ກອງປະຊຸມ ທາບທາມຄຳເຫັນໃສ່ຮ່າງກົດໝາຍ 11 ສະບັບ ໄດ້ສໍາເລັດຢ່າງເປັນທາງການ, ໃນຕອນເຊົ້າຂອງວັນສຸກ, ວັນທີ 5 ພຶດສະພາ 2023, ຢູ່ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ແຂວງ ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງ, ຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ, ອົງການທຽບເທົ່າ, ສອງກໍາລັງ ປກຊ-ປກສ, ຫົວໜ້າຫ້ອງການກະສິກໍາ ແລະ ປ່າໄມ້ 7 ເມືອງ, ແຂກເຊີນ ແລະ ຄະນະຮັບຜິດຊອບພາຍໃນສະພາປະຊາຊົນແຂວງ ເຂົ້າຮ່ວມ.

 

ຜ່ານການດໍາເນີນກອງປະຊຸມເປັນເວລາ 2 ວັນເຄິ່ງ, ບັນດາທ່ານຜູ້ແທນກອງປະຊຸມ ໄດ້ເຊີດຊູຄວາມຮັບຜິດຊອບການເມືອງຂອງຕົນຕາມສິດໜ້າທີ່ ແລະ ປະກອບຄໍາຄິດຄໍາເຫັນໃສ່ບັນດາເນື້ອໃນຂອງຮ່າງກົດໝາຍ ຈໍານວນ 11 ສະບັບ, ສ້າງໃໝ່ 5 ກົດໝາຍຄື: ກົດໝາຍວ່າດ້ວຍ ການຈັດຫາງານ, ກົດໝາຍວ່າດ້ວຍ ການຊົດເຊີຍຄ່າເສຍ ຫາຍຈາກລັດ, ກົດໝາຍວ່າດ້ວຍ ການປົກ ຄອງ, ກົດໝາຍວ່າດ້ວຍ ອາກອນທີ່ດິນ ແລະ ກົດໝາຍວ່າດ້ວຍ ສາທາລະນະສຸກ ແລະ ປັບປຸງ 6 ກົດໝາຍຄື: ກົດໝາຍວ່າດ້ວຍ ການປົກປ້ອງສິດ ແລະ ຜົນປະໂຫຍດຂອງເດັກ, ກົດໝາຍວ່າດ້ວຍ ການພິມຈຳໜ່າຍ, ກົດໝາຍວ່າດ້ວຍ ສານທະ ຫານ, ກົດໝາຍວ່າດ້ວຍ ສັດນ້ຳ ແລະ ການປະມົງ, ກົດໝາຍວ່າດ້ວຍ ສັດປ່າ ແລະ ກົດໝາຍວ່າດ້ວຍ ທະນາຄານທຸລະກິດ, ຕາມການສະເໜີ, ຄໍາຖາມເຈາະຈີ້ມຂອງຄະນະຮັບຜິດຊອບ ແລະ ບັນຫາອື່ນໆ ຢ່າງເປັນຂະບວນຟົດຟື້ນ ແລະ ມີຈຸດສຸມ ເຊິ່ງສະແດງອອກໃນຕະຫຼອດໄລຍະການດໍາເນີນກອງປະຊຸມບັນດາທ່ານຜູ້ແທນໄດ້ປະກອບຄໍາເຫັນ 110 ກວ່າຄັ້ງ, ມີ 131 ເທື່ອຄົນ.

ທ່ານ ຄໍາດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງ, ໄດ້ມີຄໍາເຫັນໃນວາລະກ່າວປິດກອງປະຊຸມວ່າ: ກ່ອນອື່ນ, ຂໍສະແດງຄວາມຊົມເຊີຍ ແລະ ຂໍຂອບອົກຂອບໃຈຕໍ່ບັນດາທ່ານຜູ້ແທນ ທີ່ໄດ້ປະກອບສ່ວນໃນການມີຄໍາຄິດຄໍາເຫັນໃນກອງປະຊຸມທາບທາມຄໍາເຫັນໃສ່ຮ່າງກົດໝາຍຄັ້ງນີ້, ກອງປະຊຸມໄດ້ຮັບຟັງຄໍາຄິດຄໍາເຫັນທີ່ເປັນປະໂຫຍດຫຼາຍ ແລະ ທ່ານໄດ້ເນັ້ນໜັກໃຫ້ບັນດາທ່ານເພີ່ມຕື່ມບາງເນື້ອໃນຮ່າງກົດໝາຍທີ່ນຳມາທາບທາມໃນຄັ້ງນີ້ ຖ້າພາກສ່ວນໃດຍັງມີຂໍ້ຂ້ອງໃຈ ຫຼື ຄຳສະເໜີຕ່າງໆ ທີ່ບໍ່ໄດ້ລະບຸໃນຮ່າງກົດໝາຍຂອງບັນດາທ່ານ ສະເໜີໃຫ້ບັນດາທ່ານຂຽນເປັນລາຍລັກອັກສອນສົ່ງໃຫ້ກອງເລຂາເພື່ອສັງລວມສົ່ງໃຫ້ສະພາແຫ່ງຊາດ ປັບປຸງ ແລະ ເພື່ອເປັນຂໍ້ມູນໃຫ້ແກ່ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 04 ແຂວງອຸດົມໄຊ ນໍາໄປປະກອບຄໍາເຫັນຕໍ່ ໃນວາລະກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ທີ່ຈະໄດ້ຈັດຂຶ້ນໃນເດືອນ ມິຖຸນາ 2023 ນີ້.    ພາບ/ຂ່າວ: ແສງພອນ ອິນນະລົງ.