ວັນ​ທີ 2 ພຶດ​ສະ​ພາ 2023 ສະພາປະຊາຊົນ ນວ ໄດ້ຈັດກອງປະຊຸມທາບທາມຄໍາເຫັນໃສ່ຮ່າງກົດໝາຍ 11 ສະ ບັບ ໂດຍການເປັນປະທານກອງປະຊຸມຂອງ ທ່ານ ບຸນທາມ ພຸດທະວົງສາ, ຮອງປະທານ ສະພາປະຊາຊົນ ນວ, ມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1, ສະມາຊິກສະພາປະຊາຊົນ ນວ, ບັນດາທ່ານເຈົ້າເມືອງ, ຫົວໜ້າພະແນກການ ແລະ ອົງການທຽບເທົ່າ ເຂົ້າຮ່ວມ.

ກອງປະຊຸມທາບທາມຄໍາເຫັນໃສ່ຮ່າງກົດໝາຍດັ່ງກ່າວ ຈະໄດ້ດຳເນີນແຕ່ ວັນທີ 2-4 ພຶດສະພາ 2023 ທີ່ຫ້ອງວ່າການ ນະຄອນຫຼວງວຽງຈັນ ເຊິ່ງຈຸດປະສົງກອງປະຊຸມຄັ້ງນີ້ ເພື່ອລະດົມຄໍາຄິດຄໍາເຫັນຈາກ ບັນດາທ່ານ ສະມາຊິກ ສະພາແຫ່ງຊາດ, ສະມາຊິກສະພາປະຊາຊົນ, ບັນດາທ່ານເຈົ້າເມືອງ, ຫົວໜ້າພະແນກການ ແລະ ອົງການທີ່ກ່ຽວຂ້ອງ ໃສ່ບັນດາຮ່າງກົດໝາຍດັ່ງກ່າວ ໃຫ້ມີຄວາມອຸດົມສົມບູນ, ມີເນື້ອໃນທີ່ຄົບຖ້ວນ ຕາມຄາດໝາຍທີ່ວາງໄວ້ ຫຼັງຈາກນັ້ນຈະໄດ້ສັງລວມຄໍາເຫັນດັ່ງກ່າວ ເພື່ອນຳສົ່ງໃຫ້ ກໍາມາທິການກົດໝາຍ ໄດ້ນໍາໄປຄົ້ນຄວ້າປັບປຸງຮ່ວມກັບຄະນະຮັບຜິດ ຊອບສ້າງ ແລະ ປັບປຸງກົດໝາຍຕື່ມ.

ສໍາລັບຮ່າງກົດໝາຍທີ່ນໍາມາທາບທາມ 11 ສະບັບ, ໃນນັ້ນ ຮ່າງກົດໝາຍສ້າງໃໝ່ 5 ສະບັບຄື: ຮ່າງກົດໝາຍວ່າດ້ວຍການປົກຄອງ; ຮ່າງກົດໝາຍວ່າດ້ວຍການຊົດເຊີຍຄ່າເສຍຫາຍຈາກລັດ; ຮ່າງກົດໝາຍວ່າດ້ວຍອາກອນທີ່ດິນ; ຮ່າງກົດໝາຍວ່າ ດ້ວຍວຽກງານສາທາລະນະສຸກ; ຮ່າງກົດໝາຍວ່າດ້ວຍການຈັດຫາງານ. ຮ່າງກົດໝາຍປັບປຸງ 6 ສະບັບ ຄື: ຮ່າງກົດໝາຍວ່າດ້ວຍສັດນໍ້າ ແລະ ການປະມົງ; ຮ່າງກົດໝາຍວ່າດ້ວຍ ສັດປ່າ; ຮ່າງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ; ຮ່າງກົດໝາຍວ່າດ້ວຍການພິມຕໍາໜ່າຍ; ຮ່າງກົດໝາຍວ່າດ້ວຍສານທະຫານ ແລະ ຮ່າງກົດໝາຍວ່າດ້ວຍທະນາຄານທຸລະກິດ.