(ສພຊ) ວັນທີ 10 ມີນາຜ່ານມາ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ແລະ ສະມາຊິກສະພາປະຊາຊົນນະຄອນຫຼວງວຽງຈັນ ນຳໂດຍທ່ານ ຮສ. ປອ. ລິນຄຳ ດວງສະຫວັນ ກຳ ມະການສຳຮອງສູນກາງພັກ, ກຳມະການຄະນະປະຈຳສະພາແຫ່ງຊາດ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ໄດ້ລົງພົບປະຢ້ຽມຢາມ ແລະ ເຜີຍແຜ່ຜົນສຳເລັດກອງປະຊຸມສະໄໝສາ ມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃຫ້ພະນັກງານ-ລັດຖະກອນຂອງ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ລວມຜູ້ເຂົ້າຮ່ວມທັງໝົດ 223 ຄົນ ຍິງ 112 ຄົນ.

ພາຍຫຼັງຮັບຟັງການລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານຂອງ ກະ ຊວງຊັບພະຍາກອນທຳມະຊາດ ແລະ ສິ່ງແວດລ້ອມແລ້ວ, ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນຫຼວງວຽງຈັນ ໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ II. ຈາກນັ້ນ, ກອງປະຊຸມ ໄດ້ເປີດໂອກາດ ໃຫ້ພະນັກງານ-ລັດຖະກອນຂອງກະຊວງ ໄດ້ມີການປະກອບຄຳເຫັນ ແລະ ຄຳຊັກຖາມ ພ້ອມທັງຄຳສະເໜີເພື່ອໃຫ້ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນຫຼວງວຽງຈັນ ນຳໄປສະເໜີ ໃຫ້ພາກສ່ວນກ່ຽວຂ້ອງ ພິຈາລະນາ ເປັນຕົ້ນ ການສ້າງແຜນແມ່ບົດຈັດສັນນຳໃຊ້ທີ່ດິນ ຂັ້ນເມືອງ ແລະ ແຂວງ ເພື່ອເປັນພື້ນຖານໃນການອອກໃບຕາດິນ, ການແກ້ໄຂຂໍ້ຂັດແຍ່ງທີ່ດິນ ໃນໄລຍະຜ່ານມາ, ການປົກປັກຮັກສາສິ່ງແວດລ້ອມ ເຊັ່ນ: ຕົ້ນໄມ້ໃຫຍ່ທີ່ໃຫ້ຄວາມຮົ່ມເຢັນຕາມເສັ້ນທາງ ໃນນະຄອນຫຼວງວຽງຈັນ, ການແກ້ໄຂບັນຫາຄ່າຄອງຊີບ ໂດຍສະເພາະລາຄາສິນຄ້າອຸປະໂພກ-ບໍລິໂພກທີ່ຈຳເປັນ ແລະ ບັນຫາອື່ນໆ.

ຈາກນັ້ນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນນະຄອນຫຼວງວຽງຈັນ ກໍໄດ້ໃຫ້ຄວາມກະຈ່າງແຈ້ງຕໍ່ບາງບັນຫາ ແລະ ຈະນຳສະເໜີບັນຫາທີ່ຕິດພັນກັບພາກສ່ວນອື່ນ ເພື່ອພິຈາລະນາແກ້ໄຂ. ພ້ອມດຽວກັນນັ້ນ ທ່ານ ປະທານກອງປະຊຸມ ຍັງໄດ້ເນັ້ນຕື່ມກ່ຽວກັບການຈັດຕັ້ງປະຕິບັດຕາມຂອບສິດ ແລະ ໜ້າທີ່ຂອງກະຊວງ ໂດຍສະເພາະ ວຽກທີ່ຕິດພັນກັບການອອກໃບຕາດິນ ທີ່ຍັງເປັນວຽກທີ່ທ້າທາຍຂອງກະຊວງ ເຮັດແນວໃດໃຫ້ ວຽກງານດັ່ງກ່າວ ສາມາດບັນລຸຕາມແຜນປີ ທີ່ໄດ້ກຳນົດໄວ້ ໃນມະຕິຂອງກອງປະຊຸມສະພາແຫ່ງຊາດ.