ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດ 14 ປະທານສະພາປະຊາຊົນແຂວງ ໄດ້ສະແດງ ຄວາມຕ້ອນຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາປະຊາຊົນແຂວງກວາງຈິໃນຄັ້ງນີ້ ຊຶ່ງມີຄວາມໝາຍສໍາຄັນ ແລະເລິກເຊິ່ງ, ສະແດງເຖິງການຮັດແໜ້ນຄວາມສາມັກຄີທີ່ມີມູນເຊື້ອອັນຍາວນານລະຫວ່າງສອງພັກ-ສອງລັດ ກໍຄື ສອງຊາດລາວ-ຫວຽດນາມ, ເວົ້າລວມ, ເວົ້າສະເພາະກໍຄືສະພາປະຊາຊົນແຂວງສາລະວັນ ກັບ ສະພາປະຊາຊົນແຂວງ ກວາງຈິ ສສ ຫວຽດນາມ ຕາມບົດບັນທຶກຊ່ວຍຈໍາ ທີ່ໄດ້ບັນທຶກຮ່ວມກັນໃນປີ 2017 ຜ່ານມາ.

                ພ້ອມນັ້ນ ສະຫາຍ ຂັນໄຊ ລັດຖະເຮົ້າ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງສາລະວັນ ໄດ້ລາຍງານສະພາບ ລວມຂອງແຂວງສາລະວັນໂດຍຫຍໍ້ ແລະ ລາຍງານວຽກງານໃນແຕ່ລະດ້ານຂອງສະພາປະຊາຊົນ ແຂວງ ໃຫ້ສະພາປະຊາຊົນ ແຂວງກວາງຈິຮັບຊາບ; ຈາກນັ້ນສະຫາຍ ເລ ກວາງ ຈ໋ຽນ ກໍາມະການຄະນະປະຈໍາພັກແຂວງ ຮອງປະທານຜູ້ປະຈໍາການສະພາປະຊາຊົນແຂວງກວາງຈິ ສສ ຫວຽດນາມ ໄດ້ສະແດງຄວາມຂອບໃຈຕໍ່ການ ຕ້ອນຮັບອັນອົບອຸ່ນ ແລະ ອໍານວຍຄວາມສະດວກດ້ານຕ່າງໆ ຕໍ່ການມາຢ້ຽມຢາມ ແລະ ແລກປ່ຽນບົດ ຮຽນຊຶ່ງກັນ ແລະ ກັນ ໃນຂົງເຂດສະພາປະຊາຊົນແຂວງ ໄດ້ລາຍງານສະພາບລວມຂອງແຂວງກວາງຈິໂດຍຫຍໍ້ ແລະ ລາຍງານການເຄື່ອນໄຫວວຽກງານຂອງສະພາປະຊາຊົນແຂວງກວາງຈິ ໃຫ້ສະພາປະຊາຊົນແຂວງສາລະວັນຮັບຊາບ; ທັງສອງຝ່າຍໄດ້ແລກປ່ຽນບົດຮຽນໃນຫົວຂໍ້ຕ່າງໆ.

