(ສພຊ) ໃນລະຫວ່າງວັນທີ 1-2 ມີນາ 2023, ທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດກົດໝາຍ ແລະ ເຜີຍແຜ່ກົດໝາຍ ແລະ ນິຕິກຳ ຢູ່ແຂວງຊຽງຂວາງ ໂດຍມີທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ຮ່ວມກັບທ່ານ ບຸນໂຮມ ເທດທານີ ປະທານສະພາປະຊາຊົນແຂວງຊຽງຂວາງ ໄດ້ເຂົ້າພົບປະກັບທ່ານ ບຸນຈັນ ສີວົງພັນ ເຈົ້າແຂວງໆຊຽງຂວາງ ເພື່ອແຈ້ງຈຸດປະສົງຂອງການມາເຄື່ອນໄຫວໃນຄັ້ງນີ້ ແມ່ນເພື່ອເປັນການຕິດຕາມກວດກາການຈັດຕັ້ງປະຕິບັດກົດໝາຍຂອງພະແນກຂັ້ນແຂວງ ພາຍຫຼັງກົດໝາຍໄດ້ຮັບການປະກາດໃຊ້ແລ້ວ ແລະ ການເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍ ຂອງສະພາແຫ່ງຊາດ ແນໃສ່ສ້າງສະຕິເຄົາລົບ, ປະຕິບັດ ລັດຖະທຳມະນູນ ແລະ ກົດໝາຍ ໃນສັງຄົມໃຫ້ນັບມື້ສູງຂຶ້ນ, ປະກອບສ່ວນເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ສັງລວມເປັນຂໍ້ມູນລາຍງານໃຫ້ຄະນະປະຈຳສະພາແຫ່ງຊາດ; ຈາກນັ້ນ, ທ່ານເຈົ້າແຂວງກໍໄດ້ລາຍງານເຖິງສະພາບລວມໂດຍຫຍໍ້ຂອງແຂວງຊຽງຂວາງ.

ໃນການເຄື່ອນໄຫວເຮັດວຽກຄັ້ງນີ້, ທີ່ສະພາປະຊາຊົນແຂວງຊຽງຂວາງ ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ປະຊຸມຮ່ວມກັບບັນດາພະແນກການອ້ອມຂ້າງຂອງແຂວງ ເຊິ່ງໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດກົດໝາຍວ່າດ້ວຍປ່າໄມ້, ການຈັດຕັ້ງປະຕິບັດກົດໝາຍວ່າດ້ວຍການຈັດສັນພູມລຳເນົາ ແລະ ອາຊີບ ຈາກພະແນກກະສິກຳ ແລະ ປ່າໄມ້ແຂວງ; ການຈັດຕັ້ງປະຕິບັດກົດໝາຍວ່າດ້ວຍແຮ່ທາດ ຈາກພະແນກພະລັງງານ ແລະ ບໍ່ແຮ່ແຂວງ; ລາຍງານການຈັດຕັ້ງປະຕິບັດກົດໝາຍວ່າດ້ວຍການລົງທຶນຂອງລັດຈາກພະແນກແຜນການ ແລະ ການລົງທຶນແຂວງ; ລາຍງານການໂຄສະນາເຜີຍແຜ່ກົດໝາຍ ແລະ ນິຕິກຳໃຕ້ກົດໝາຍ ຈາກພະແນກຍຸຕິທຳແຂວງ; ຈາກນັ້ນ, ປະທານກອງປະຊຸມ ໄດ້ເຈາະຈີ້ມບາງບັນຫາໃນການຈັດຕັ້ງປະຕິບັດກົດໝາຍ ແລະ ບັນດາຜູ້ເຂົ້າຮ່ວມໄດ້ມີການສົນທະນາແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ຢ່າງມີຈຸດສຸມ ແລະ ກົງໄປກົງມາ.

