ໃນວັນທີ 24 ມີນາ 2023 ຢູ່ທີ່ເມືອງບົວລະພາ ແຂວງຄໍາມ່ວນ ໄດ້ຈັດກອງປະຊຸມ ສະຫຼຸບການເຄື່ອນໄຫວວຽກງານ ຂອງຄະນະສະມາຊິກສະພາປະຊາຊົນແຂວງຄໍາມ່ວນ ປະຈໍາເຂດເລືອກຕັ້ງເມືອງບົວລະພາ ປະຈໍາປີ 2022 ແລະ ທິດທາງແຜນການປະຈໍາປີ 2023 ໂດຍການເຂົ້າຮ່ວມເປັນປະທານ ຂອງທ່ານ ນາງ ບັງອອນ ໄຊຍະສິດ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ ແລະ ທ່ານ ນາງ ກົງໃຈ ໄຊປັນຍາ  ຫົວໜ້າຄະນະສະມາຊິກສະພາປະຊາຊົນແຂວງຄໍາມ່ວນ ປະຈໍາເຂດເລືອກຕັ້ງເມືອງບົວລະພາ ເປັນກຽດເຂົ້າຮ່ວມໂດຍ ທ່ານ ຄໍາປອນ ກາລີແກ້ວດວງສອນ ຮອງເລຂາພັກເມືອງ ມີບັນດາ ທ່ານຄະນະປະຈໍາພັກເມືອງ, ກຳມະການພັກເມືອງ ແລະ ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ເຂົ້າຮ່ວມ.

ກອງປະຊຸມໄດ້ຮັບຟັງການຜ່ານ ບົດສະຫຼຸບການເຄື່ອນໄຫວວຽກງານຂອງ ຄະນະສະມາຊິກສະພາປະຊາຊົນແຂວງຄໍາມ່ວນ ປະຈໍາເຂດເລືອກຕັ້ງເມືອງບົວລະພາ ປະຈໍາປີ 2022 ແລະ ທິດທາງແຜນການປະຈໍາປີ 2023  ກ່ຽວກັບການສະຫຼຸບຕີລາຄາຄືນຜົນສໍາເລັດ, ຈຸດດີ, ຈຸດອ່ອນ, ຂໍ້ຄົງຄ້າງການເຄື່ອນໄຫວວຽກງານຜ່ານມາ, ແລະ ຮ່າງບົດສະຫຼຸບ ການເຄື່ອນໄຫວວຽກງານປົກປ້ອງລະບຽບ ກົດໝາຍຂັ້ນເມືອງ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີຕາມກົດໝາຍກຳນົດ, ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າໃນທົ່ວເມືອງບົວລະພາ, ພ້ອມນັ້ນ ຜູ້ເຂົ້າຮ່ວມກອງປະຊຸມໄດ້ພ້ອມກັນຄົ້ນຄວ້າປະກອບຄໍາຄິດ-ຄໍາເຫັນຕໍ່ບົດສະຫຼຸບ ຢ່າງມີບັນຍາກາດອັນຟົດຟື້ນ ແລະ ເປັນທິດທາງແຜນການຈັດຕັ້ງປະຕິບັດໃຫ້ສອດຄ່ອງກັບສະພາບຄວາມເປັນຈິງຕໍ່ໜ້າໃຫ້ໄດ້ຮັບປະສິດທິພາບຂຶ້ນເປັນກ້າວໆ.

ໂອກາດດັ່ງກ່າວ ກອງປະຊຸມຍັງໄດ້ຄົ້ນຄວ້າປຶກສາຫາຫລື ແລະ ພິຈາລະນານໍາເອົາບັນດາຂໍ້ສະເໜີຕ່າງໆ ຂອງອຳນາດການປົກຄອງບ້ານ ແລະ ຂອງປະຊາຊົນ ຢູ່ 6 ບ້ານ ຂອງເມືອງບົວລະພາ, ໃນການເຄື່ອນໄຫວວຽກງານຄັ້ງວັນທີ 21-23 ມີນາ 2023 ຜ່ານມາ, ທີ່ ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄໍາມ່ວນ ພ້ອມດ້ວຍຄະນະສະມາຊິກສະພາປະຊາຊົນແຂວງຄໍາມ່ວນ ປະຈໍາເຂດເລືອກຕັ້ງເມືອງບົວລະພາ ໄດ້ສຳເລັດໃນການເຄື່ອນໄຫວພົບປະຜູ້ມີສິດເລືອກຕັ້ງທີຕິດພັນການຈັດຕັ້ງຜັນຂະຫຍາຍ ໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II.

ເພື່ອສັງລວມ ແລະ ຕົກລົງມອບໃຫ້ອົງການລັດຂັ້ນຕ່າງໆ ມາຄົ້ນຄວ້າ ທີ່ຈະປະສານສົມທົບແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.

ໂດຍ: ເອື້ອ ມະໂນສິງ