(ສພຊ) ກອງປະຊຸມເຝິກອົບຮົມການຍົກລະດັບ ສ້າງຄວາມເຂັ້ມແຂງ ປະຈຳປີ 2022 ໃຫ້ພະນັກງານ-ລັດຖະກອນຂອງສະຖາບັນຄົ້ນຄວ້ານິຕິກຳສະພາແຫ່ງຊາດ ແລະ ວິຊາການທີ່ຮັບຜິດຊອບວຽກງານຄົ້ນຄວ້າ ແລະ ສັງລວມເນື້ອໃນ ປະຈຳເຂດເລືອກຕັ້ງໃນທົ່ວປະເທດ ໄດ້ຈັດຂຶ້ນໃນວັນທີ 13 ມີນາ 2023 ທີ່ສະພາແຫ່ງຊາດ ໂດຍການເປັນປະທານຂອງທ່ານ ປອ. ຢ່າງກູ້ ຢ່າງລືໄຊ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ; ມີທ່ານຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ຄະນະກົມ, ຄະນະພະແນກ, ນັກວິທະຍາກອນ, ພະນັກງານ-ລັດຖະກອນພາຍໃນສະຖາບັນຄົ້ນຄວ້ານິຕິກຳສະພາແຫ່ງຊາດ ແລະ ເຂດເລືອກຕັ້ງທົ່ວປະເທດ ເຂົ້າຮ່ວມຢ່າງພ້ອມພຽງ.

ຈຸດປະສົງຂອງການຈັດເຝິກອົບຮົມຄັ້ງນີ້ ກໍເພື່ອຍົກລະດັບຄວາມຮູ້, ຄວາມສາມາດ ແລະ ສ້າງຄວາມເຂັ້ມແຂງ ໃຫ້ພະນັກງານ ມີຄວາມເຂັ້ມແຂງໃນການເຄື່ອນໄຫວວຽກງານດ້ານວິຊາການ ຄວາມຮັບຜິດຊອບໃຫ້ມີປະສິດທິຜົນຫຼາຍຂຶ້ນ ທັງເພື່ອຍົກສູງຄຸນນະພາບດ້ານວິຊາສະເພາະໃຫ້ແກ່ພະນັກງານ ໃນການເປັນເສນາທິການນັບມື້ນັບເຂັ້ມແຂງຂຶ້ນເທື່ອລະກ້າວ.

ໂອກາດດັ່ງກ່າວ ຜູ້ເຂົ້າຮ່ວມກອງປະຊຸມ ໄດ້ຮັບຟັງ ແລະ ຮຽນຮູ້ກ່ຽວກັບ 10 ຫົວຂໍ້ ຄື: ການສະເໜີຫົວຂໍ້ຄົ້ນຄວ້າວິທະຍາສາດ; ກຳນົດໝາຍການນຳໃຊ້ງົບປະມານກອງທຶນພັດທະນາວິທະຍາສາດ ແລະ ເຕັກໂນໂລຊີ; ວິທີວິທະຍາໃນການເຮັດບົດຄົ້ນຄວ້າວິທະຍາສາດທາງສັງຄົມ; ຄວາມຮູ້ພື້ນຖານໃນການຄົ້ນຄວ້າຮ່າງກົດໝາຍ; ນຳສະເໜີພາບລວມກ່ຽວກັບລະບົບ G-Web Platform ແລະ ການອອກແບບ ແລະ ການຕິດຕັ້ງລະບົບເວັບເຊີເວີ ຈຳລອງ (Web Server), ເຊີເວີຖານຂໍ້ມູນ (Database Server) ໃນເຄື່ອງຈຳລອງ (Local Machine) ແລະ ເຄື່ອງເຊີເວີ ໃນລະບົບ Cloud; ການສ້າງການອອກແບບໂຄງສ້າງ, ສ້າງເມນູຫຼັກ, ການສ້າງເມນູຍ່ອຍ ແລະ ບັນຈຸເນື້ອໃນ G-Web; ການບຳລຸງຮັກສາ ແລະ ການສຳເນົາຂໍ້ມູນ G-Web; ພື້ນຖານການຫັນຫ້ອງສະໝຸດເປັນທັນສະໄໝ; ການຮ່ວມມືທາງດ້ານວິຊາການລະຫວ່າງຫ້ອງສະໝຸດໃນລາວ ແລະ ການສ້າງປື້ມຫຼັກສູດ, ຄູ່ມືເຝິກອົບຮົມ; ຈາກນັ້ນ, ບັນດາຜູ້ເຂົ້າຮ່ວມໄດ້ປະກອບຄຳຄິດຄຳເຫັນ ແລະ ສົນທະນາແລກປ່ຽນຮ່ວມກັນ.

ກອງປະຊຸມດັ່ງກ່າວ, ຈະໄດ້ດຳເນີນໄປຈົນຮອດວັນທີ 16 ມີນາ 2023 ຈຶ່ງຈະສຳເລັດ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)