ໃນວັນທີ 22 ມີນາ 2023, ທ່ານ​ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ ປະທານຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ ແຂວງ ອັດຕະປື ພ້ອມດ້ວຍຄະນະ ເຂົ້າພົບປະຢ້ຽມຢາມ ຄະນະນໍາ ແຂວງຣັດຕະນະກິລີ ແຫ່ງຣາຊະອານາຈັກກໍາປູເຈຍ ໂດຍການຕ້ອນຮັບຂອງທ່ານ ເງີນແນນ ຮອງເຈົ້າແຂວງ ຜູ້ວ່າການແທນເຈົ້າແຂວງ ຣັດຕະນະກິລີ ພ້ອມດ້ວຍຄະນະ.

ໃນການພົບປະດັ່ງກ່າວ ເປັນການນໍາສະເໜີໂຕຕໍ່ຄະນະນໍາແຂວງລັດຕະນະກິລີ ພາຍຫຼັງທີ່ໄດ້ຮັບການສ້າງຕັ້ງຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ​ ແຂວງອັດຕະປື​ ໃນຕົ້ນປີ 2022 ຜ່ານມາ,​ ນະໂອກາດນີ້ຄະນະນໍາທັງສອງຝ່າຍ ໄດ້ຕີລາຄາສູງໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືທີ່ດີງາມ ແລະ ການພົວພັນຮ່ວມມືຮອບດ້ານ ໃຫ້ໝັ້ນຄົງຍາວນານລະຫວ່າງແຂວງຣັດດຕະນະກິລີ ແລະ​ ແຂວງອັດຕະປື,​ ເພື່ອຮັດແໜ້ນຄວາມສາມັກຄີຮັກແພງ,​ຮັກສາມູນເຊື້ອອັນດີງາມ,​ ທີ່ມີວັດທະນະທໍາຄ້າຍກັນ ຖານບ້ານໃກ້ເຮືອນຄຽງ, ບ້ານແກ່ວເມືອງດອງຂອງປະຊາຊົນສອງແຂວງ​ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.​

ນອກຈາກນີ້,​ ຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ​ ແຂວງອັດຕະປື​ ຍັງໄດ້ຢ້ຽມຊົມ ບືງຢັກໂລມ ແລະ​ ພຣະໃຫ່ຍ​ ເຊິ່ງເປັນແຫລ່ງທ່ອງທ່ຽວທີ່ສໍາຄັນຂອງແຂວງຣັດດຕະນະກິລີ.
(ນັກຂ່າວ:ສພຂ​ ອັດຕະປື)