(ສພຊ) ເພື່ອເປັນການຢ້ຽມຢາມ, ແລກປ່ຽນຄໍາຄິດຄໍາເຫັນ ແລະ ທັດສະນະກ່ຽວກັບການພັດທະນາ ເຂດພັດທະນາກວມລວມໄຊເສດຖາ; ລົງເກັບກໍາຂໍ້ມູນຕົວຈິງ ກ່ຽວກັບການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍ ຂອງບັນດາຂະແໜງການທີ່ກ່ຽວຂ້ອງ ແລະ ຫົວໜ່ວຍທຸລະກິດຕ່າງໆ ຢູ່ເຂດພັດທະນາກວມລວມໄຊເສດຖາ; ຕິດຕາມຊຸກຍູ້ການແກ້ໄຂຄວາມຫຍຸ້ງຍາກ ໃນການນໍາເຂົ້າ-ສົ່ງອອກ ສິນຄ້າ ຂອງຫົວໜ່ວຍການຜະລິດ ໃນເຂດພັດທະນາດັ່ງກ່າວ ໃຫ້ຖືກຕ້ອງຕາມກົດໝາຍ, ມີປະສິດທິພາບ ເພື່ອເປັນຂໍ້ມູນ ແລະ ບ່ອນອີງໃນການລາຍງານຕໍ່ຄະນະປະຈໍາສະພາແຫ່ງຊາດ ໃນຕອນເຊົ້າຂອງວັນທີ 22 ມີນາ 2023 ທ່ານ ຮສ. ປອ. ລິນຄໍາ ດວງສະຫວັນ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ລົງຢ້ຽມຢາມ ເຂດພັດທະນາກວມລວມໄຊເສດຖາ ໂດຍໄດ້ຮັບການຕ້ອນຮັບຈາກທ່ານ ຊົງຈູນ ຜູ້ອໍານວຍການບໍລິສັດຮ່ວມທຶນ ລາວ-ຈີນ ຈໍາກັດ.

ໃນໂອກາດດັ່ງກ່າວ ຄະນະ ໄດ້ຮັບຟັງການສະເໜີກ່ຽວກັບການພັດທະນາເຂດພັດທະນາກວມລວມໄຊເສດຖາ ໃນໄລຍະຜ່ານມາ ຈົນເຖິງປັດຈຸບັນ ແລະ ສົນທະນາແລກປ່ຽນຄໍາເຫັນ ລະຫວ່າງ ຄະນະຜູ້ນໍາ, ຫ້ອງການສົ່ງເສີມ ແລະ ຄຸ້ມຄອງເສດຖະກິດພິເສດ ແລະ ບໍລິສັດ ຮ່ວມທຶນ ລາວ-ຈີນ ຈໍາກັດ, ຈາກນັ້ນ ທ່ານ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ກໍໄດ້ມີຄໍາເຫັນໂອ້ລົມ ເພື່ອໃຫ້ທິດຊີ້ນໍາ.