ພ້ອມນັ້ນ, ທ່ານ ອຳໄພ ຈິດມານົນ ໄດ້ເຜີຍແຜ່ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນແຂວງ ແລະ ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຕີຄວາມໝາຍ ແລະ ອະທິບາຍກົດໝາຍ; ຫຼັງຈາກນັ້ນ, ກອງປະຊຸມ ກໍໄດ້ມີການສົນທະນາແລກປ່ຽນຄຳຄິດຄຳເຫັນກັບບັນດາຜູ້ເຂົ້າຮ່ວມຕື່ມອີກ.

ໂອກາດດັ່ງກ່າວ, ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄໍາເຫັນຕໍ່ກອງປະຊຸມວ່າ: ກອງປະຊຸມຄັ້ງນີ້ ໄດ້ດຳເນີນດ້ວຍບັນຍາກາດທີ່ຟົດຟື້ນ, ສ້າງສັນ ແລະ ເຕັມໄປດ້ວຍເນື້ອໃນສຳຄັນ, ເລິກເຊິ່ງຫຼາຍດ້ານ ເຮັດໃຫ້ກອງປະຊຸມໄດ້ບັນລຸຜົນສຳເລັດຕາມຈຸດປະສົງທີ່ໄດ້ວາງໄວ້ຢ່າງຈົບງາມ; ການຄົ້ນຄວ້າ, ປະກອບຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ຂອງບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້ ເຫັນວ່າມີເຫດມີຜົນ, ພາວະວິໄສ ແລະ ແທດເໝາະກັບສະພາບການຕົວຈິງໃນການຂະຫຍາຍຕົວຂອງສະພາບເສດຖະກິດ-ສັງຄົມໃນປັດຈຸບັນ ສັງລວມແລ້ວເຫັນວ່າ ບັນດາທ່ານເຫັນໄດ້ເຖິງຄວາມສໍາຄັນ ຂອງວຽກງານຕິດຕາມກວດກາ ແລະ ໂຄສະນາເຜີຍແຜ່ກົດໝາຍ ເຊິ່ງຕ້ອງໄດ້ພ້ອມກັນຕັ້ງໜ້າຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ ເພື່ອຮັບປະກັນໃຫ້ບັນດາຂະແໜງການຕ່າງໆ ຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກໍາໃຕ້ກົດໝາຍ ໃຫ້ມີຄວາມເຂັ້ມງວດສັກສິດ; ກອງປະຊຸມ ໄດ້ຮັບຟັງຜູ້ຕາງໜ້າກຳມາທິການກົດໝາຍ ແລະ ຕາງໜ້າຈາກ 4 ພະແນກການ ລາຍງານເນື້ອໃນທີ່ຕິດພັນກັບວຽກງານຕິດຕາມກວດກາການຈັດຕັ້ງປະຕິບັດກົດໝາຍ, ເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍ ຂອງສະພາແຫ່ງຊາດໃນຄັ້ງນີ້ ເຊິ່ງໄດ້ຍົກໃຫ້ເຫັນເຖິງຜົນສຳເລັດ ແລະ ທິດທາງຂອງວຽກງານດັ່ງກ່າວໃນຕໍ່ໜ້າ ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ ມີຄວາມເຂັ້ມງວດ, ສັກສິດກວ່າເກົ່າ, ພ້ອມກັນນີ້, ກອງປະຊຸມ ໄດ້ຮັບຟັງການປະກອບຄຳເຫັນທີ່ເປັນປະໂຫຍດຫຼາຍໃຫ້ແກ່ກອງປະຊຸມຄັ້ງນີ້.

ໃນໂອກາດມາເຄື່ອນໄຫວຄັ້ງນີ້, ຄະນະ ຍັງໄດ້ຢ້ຽມຢາມໂຄງການຂຸດຄົ້ນແຮ່ຫາຍາກ ຂອງບໍລິສັດ ພົງຊັບທະວີ ແລະ ໂຄງການຂອງບໍລິສັດ ກວາງຈຽນຊິນ ແສງສະຫວ່າງ ພັດທະນາແຮ່ຫາຍາກ ຈຳກັດ ຢູ່ເມືອງຄູນ ຕື່ມອີກ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)