(ສພຊ) ໃນວັນທີ 31 ມີນາ 2023 ກອງທຶນຊ່ວຍເຫຼືອສັງຄົມສະພາແຫ່ງຊາດ ພ້ອມດ້ວຍການນຳຂອງສະພາແຫ່ງຊາດ ແລະ 3 ອົງການຈັດຕັ້ງມະຫາຊົນຂອງສະພາແຫ່ງຊາດ ນໍາໂດຍທ່ານ ດຣ. ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມ ສະພາແຫ່ງຊາດ ພ້ອມດ້ວຍທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ແລະ ຄະນະ ໄດ້ເຄື່ອນໄຫວຢ້ຽມຢາມຟາມລ້ຽງກຸ້ງ ຂອງກຸ່ມບໍລິສັດ ອີພີແອວ ຈຳກັດຜູ້ດຽວ ທີ່ບ້ານໂຄກສະອາດ ເມືອງໄຊທານີ ນະຄອນຫຼວງວຽງຈັນ.

ໂອກາດດັ່ງກ່າວ, ທ່ານ ແອັດ ພົມວິໄລ ປະທານກຸ່ມບໍລິສັດ ອີພີແອວ ຈຳກັດຜູ້ດຽວ ໄດ້ກ່າວຕ້ອນຮັບ ແລະ ລາຍງານໃຫ້ຮູ້ວ່າ: ກຸ່ມບໍລິສັດ ອີພີແອວ ຈຳກັດຜູ້ດຽວ ມີຫ້ອງການຕັ້ງຢູ່ບ້ານດອນໜູນ ເມືອງໄຊທານີ ນະຄອນຫຼວງວຽງຈັນ ເຊິ່ງບໍລິສັດ ແມ່ນດຳເນີນຫຼາຍກິດຈະການເຊັ່ນ: ກະສິກໍາ, ການຂົນສົ່ງ ແລະ ນໍ້າມັນ. ໃນນີ້, ດ້ານກະສິກໍາ ທາງກຸ່ມບໍລິສັດ ອີພີແອວ ໄດ້ຊອກວິທີຄົ້ນຄິດ ແລະ ທົດລອງການລ້ຽງກຸ້ງແມ່ນໍ້າ ຫຼື ກຸ້ງກ້າມກາມ ໂດຍໄດ້ລ້ຽງທົດລອງມາແລ້ວ 3 ປີ ເຊິ່ງໃນແຕ່ລະປີ ແມ່ນເຫັນວ່າໄດ້ຮັບຜົນຜະລິດຕາມຄາດໝາຍ ແລະ ປະສົບຜົນສຳເລັດໃນການທົດລອງລ້ຽງກຸ້ງ ເພື່ອປ້ອນຕະຫຼາດພາຍໃນ ເຫັນວ່າມີຜົນຕອບຮັບເປັນຢ່າງດີຈາກຜູ້ບໍລິໂພກ ແລະ ມີຄວາມຕ້ອງການຫຼາຍ. ດັ່ງນັ້ນ ທາງກຸ່ມບໍລິສັດ ອີພີແອວ ຈຶ່ງໄດ້ມີແຜນຂະຫຍາຍເນື້ອທີ່ການລ້ຽງກຸ້ງ ຈຳນວນ 100 ກວ່າເຮັກຕາ ເຊິ່ງປັດຈຸບັນ ແມ່ນຢູ່ໃນໄລຍະບຸກເບີກ ເພື່ອໃຫ້ພຽງພໍກັບຄວາມຕ້ອງການຂອງລູກຄ້າ ແລະ ຜູ້ບໍລິໂພກ. ນອກຈາກນີ້, ຍັງມີແຜນຂະຫຍາຍເພື່ອເປັນສິນຄ້າສົ່ງຂາຍພາຍໃນ ແລະ ສົ່ງອອກຕ່າງປະເທດ ໂດຍທາງບໍລິສັດ ແມ່ນມີວິທິການລ້ຽງທີ່ທັນສະໄໝ. ນອກຈາກການລ້ຽງກຸ້ງແລ້ວ ທາງກຸ່ມບໍລິສັດ ອີພີແອວ ຍັງມີແຜນປູກກ້ວຍ ຈຳນວນ 120 ເຮັກຕາ ແລະ ປູກພືດອື່ນໆ ທີ່ຜູ້ບໍລິໂພກມີຄວາມຕ້ອງການ ເພື່ອທົດແທນການນໍາເຂົ້າມາຈາກຕ່າງປະເທດ ໂດຍລວມແລ້ວ ກຸ່ມບໍລິສັດ ອີພີແອວ ແມ່ນມີຄວາມຕ້ອງການປູກຝັງ-ລ້ຽງສັດ ເພື່ອໃຫ້ເປັນສິນຄ້າຈຳໜ່າຍພາຍໃນ ເພື່ອຫຼຸດຜ່ອນການນໍາເຂົ້າຈາກຕ່າງປະເທດ ເພື່ອເປັນການສົ່ງເສີມໃຫ້ປະຊາຊົນມີວຽກເຮັດງານທຳ, ແລະມີລາຍຮັບທີ່ໝັ້ນຄົງ.

ພ້ອມດຽວກັນນີ້, ຄະນະ ຍັງໄດ້ຢ້ຽມຢາມເບິ່ງສະຖານທີ່ລ້ຽງກຸ້ງ, ແລະໄດ້ແລກປ່ຽນຄຳຄິດຄຳເຫັນທີ່ ຄະນະ ມີຄວາມສົນໃຈ ໂດຍສະເພາະແມ່ນລະບົບການຈັດການບຳບັດນ້ຳ, ການເພາະລ້ຽງກຸ້ງ ໃນສະພາບອາກາດ, ນ້ຳໃນປະເທດເຮົາ, ແຜນການຂະຫຍາຍຟາມ ແລະ ອື່ນໆ. ພ້ອມນັ້ນ, ຍັງໄດ້ຮັບຊົມການສະແດງສິລະປະຈາກ ສູນສິລະປະລ້ານຊ້າງລາວ ອີກດ້ວຍ.

ໂອກາດດຽວກັນນີ້, ທ່ານ ນາງ ປິ່ງຄຳ ລາຊະສິມມາ ໄດ້ຕາງໜ້າໃຫ້ຄະນະ ມີຄຳເຫັນ ແລະ ສະແດງຄວາມຊົມເຊີຍຕໍ່ກຸ່ມບໍລິສັດ ອີພີແອວ ຈຳກັດຜູ້ດຽວ ທີ່ມີວິໄສທັດທີ່ກວ້າງໄກ ເພື່ອພັດທະນາຕົນໃຫ້ມີຈະເລີນກ້າວໜ້າຍິ່ງໆຂຶ້ນ ຕາມແນວທາງຂອງພັກ, ນະໂຍບາຍຂອງລັດ.

ພ້ອມກັນນີ້ ຄະນະ ຍັງໄດ້ມອບເງິນສົດ ມູນຄ່າ 3 ລ້ານກີບ ໃຫ້ຄະນະສິລະປະລ້ານຊ້າງລາວອີກດ້ວຍ.

(ພາບ ແລະ ຂ່າວ: ນາງ ປາກາລັກ ພົມມີໄຊ)