານໂຄງສ້າງ, ດ້ານເນື້ອໃນຕ່າງໆແຕ່ລະໝວດ, ແຕ່ລະມາດຕາຂອງແຕ່ລະກົດໝາຍ ຕະຫລອດຮອດການຈັດຕັ້ງປະຕິບັດເພື່ອໃຫ້ມີເນື້ອໃນຄົບຖ້ວນສົມບູນສອດຄ່ອງກັບສະພາບເງື່ອນໄຂຕົວຈິງໃນແຕ່ລະໄລຍະ ແລະ ນຳເອົາຄຳຄິດເຫັນຂອງທຸກພາກສ່ວນເຂົ້າໃສ່ເນື້ອໃນຂອງຮ່າງກົດໝາຍດັ່ງກ່າວໃຫ້ມີເນື້ອໃນຄົບຖ້ວນ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວຂອງເສດຖະກິດ-ສັງຄົມໃນແຕ່ລະໄລຍະ ເພື່ອສາມາດນຳເອົາຮ່າງກົດໝາຍຈຳນວນ 11 ສະບັບດັ່ງກ່າວ ເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ 9 ທີ່ຈະໄຂຂື້ນໃນຕໍ່ໜ້ານີ້.