ໃນວັນທີ 21 ມີນາ 2023 ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະສະມາຊິກສະພາປະຊາຊົນແຂວງ ຄໍາມ່ວນ ໄດ້ເຄື່ອນໄຫວຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດ ຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ 2 ຈຸດຂອງເມືອງບົວລະພາ ຄື: ບ້ານ ໂພນສ້າງໄຟ ແລະ ບ້ານກະແຕ້ ເຊິ່ງນໍາໂດຍ ທ່ານ ນາງ ບັງອອນ ໄຊຍະສິດ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ພ້ອມດ້ວຍ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ຄະນະພັກເມືອງຜູ້ຊີ້ນຳເຂດ, ປກຊ-ປກສ, ອຳນາດການປົກຄອງບ້ານ ແລະ ຕະຫຼອດຮອດພໍ່ແມ່ປະຊາຊົນເຂົ້າຮ່ວມ.

ໃນວາລະຂອງການຈັດຕັ້ງເຜີຍແຜ່ຜົນສຳເລັດ ກອງປະຊຸມໃນຄັ້ງນີ້ໄດ້ຮັບຟັງການລາຍງານໂດຍສັງເຂບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງບ້ານ ແລະ ທິດທາງແຜນການໃນຕໍ່ໜ້າ, ຈາກນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍ່ໄດ້ຜັດປ່ຽນເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II.

ຈຸດປະສົງການລົງເຄື່ອນໄຫວໃນຄັ້ງນີ້, ກໍເພື່ອນໍາເອົາເນື້ອໃນຜົນສໍາເລັດ ຂອງການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II ເຜີຍແຜ່ໃຫ້ປະຊາຊົນ ແລະ ພະນັກງານ-ລັດຖະກອນ ໄດ້ຮັບຮູ້ເຂົ້າໃຈຢ່າງກວ້າງຂວາງ ຕິດພັນກັບການລົງຢ້ຽມຢຽມຖາມຂ່າວ ແລະ ຮັບຟັງຄໍາຄິດເຫັນ, ຄໍາສະເໜີ, ຂໍ້ຂັດຂ້ອງໝອງໃຈຂອງປະຊາຊົນ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງແກ້ໄຂ.

ພ້ອມນັ້ນ, ທ່ານຮອງປະທານສະພາປະຊາຊົນແຂວງຄໍາມ່ວນ ພ້ອມຄະນະ ຍັງໄດ້ນໍາເອົາເຄື່ອງອຸປະໂພ-ບໍລິໂພກ ມອບໃຫ້ຄອບຄົວທີ່ຂາດເຂີນຈໍານວນ 8 ຄອບຄົວ.

ຄະນະດັ່ງກ່າວຍັງຈະໄດ້ສືບຕໍ່ເຄື່ອນໄຫວອີກ 4 ຈຸດຂອງເມືອງ ແລະ ຄາດວ່າຈະເຄື່ອນໄຫວສໍາເລັດໃນທ້າຍອາທິດນີ້.

ໂດຍ: ເອື້ອ ມະໂນສິງ