(ສພຊ) ໃນລະຫວ່າງວັນທີ 5-7 ເມສາ 2023, ທ່ານ ອຸດົມ ວົງໄກສອນ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 11 ແຂວງບໍລິຄໍາໄຊ, ພ້ອມດ້ວຍວິຊາການຕິດຕາມ 1 ທ່ານ ໄດ້ເຂົ້າຮ່ວມກອງປະຊຸມສໍາມະນາ ພາຍໃຕ້ຫົວຂໍ້: “ການເຈລະຈາ ແລະ ການໄກ່ເກ່ຍ ຂອງສະມາຊິກລັດຖະສະພາ: ເຕັກນິກ, ທັກສະ ແລະ ປະສົບການ” ເຊິ່ງຈັດຂຶ້ນທີ່ຊຽມລຽບ, ຣາຊະອານາຈັກກໍາປູເຈຍ. ກອງປະຊຸມສຳມະນາດັ່ງກ່າວ, ຈັດຂຶ້ນພາຍໃຕ້ການຮ່ວມມືຂອງສູນລັດຖະສະພາອາຊີ (PCAsia) ແລະ ກອງເລຂາສະມັດຊາລັດຖະສະພາລະຫວ່າງຊາດອາຊຽນ (AIPA) ໂດຍມີສະມາຊິກສະພາແຫ່ງຊາດ ແລະ ວິຊາການ ຈາກບັນດາລັດຖະສະພາສະມາຊິກ AIPA ພ້ອມດ້ວຍກອງເລຂາໄອປາ ແລະ ຊ່ຽວຊານຈາກລັດຖະສະພາເອີຣົບ ເຂົ້າຮ່ວມລວມທັງໝົດ ຈໍານວນ 36 ທ່ານ.

ກອງປະຊຸມຄັ້ງນີ້ ໄດ້ຮັບຟັງການນຳສະເໜີກ່ຽວກັບຄວາມຮູ້ພື້ນຖານ ແລະ ບົດຮຽນກ່ຽວກັບການເຈລະຈາ, ການໄກ່ເກຍ ແລະ ການປານີປານອມ ໂດຍສະເພາະແມ່ນການເຈລະຈາລະຫວ່າງອົງການນິຕິບັນຍັດ ແລະ ອົງການບໍລິຫານ ໃນການຮັບຮອງເອົາແຜນງົບປະມານແຫ່ງຊາດ, ການເຈລະຈາໃນທີ່ປະຊຸມ ແລະ ການຈັດຕັ້ງປະຕິບັດວຽກງານການທູດລັດຖະສະພາ ເຊິ່ງຜູ້ເຂົ້າຮ່ວມ ໄດ້ແລກປ່ຽນບົດຮຽນ ແລະ ປະສົບການ ເຊິ່ງກັນ ແລະ ກັນ ຢ່າງຟົດຟື້ນ ແລະ ສ້າງສັນ.