ໃນວັນທີ 22 ມີນາ 2023 ຢູ່ທີ່ຫ້ອງປະຊຸມສະພາປະຊາຊົນແຂວງ ໜ່ວຍພັກສະພາປະຊາຊົນແຂວງເປີດກອງປະຊຸມ ຈໍາໄຕມາດທີ I ແລະ ທິດທາງແຜນວຽກ ປະຈໍາໄຕມາດ II ປີ 2023 ແລະ ພິທີຮັບສະມາຊິກພັກສໍາຮອງ ຂຶ້ນໂດຍໃຫ້ກຽດເປັນປະທານ ຂອງສະຫາຍ ບຸນໂຮມ ເທດທານີ ຮອງເລຂາພັກແຂວງ ປະທານສະພາປະຊາ ຊົນ ແຂວງ ແລະ ສະຫາຍ ແສງເດືອນ ຈັນທະລັງສີ ເລຂາໜ່ວຍພັກສະພາປະຊາຊົນແຂວງ, ຄະນະໜ່ວຍພັກສະມາຊິກພັກ ແລະ ມະຫາຊົນຜູ້ກ້າວ ໜ້າທີ່ຈະກ້າວຂຶ້ນເປັນສະມາຊິກ ພັກສໍາຮອງຂອງໜ່ວຍພັກສະພາປະຊາ ຊົນປະຊາຊົນແຂວງເຂົ້າຮ່ວມ.
ໃນທີ່ປະຊຸມໄດ້ຜ່ານຂໍ້ຕົກລົງອະນຸມັດຮັບສະມາຊິກໃໝ່ເຊິ່ງປະກອບດ້ວຍ 4 ສະຫາຍ, ຍິງ 4 ສະຫາຍ ເຂົ້າເປັນສະມາຊິກພັກສໍາຮອງຂອງໜ່ວຍພັກສະພາປະຊາຊົນແຂວງ, ໃນທີ່ປະຊຸມສະຫາຍ ບຸນໂຮມ ເທດທານີ ໄດ້ມີຄໍາເຫັນໂອ້ລົມຊີ້ນໍາຕໍ່ສະມາຊິກພັກສະພາປະຊາຊົນແຂວງໂດຍສະເພາະແມ່ນສະມາຊິກພັກສໍາຮອງທີ່ເຂົ້າໃໝ່ ຈົ່ງສືບຕໍ່ປະຕິບັດວຽກງານຕາມແຜນວຽກທີ່ວາງອອກໃຫ້ສໍາເລັດຕາມລະດັບຄາດໝາຍທີ່ວາງໄວ້, ສືບຕໍ່ຝຶກຝົນຫຼໍ່ຫຼອມຕົນເອງໂດຍສະເພາະແມ່ນການຊອກຮໍ່າຮຽນໃນດ້ານຕ່າງໆ ເພື່ອມາພັດທະນາຕົນເອງ, ຈົ່ງມີສະຕິຕໍ່ການຈັດຕັ້ງ, ໃຫ້ມີມີແນວຄິດການເມືອງໜັກແໜ້ນ ແລະ ເອົາໃຈໃສ່ເຂົ້າຮ່ວມຂະບວນການຕ່າງໆ ນໍາບັນດາພະແນກການອ້ອມຂ້າງແຂວງ.
ໃນໂອກາດດັ່ງກ່າວສະມາຊິກພັກສໍາຮອງໃໝ່ໄດ້ໃຫ້ປະຕິຍານຕົນວ່າ ຈະປົກປັກຮັກສາ ແລະ ປະຕິບັດແນວທາງ, ແຜນນະໂຍບາຍຂອງພັກ, ເຄົາລົບກົດລະບຽບພັກ, ກົດໝາຍ ແລະ ລະບຽບການຂອງລັດ, ຈະປະຕິດບັດສິດ,ໜ້າທີ່ແລະຂໍ້າຫ້າມຂອງສະມາຊິກພັກຢ່າງເຂັ້ມງວດ, ຈະຮັກສາຄວາມລັບຂອງພັກ, ຂອງຊາດ, ຈະຈົ່ງຮັກພັກດີຕໍ່ການຈັດຕັ້ງແລະປະຊາຊົນ ແລະ ຈະກຽມພ້ອມເສຍຫຼະທຸກສິ່ງທຸກຢ່າງເພື່ອ ປະເທດຊາດ ແລະ ປະຊາຊົນ.
