ໃນຕອນບ່າຍ ວັນທີ 6 ມີນາ 2023 ນີ້, ຢູ່ທີ່ສະໂມສອນ ສະພາປະຊາຊົນແຂວງ ເຊກອງ ໜ່ວຍສະຫະພັນແມ່ຍິງ ສະພາປະຊາຊົນແຂວງ (ສພຂ) ເຊກອງ ໄດ້ຈັດພິທີຫວນຄືນປະຫວັດການກຳເນີດວັນແມ່ຍິງສາກົນ ຄົບຮອບ 113 ປີ​ ( 08 ມີນາ 1910 – 08 ມີນາ 2023 ) ພາຍໃຕ້ຫົວຂໍ້: “ການນໍາໃຊ້ດີຈີຕອນ ສໍາລັບທຸກຄົນ, ການນໍາໃຊ້ນະວັດຕະກໍາໃໝ່ ແລະ ເຕັກໂນໂລຊີ ເພື່ອຄວາມສະເໝີພາບຍິງ-ຊາຍ” ໂດຍເປັນກຽດເຂົ້າຮ່ວມເປັນປະທານ ຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ມີບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ຄະນະໜ່ວຍ, ຫົວໜ້າຈຸ-ຮອງຈຸ, ສະມາຊິກພາຍໃນໜ່ວຍສະຫະພັນແມ່ຍິງ ສະພາປະຊາຊົນແຂວງ ເຊກອງ ແລະ ແຂກຖືກເຊີນ ເຂົ້າຮ່ວມ.                   ໃນພິທີ ທ່ານ ນາງ ບຸນຮູ້ ດວງບຸບຜາ ປະທານໜ່ວຍສະຫະພັນແມ່ຍິງ ສະພາປະຊາຊົນແຂວງ ເຊກອງ ໄດ້ຍົກໃຫ້ເຫັນຄວາມເປັນມາ ແລະ ການກຳເນີດເກີດຂຶ້ນຂອງວັນແມ່ຍິງສາກົນ ໃນທ່າມກາງເສດຖະກິດຂອງພວກສັກດີນາ ແລະ ນາຍທຶນພວມຂະຫຍາຍຕົວ ມັນໄດ້ສ້າງຄວາມຮັ່ງມີໃຫ້ແກ່ນາຍທຶນ ແຕ່ກົງກັນຂ້າມຍິ່ງເພີ່ມຄວາມທຸກຍາກໃຫ້ແກ່ຊາວຜູ້ອອກແຮງງານ ໂດຍສະເພາະກໍາມະກອນແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງແຕ່ໄດ້ຄ່າແຮງງານຕໍ່າ, ບໍ່ມີການຮັບປະກັນສຸຂະພາບຂອງແມ່ຍິງ ແລະ ເດັກນ້ອຍ, ຖືກດູໝິ່ນປະໝາດຖືແມ່ຍິງເປັນສິນຄ້າເຄື່ອງຫຼິ້ນ, ຂົ່ມຂືນທຳສຳເລົາ ແລະ ໄລ່ອອກຈາກວຽກ ໃນເວລາຖືພາ, ເກີດລູກ ຫຼື ເວລາເຈັບເປັນບໍ່ໄດ້ຮັບຄວາມເປັນທໍາ, ຕໍ່ໜ້າສະພາບການດັ່ງກ່າວກຳມະກອນແມ່ຍິງຮູ້ສຶກຄຽດແຄ້ນ ຈຶ່ງໄດ້ສາມັກຄີກັນລຸກຂຶ້ນຕໍ່ສູ້ທວງໃຫ້ນາຍທຶນ, ເຈົ້າຂອງໂຮງຈັກ – ໂຮງງານແກ້ໄຂຊີວິດການເປັນຢູ່ໃຫ້ເຂົາເຈົ້າ, ວັນທີ 8 ມີນາ 1899 ກຳມະກອນແມ່ຍິງຢູ່ໂຮງງານຕັດຫຍິບ – ຕໍ່າແຜ່ນ ທີ່ເມືອງ ນິວຢອກ ສະຫະລັດອາເມຣິກາ ໄດ້ໂຮມຊຸມນຸມປະທ້ວງ ແລະ ຄັດຄ້ານຕໍ່ການໃຫ້ຄ່າແຮງງານຕໍ່າ ແຕ່ຖືກຕຳຫຼວດເຂົ້າສະຫຼາຍ ແລະ ຈັບກຸມ, ຮອດວັນທີ 8 ມີນາ 1908 ແມ່ຍິງຈໍານວນ 15.000 ຄົນ ໄດ້ເດີນຂະບວນປະທ້ວງຢູ່ ເມືອງນິວຢອກອີກຄັ້ງ ເພື່ອໃຫ້ພວກນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດເຊົາການກົດຂີ່ຂູດຮີດແຮງງານເດັກ ແລະ ທວງໃຫ້ແມ່ຍິງມີສິດອອກສຽງ ໃນການເລືອກຕັ້ງ – ຮັບສະໝັກເລືອກຕັ້ງ, ແລະ ມີສິດເທົ່າທຽມກັບຜູ້ຊາຍ. ຈົນມາຮອດປີ 1910 ການຕໍ່ສູ້ຂອງແມ່ຍິງໄດ້ແຜ່ຂະຫຍາຍອອກໄປສູ່ປະເທດນາຍທຶນຢູ່ທະວິບເອີຣົບ ແລະ ໄດ້ມີກອງປະຊຸມສາກົນກ່ຽວກັບບັນຫາແມ່ຍິງຄັ້ງທຳອິດຢູ່ໂກເປນຮາກ ປະເທດແດນມາກ, ມີ 17 ປະເທດເຂົ້າຮ່ວມ ແລະ ໄດ້ຕົກລົງຮັບຮອງເອົາວັນທີ 8 ມີນາ ເປັນວັນແມ່ຍິງສາກົນ.                      ວັນທີ 8 ມີນາ ແມ່ນເຫດການທາງເມືອງ ທີ່ສໍາຄັນ, ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເຫມີພາບ ປະຊາທິປະໄຕ ຄືກັນກັບຜູ້ຊາຍທວງໃຫ້ພວກນາຍທຶນແກ້ໄຂຊີວິດການເປັນຢູ່ພາຍໃຕ້ຄໍາຂວັນ: ” ຜູ້ຫນຶ່ງ ເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍ ເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ, ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ “.                                                                                                                                                                                       ທັງນີ້, ກໍເພື່ອເຮັດໃຫ້ເອື້ອຍນ້ອງສະຫະພັນແມ່ຍິງ ພາຍໃນໜ່ວຍສະຫະພັນແມ່ຍິງ ສະພາປະຊາຊົນແຂວງ ເຊກອງ ໄດ້ຮັບຮູ້ ແລະ ເຂົ້າໃຈຄວາມໝາຍ, ຄວາມສຳຄັນຂອງວັນດັ່ງກ່າວ ແລະ ນຳເອົາເນື້ອໃນຈິດໃຈຂອງການປາຖະກະຖາຄັ້ງນີ້ ໄປໝູນໃຊ້ເຂົ້າໃນໜ້າທີ່ວຽກງານຕົວຈິງຂອງຕົນໃຫ້ມີບາດກ້າວຫັນປ່ຽນຢ່າງຕັ້ງໜ້າ.

#ໂດຍ: ນາລີວັນ.