(ສພຊ) ໃນຕອນເຊົ້າວັນທີ 5 ພຶດສະພາ 2023 ທີ່ສະພາແຫ່ງຊາດ ໄດ້ມີກອງປະຊຸມປຶກສາຫາລືກ່ຽວກັບການຈັດງານວັນເດັກນ້ອຍສາກົນ ວັນທີ 1 ມິຖຸນາ 2023 ໂດຍການເປັນປະທານຂອງທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມສະພາແຫ່ງຊາດ, ເຂົ້າຮ່ວມມີ ປະທານສະຫະພັນກຳມະບານສະພາແຫ່ງຊາດ, ປະທານສະຫະພັນແມ່ຍິງສະພາແຫ່ງຊາດ, ເລຂາຄະນະບໍລິການງານຊາວໜຸ່ມສະພາແຫ່ງຊາດ, ມີບັນດາທ່ານໃນຄະນະກອງທຶນຊ່ວຍເຫຼືອສັງຄົມສະພາແຫ່ງຊາດ, ຕາງໜ້າຈາກໂຮງໝໍກະເສມລາດ, ຕາງໜ້າຈາກທະນາຄານພົງສະຫວັນ ແລະ ພາກສ່ວນກ່ຽວຂ້ອງ.
ທັງນີ້, ກໍເພື່ອເປັນການກຽມຄວາມພ້ອມດ້ານຕ່າງໆ ໃນການຈັດງານວັນເດັກນ້ອຍສາກົນ ທີ່ສະພາແຫ່ງຊາດ ໃຫ້ມີປະສິດທິພາບ ແລະ ເປັນປະໂຫຍດແກ່ຫຼານນ້ອຍທີ່ຈະມາຮ່ວມງານໃຫ້ຫຼາຍທີ່ສຸດ ເຊິ່ງໃນງານດັ່ງກ່າວ ຈະມີຫຼາກຫຼາຍກິດຈະກຳ ເປັນຕົ້ນ: ການຢອດຢາ, ຖາມ-ຕອບ ເພື່ອຮັບລາງວັນ, ມີການແຈກຢາຍເຂົ້າໜົມ ແລະ ຂອງຂວັນໃຫ້ຫຼານນ້ອຍ, ມີການສະແດງສິລະປະວັນນະຄະດີ ແລະ ທ່ຽວຊົມຫ້ອງປະຊຸມ ແລະ ຫໍມູນເຊື້ອຂອງສະພາແຫ່ງຊາດຕື່ມອີກ.