ໃນວາລະດໍາເນີນກອງປະຊຸມ ທ່ານ ຄໍາແພງ ທໍາມະວອນ ຮອງເລຂາໜ່ວຍພັກສະພາປະຊາຊົນແຂວງ ໄດ້ຂຶ້ນຜ່ານບົດຫຼຸບການເຄື່ອນໄຫວວຽກພັກ ປະຈໍາໄຕມາດທີ I ແລະ ທິດທາງແຜນວຽກ ປະຈໍາໄຕມາດ II ປີ 2023 ຂອງໜ່ວຍພັກສະພາປະຊາຊົນແຂວງ ເຊິ່ງຕະຫຼອດໄລຍະ 3 ເດືອນຜ່ານມາຄະນະພັກໄດ້ເອົາໃຈໃສ່ຈັດຕັ້ງເຊື່ອມຊືມບັນດາແນວທາງນະໂຍບາຍ, ມະຕິຄໍາສັ່ງຂອງພັກ, ໄດ້ເພີ່ມທະວີການນໍາພາຂອງພັກໃນຂອບເຂດຄວາມຮັບຜິດຊອບຂອງຕົນພ້ອມທັງເອົາໃຈໃສ່ວຽກງານກໍ່ສ້າງພັກໃຫ້ມີຄວາມປອດໃສເຂັ້ມແຂງ ແລະ ໜັກແໜ້ນໃນທຸກດ້ານ ເປັນຕົ້ນແມ່ນ: ດ້ານການເມືອງແນວຄິດ, ການຈັດຕັ້ງ ແລະ ແບບແຜນວິທີເຮັດວຽກ, ດໍາເນີນຮ່ວມຊີວິດປະຈໍາເດືອນ ແລະ ຂະຫຍາຍສະມາຊິກພັກໃຫ້ຖືກກັບມາດຖານ, ຂັ້ນຕອນຕາມກົດລະບຽບ ພັກທີ່ໄດ້ວາງໄວ້ ແລະ ໃນໄລຍະ 3 ເດືອນຕໍ່ໜ້າໜ່ວຍພັດສະພາປະຊາຊົນແຂວງ ຈະສືບຕໍ່ສຶກສາການເມືອງ-ແນວຄິດໃຫ້ພະນັກງານມີແນວຄິດຕື່ນຕົວ, ມີສະຕິຕໍ່ການຈັດຕັ້ງ, ສືບຕໍ່ປັບປຸງກົງຈັກດ້ານບຸກຄາລາກອນ, ຊູກຍູ້ສະມາຊິກພັກ-ພະນັກງານ ຝຶກຝົນຫຼໍ່ຫຼອມຕົນເອງດ້ານຄຸນທາດການເມືອງ-ແນວຄິດ, ສືບຕໍ່ສ້າງມະຫາຊົນກ້າວໜ້າ ແລະ ສ້າງຂະບວນການນໍາພາກສ່ວນຕ່າງໆ. ໃນທີປະຊຸມບັນດາສະຫາຍ ສະມາຊິກພັກໄດ້ປະກອບຄໍາຄິດ, ຄໍາເຫັນໃສ່ບົດສະຫຼຸບດັ່ງກ່າວໃຫ້ມີເນື້ອໃນຄົບຖ້ວນສົມບູນຂຶ້ນຕື່ມອີກ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງ ສຸກສະຫວັນ ອິນທະແສງ