(ສພຊ) ໃນຕອນເຊົ້າວັນທີ 27 ກຸມພາ 2023 ທີ່ສະພາແຫ່ງຊາດ, ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບ ແລະ ພົບປະເຮັດວຽກກັບທ່ານ Oliver Cadic ຮອງປະທານກໍາມາທິການການຕ່າງປະເທດ, ຄະນະກໍາມະການປ້ອງກັນຊາດ-ກອງທັບ, ສະພາສູງຝຣັ່ງ ແລະ ຄະນະມິດຕະພາບ ຝຣັ່ງ-ລາວ ແລະ ກໍາປູເຈຍ ສະພາສູງຝຣັ່ງ ເນື່ອງໃນໂອກາດທີ່ທ່ານ ມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້.

ໃນໂອກາດດັ່ງກ່າວ ທ່ານ ສັນຍາ ປຣະເສີດ ໄດ້ສະແດງຄວາມຕ້ອນຮັບທ່ານ Oliver Cadic ພ້ອມດ້ວຍຄະນະຢ່າງອົບອຸ່ນ ແລະ ມີຄໍາເຫັນ ວ່າ: ການພົບປະປຶກສາຫາລືໃນຄັ້ງນີ້ ຈະເປັນການປະກອບສ່ວນອັນສໍາຄັນໃຫ້ແກ່ການເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດລາວ ແລະ ຝຣັ່ງ ເວົ້າລວມ, ເວົ້າສະເພາະ ລະຫວ່າງ ສອງອົງການນິຕິບັນຍັດ ກໍຄື ສອງກໍາມາທິການການຕ່າງປະເທດ ແລະ ສອງຄະນະມິດຕະພາບລັດຖະສະພາລາວ-ຝຣັ່ງ, ຝຣັ່ງ-ລາວ ໃຫ້ສືບຕໍ່ເສີມຂະຫຍາຍໃຫ້ເຂັ້ມແຂງ ແລະ ແຕກດອກອອກຜົນຍິ່ງໆຂຶ້ນ; ສອງຝ່າຍເຫັນດີເປັນເອກະພາບ ຈະສືບຕໍ່ຊຸກຍູ້ເສີມຂະຫຍາຍການພົວພັນຮ່ວມມືນໍາກັນໃຫ້ເປັນປົກກະຕິ. ພ້ອມນີ້, ຈະສືບຕໍ່ສະໜັບສະໜູນກັນໃນເວທີພາກພື້ນ ແລະ ສາກົນ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດໃນຕໍ່ໜ້າ. ທ້າຍນີ້, ທ່ານປະທານກໍາມາທິການການຕ່າງປະເທດລາວ ໄດ້ອວຍພອນໄຊອັນປະເສີດມາຍັງທ່ານ Oliver Cadic ແລະ ຄະນະມິດຕະພາບລັດຖະສະພາຝຣັ່ງ-ລາວ ຈົ່ງມີພະລານາໄມສົມບູນ, ມີຄວາມຜາສຸກ ແລະ ມີຜົນສໍາເລັດໃນໜ້າທີ່ວຽກງານອັນມີກຽດສະຫງ່າ, ມີຜົນສຳເລັດໃນການຢ້ຽມຢາມ ແລະ ເຮັດວຽກ ຢູ່ ສປປລາວ ໃນຄັ້ງນີ້; ຂໍອວຍພອນແດ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ສປປ ລາວ ແລະ ຝຣັ່ງ ກໍຄື ລະຫວ່າງ ສອງອົງການນິຕິບັນຍັດ ຈົ່ງນັບມື້ ໄດ້ຮັບການພັດທະນາຍິ່ງໆຂຶ້ນ.

ຈາກນັ້ນ, ທ່ານ Oliver Cadic ໄດ້ກ່າວສະແດງຄວາມຂອບໃຈ ຕໍ່ທ່ານ ປະທານກຳມາທິການການຕ່າງປະເທດ ສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ທີ່ໄດ້ສະຫຼະເວລາອັນມີຄ່າ ຕ້ອນຮັບຄະນະຢ່າງອົບອຸ່ນ ແລະ ຍັງໄດ້ທ່ຽວຊົມຫ້ອງປະຊຸມໃຫຍ່ ຂອງສະພາແຫ່ງຊາດລາວ ຕື່ມອີກ.