                ໂອກາດດຽວກັນສະພາປະຊາຊົນແຂວງສາລະວັນ ໄດ້ລົງນາມ ແລະ ເຊັນບົດບັນທຶກຄວາມຊົງຈໍາຮ່ວມກັນກັບ ສະພາປະຊາຊົນແຂວງກວາງຈິ, ຮ່ວມລົງນາມໃນສັນຍາມີ ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດ 14 ປະທານສະພາປະຊາຊົນແຂວງສາລະວັນ ແລະ ສະຫາຍ ເລ ກວາງ ຈ໋ຽນ ກໍາມະການຄະນະປະຈໍາພັກແຂວງ ຮອງປະທານຜູ້ປະຈໍາການສະພາປະຊາຊົນແຂວງກວາງຈິ ສສ ຫວຽດນາມ ໂດຍຊ້ອງໜ້າຄະນະຜູ້ແທນ ທັງສອງຝ່າຍທີ່ເຂົ້າຮ່ວມ; ທັງສອງຝ່າຍໄດ້ຕົກລົງເຫັນດີເປັນເອກະພາບກັນກ່ຽວກັບເນື້ອໃນບົດບັນທຶກຄວາມຊົງຈໍາດັ່ງລຸ່ມນີ້: ການມາຢ້ຽມຢາມ, ເຮັດວຽກຂອງຄະນະປະຈໍາສະພາປະຊາຊົນແຂວງກວາງຈິ ໃນຄັ້ງນີ້, ແມ່ນ ການມາຢ້ຽມຢາມ ໄດ້ປະກອບສ່ວນຮັດແໝ້ນສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ຫວຽດນາມ-ລາວ ເວົ້າລວມ; ເວົ້າສະເພາະລະຫວ່າງການນຳ ແລະ ປະຊາຊົນຂອງ ສອງແຂວງ ສາລະວັນ-ກວາງຈິ. ເປັນການເຄື່ອນໄຫວເພື່ອແນໃສ່ ຜັນຂະຫຍາຍບັນດາເນື້ອໃນບົດບັນທຶກຄວາມຊົງຈຳລະຫວ່າງສະພາປະຊາຊົນແຂວງສາລະວັນ ກັບສະພາປະຊາຊົນແຂວງກວາງຈິ ສສ ຫວຽດນາມໃນ ປີຜ່ານມາ,ການສະເຫຼີມສະຫຼອງວັນເຊັນສົນທິສັນຍາມິດຕະພາບ, ການຮ່ວມມືຮອບດ້ານລາວ-ຫວຽດນາມ ຄົບຮອບ 46 ປີ (18/07/1977-18/07/2023) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 61 ປີ(05/09/1962-05/09/2023); ບົນພື້ນຖານນໍ້າໃຈສາມັກຄີ, ໄວ້ເນື້ອເຊື່ອໃຈເຊິ່ງກັນ ແລະກັນ ຄະນະປະຈໍາສະພາປະຊາຊົນສອງແຂວງ ສາລະວັນ-ກວາງຈິ ໄດ້ແລກປ່ຽນຂໍ້ມູນ, ຕົ້ນຕໍແມ່ນກ່ຽວກັບສະພາບການຈັດຕັ້ງເຄື່ອນໄຫວວຽກງານໃນ ຂົງເຂດສະພາຂອງສອງແຂວງ, ແລກປ່ຽນບາງປະສົບການເຄື່ອນໄຫວຂອງຄະນະປະຈຳສະພາ, ບັນດາຄະນະກຳມະການ, ຄະນະເລຂາທິການສະພາປະຊາຊົນແຂວງ, ແນໃສ່ປະກອບສ່ວນຍົກສູງຄວາມອາດ ສາມາດ ແລະ ປະສິດທິ ພາບໃນການເຄື່ອນໄຫວວຽກງານຂອງສະພາປະຊາຊົນແຕ່ລະແຂວງ ໃນຕໍ່ໜ້າ; ສືບຕໍ່ລາຍງານໃຫ້ກັນຊາບກ່ຽວກັບສະພາບການຈັດຕັ້ງ ແລະ ການເຄື່ອນໄຫວວຽກງານຂອງສະພາປະຊາຊົນສອງແຂວງ ສາລະວັນ-ກວາງຈິ ໃນຕໍ່ໜ້າ, ແນໃສ່ເປັນພື້ນຖານໃຫ້ແກ່ສອງຝ່າຍໃນການແລກປ່ຽນບົດຮຽນດ້ານວຽກງານວິຊາສະເພາະ ແລະ ຍົກສູງຜົນສໍາເລັດຂອງການຮ່ວມມືໃນຕໍ່ໜ້າ; ສອງຝ່າຍເຫັນດີເປັນເອກະພາບ ຜັດປ່ຽນກັນເປັນເຈົ້າພາບຈັດພິທີພົບປະແລກປ່ຽນບົດຮຽນ 02 ປີ/ຄັ້ງ, ນອກນັ້ນ ສອງຝ່າຍຍັງສາມາດຈັດຕັ້ງການຢ້ຽມ ຢາມ ແລະ ເຮັດວຽກຢ່າງບໍ່ເປັນທາງການ ໃນກໍລະນີມີຄວາມຈໍາເປັນ; ພິທີພົບປະຄັ້ງຕໍ່ໄປຈະຈັດຂຶ້ນຢູ່ແຂວງກວາງຈິ ໃນປີ 2025, ສ່ວນວັນເວລາລະອຽດ ສອງຝ່າຍຈະໄດ້ປຶກສາຫາລື, ເປັນເອກະພາບຮ່ວມກັນ ແລະ ລາຍງານໃຫ້ກັນຊາບໂດຍຜ່ານພະແນກການຕ່າງປະເທດສອງແຂວງ.

(ຂ່າວ: ນາງ ຄັດສອນ ຮຸ່ງສະຫວ່າງ; ພາບ: ທ່ານ ດີລຳພົນ ພົມມະຈັນ)