ຕອນເຊົ້າຂອງວັນທີ 2 ພຶດສະພາ 2023 ໄດ້ຈັດກອງປະຊຸມ ສໍາມະນາວິທະຍາສາດ ຂັ້ນວິຊາການ ກ່ຽວກັບ ການເພີ່ມທະວີການຄຸ້ມຄອງການລົງທຶນຂອງລັດ ໃຫ້ມີປະສິດທິຜົນສູງ (ທາງໄກ Video Conference) ທີ່ຫ້ອງປະຊຸມ 426 ຕຶກສະພາແຫ່ງຊາດຫຼັງໃໝ່, ໂດຍການເປັນປະທານຮ່ວມຂອງ ທ່ານ ປອ ລີເບີ ລີບົວປາວ ປະທານກໍາມາທິການ ແຜນການ, ການເງິນ ແລະ ການກວດສອບ ຂອງສະພາແຫ່ງຊາດ ແລະ ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ມີ ທ່ານ ຮອງປະທານກໍາມາທິການ,ຕາງໜ້າບັນດາກະຊວງທີ່ກ່ຽວຂ້ອງ, ສະມາຊິກສະພາປະຊາ ຊົນແຂວງ 18 ເຂດເລືອກຕັ້ງ, ຄະນະເລຂາທິການ, ພະແນກການທີ່ກ່ຽວຂ້ອງຂັ້ນແຂວງ ແລະ ພະນັກງານວິຊາການສະພາປະຊາຊາປະຊາຊົນແຂວງ ກໍໄດ້ເຂົ້າຮ່ວມ.

ສະພາປະຊາຊົນແຂວງອຸດົມໄຊ ເຂົ້າຮ່ວມໂດຍ ທ່ານ ຄໍາເຜີຍ ງອນວັນຄໍາ ຮອງປະທານສະພາປະຊາຊົນແຂວງ, ຜູ້ຊີ້ນໍາວຽກງານຂົງເຂດເສດຖະກິດ, ມີ ທ່ານຮອງເລຂາທິການ, ຕາງໜ້າບັນດາພະແນກການ ແລະ ພະນັກງານວິຊາການ ກໍໄດ້ເຂົ້າຮ່ວມ. ກອງປະຊຸມສໍາມະນາຄັ້ງນີ້, ຈະໄດ້ຮັບຟັງ ການນໍາສະເໜີ ບົດຄົ້ນຄວ້າວິທະຍາສາດ ກ່ຽວກັບການເພີ່ມທະວີ ການຄຸ້ມຄອງການລົງທຶນຂອງລັດໃຫ້ມີປະສິດທິພາບ ແລະ ປະສິດທິຜົນ; ສະພາບການຈັດສັນງົບປະມານລົງທຶນລັດ ປີ 2023, ບັນຫາທີ່ຕັ້ງຂຶ້ນ ແລະ ຂໍ້ສະເໜີວິທີແກ້ໄຂ; ສະພາບການຈັດງົບປະມານບ້ວງຈົດຮັບ – ຈົດຈ່າຍ ແລະ ລົງ ທຶນອື່ນໆ ປີ 2023 ທີ່ກະຊວງການເງິນຄຸ້ມຄອງ; ສະພາບການຈັດສັນງົບປະມານໂຄງການລົງທຶນຂອງລັດບ້ວງພັດທະ ນາຊົນນະບົດ ແລະ ແກ້ໄຂຄວາມທຸກຍາກ ປີ 2023 ທີ່ກະຊວງກະສິກໍາ ແລະ ປ່າໄມຄຸ້ມຄອງ; ສະພາບການຈັດສັນງົບປະມານໂຄງການລົງທຶນຂອງລັດບ້ວງໄພພິບັດ ປີ 2023 ທີ່ກະຊວງແຮງງານ ແລະ ສະຫວັດດີການຄຸ້ມຄອງ ແລະ ສະ ພາບການຈັດສັນງົບປະມານ ແລະ ການຄຸ້ມຄອງກອງທຶນວິທະຍາສາດ ປີ 2023 ທີ່ກະຊວງສຶກສາທິການ ແລະ ກິລາ ຄຸ້ມຄອງ. ພ້ອມນັ້ນ, ຜູ້ແທນກອງປະຊຸມ ຍັງຈະໄດ້ສຸມໃສ່ ຄົ້ນຄວ້າ, ປະກອບຄໍາຄິດຄໍາເຫັນ, ຕັ້ງບັນຫາຂຶ້ນ ແລະ ສະເໜີວິທີແກ້ໄຂ ຕໍ່ກັບບັນດາໜ້າວຽກ, ແລກປ່ຽນບົດຮຽນ ແລະ ກອງປະຊຸມສໍາມະນາຄັ້ງນີ້ ຈະດໍາເນີນເປັນເວລາ 2 ວັນເຕັມ.

ພາບ ແລະ ຂ່າວ: ສີແຫວງ ສີບຸນເຮືອງ