ເພື່ອປະຕິບັດຕາມຄຳແນະນຳ ຂອງກຳມາທິການກົດໝາຍ ສະບັບເລກທີ 123/ກກໝ, ລົງວັນທີ 21 ເມສາ 2023 ສະນັ້ນໃນລະຫວ່າງວັນທີ 4 – 5 ພຶດສະພາ 2023 ຢູ່ທີ່ຫ້ອງປະຊຸມ ຂອງສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມ ທາບທາມຄຳເຫັນ ໃສ່ຮ່າງກົດໝາຍ ຈຳນວນ 11 ສະບັບ ທີ່ຈະນຳເຂົ້າພິຈາລະນາຮັບຮອງເອົາຢູ່ໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX; ພາຍໃຕ້ການເປັນປະທານຂອງທ່ານ ບຸນໂຮມ ເທດທານີ ຮອງເລຂາພັກແຂວງ, ປະທານສະພາປະຊາຊົນແຂວງ, ເປັນກຽດເຂົ້າຮ່ວມຂອງທ່ານ ສີວິໄລ ແສງຈະເລີນ ຮອງເຈົ້າແຂວງໆຊຽງຂວາງ, ມີບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9, ສະມາຊິກສະພາປະຊາຊົນແຂວງ ຊຸດທີ II, ຄະນະເລຂາທິການສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກ ການ, ຕາງໜ້າຂະແໜງການທີ່ກ່ຽວຂ້ອງ ແລະ ພະນັກງານຂອງສະພາປະຊາຊົນແຂວງເຂົ້າຮ່ວມ. 
ກົດໝາຍທີ່ນຳເຂົ້າທາບທາມຄຳຄິດເຫັນ ໃນກອງປະເທື່ອນີ້ມີກົດໝາຍສ້າງໃໝ່ຈຳນວນ 5 ສະ ບັບ ຄື: ຮ່າງກົດໝາຍວ່າດ້ວຍ ການຊົດເຊີຍຄ່າເສຍຫາຍຈາກລັດ, ຮ່າງກົດໝາຍວ່າດ້ວຍ ການປົກຄອງຮ່າງກົດໝາຍວ່າດ້ວຍ ການຈັດຫາງານ, ຮ່າງກົດໝາຍວ່າດ້ວຍ ອາກອນທີ່ດິນ ແລະ ຮ່າງກົດໝາຍວ່າດ້ວຍ ວຽກງານສາທາລະນະສຸກ; ມີກົດໝາຍທີ່ປັບປຸງຈຳນວນ 6 ສະບັບ ຄື: ຮ່າງກົດໝາຍວ່າດ້ວຍ ການພິມຈຳໜ່າຍ, ຮ່າງກົດໝາຍວ່າດ້ວຍ ສັດນ້ຳ ແລະ ການປະມົງ, ຮ່າງກົດໝາຍວ່າດ້ວຍ ສັດປ່າ, ຮ່າງກົດໝາຍວ່າດ້ວຍ ການປົກປ້ອງສິດ ແລະ ຜົນປະໂຫຍດຂອງເດັກ, ຮ່າງກົດໝາຍວ່າດ້ວຍ ທະນາຄານທຸລະກິດ ແລະ ຮ່າງກົດໝາຍວ່າດ້ວຍ ສານທະຫານ ເຊິ່ງຜູ້ແທນກອງປະຊຸມໄດ້ມີຄວາມເອົາໃຈໃສ່ຄົ້ນຄວ້າ, ພິຈາລະນາ ຕາມຄຳຖາມເຈາະຈີ້ມ ຕໍ່ຮ່າງກົດໝາຍ ຈຳນວນ 11 ສະບັບ ກ່ຽວກັບການກຳນົດໂຄງປະກອບຂອງກົດໝາຍ, ບັນດາເນື້ອໃນບາງມາດຕາຂອງກົດໝາຍ ຢ່າງພາວະວິໄສ, ກົງໄປກົງມາ, ເລິກເຊີ່ງເຖິງຖອງ ເພື່ອເຮັດໃຫ້ແຕ່ລະກົດໝາຍມີເນື້ອໃນຄົບຖ້ວນ, ຮັດກຸມ, ສອດຄອງກັບສະພາບຄວາມເປັນຈິງ ແລະ ສາມາດຮັບຮອງໄດ້ຢູ່ໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ເພື່ອນໍາໄປຈັດຕັ້ງປະຕິບັດ ເຂົ້າໃນວຽກງານຂອງຂະແໜງການທີ່ກ່ຽວຂ້ອງໃຫ້ໄດ້ຮັບຜົນດີໃນຕໍ່ໜ້າ.
ໃນຕອນທ້າຍປະທານກອງປະຊຸມໄດ້ມີຄຳເຫັນໂອລົມ ແລະ ສັງລວມບັນດາ ຄຳຄິດເຫັນຂອງຜູ້ແທນກອງປະຊຸມ ເພື່ອລາຍງານໃຫ້ສະພາແຫ່ງຊາດ ແລະ ເພື່ອໃຫ້ຂະແໜງການ, ຄະນະຮັບຜິດຊອບຮ່າງກົດໝາຍໄດ້ປັບປຸງແກ້ໄຂ.
ສະພາປະຊາຊົນແຂວງຊຽງຂວາງ
ບຸນສີ ສິດທິເດດ ໂທ: 020 99777890