(ສພຊ) ເພື່ອຍົກລະດັບຄວາມຮູ້ ຄວາມສາມາດໃຫ້ແກ່ພະນັກງານ-ລັດຖະກອນ ໃນການເປັນເສນາທິການໃຫ້ແກ່ ຄະນະປະຈຳສະພາແຫ່ງຊາດ ກໍຄືການເປັນເສນາທິການ ໃຫ້ແກ່ກຳມາທິການວັດທະນະທໍາ-ສັງຄົມ ສະພາແຫ່ງຊາດ. ໃນລະຫວ່າງວັນທີ 27-28 ກຸມພາ 2023 ທີ່ນະຄອນຫຼວງວຽງຈັນ, ກຳມາທິການວັດທະນະທໍາ-ສັງຄົມ ໄດ້ຈັດກອງປະຊຸມເຝິກອົບຮົມສ້າງຄວາມເຂັ້ມແຂງ ຍົກລະດັບຄວາມຮູ້ ດ້ານວຽກງານພັກ-ພະນັກງານ ການຄຸ້ມຄອງຂອງສະພາແຫ່ງຊາດ, ລະບົບເອກະສານຜ່ານປະຕູດຽວ ໂດຍການເປັນປະທານຂອງທ່ານ ນາງ ມະນີວັນ ເຢຍປາວເຮີ ຮອງປະທານກໍາມາທິການວັດທະນະທໍາ-ສັງຄົມ, ເຂົ້າຮ່ວມມີບັນດາທ່ານ ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ພ້ອມດ້ວຍວິຊາການ ພາຍໃນກຳມາທິການດັ່ງກ່າວ.

ໃນໂອກາດນີ້ ໄດ້ຮັບຟັງ ມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກໍາມາທິການວັດທະນະທໍາ-ສັງຄົມ ແລະ ບົດຮຽນໃນການຕິດຕາມກວດກາ ເຊິ່ງເປັນຫົວຂໍ້ສະເພາະ ນໍາສະເໜີໂດຍທ່ານປະທານກອງປະຊຸມ; ພ້ອມນັ້ນ ຍັງໄດ້ຮັບຟັງ ຂໍ້ຕົກລົງ ຂອງຄະນະເລຂາທິການ ສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມສັງຄົມ ຈາກທ່ານ ເອລາວັນ ພັນທະວົງ ຫົວໜ້າກົມສັງຄົມ; ຮັບຟັງ ຂໍ້ຕົກລົງ ຂອງຄະນະເລຂາທິການ ສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມວັດທະນະທໍາ ຈາກທ່ານ ສົມເພັດ ຈິດຕະວັນ ຫົວໜ້າກົມວັດທະນະທໍາ; ການບໍລິຫານເອກະສານຂາເຂົ້າ-ຂາອອກ ຂອງພັກ-ລັດ ແລະ ການກໍານົດຕໍາແໜ່ງງານ ຂອງກົມສັງຄົມ ແລະ ກົມວັດທະນະທໍາ ໂດຍຄະນະກົມກ່ຽວຂ້ອງນໍາສະເໜີເອກະສານ ດັ່ງກ່າວ. ຈາກນັ້ນ, ຜູ້ເຂົ້າຮ່ວມ ໄດ້ພ້ອມກັນປະກອບຄຳຄິດຄຳເຫັນຢ່າງສ້າງສັນ, ມີຈຸດສຸມ ແລະ ກົງໄປກົງມາ ພ້ອມທັງສົນທະນາແລກປ່ຽນບົດຮຽນ ແລະ ປະສົບການໃນການຈັດຕັ້ງປະຕິບັດວຽກງານດັ່ງກ່າວ.

ໃນໂອກາດດັ່ງກ່າວ ທ່ານ ນາງ ມະນີວັນ ເຢຍປາວເຮີ ໄດ້ກ່າວເປີດກອງປະຊຸມວ່າ: ກອງປະຊຸມໃນຄັ້ງນີ້ ແມ່ນກອງປະຊຸມເຝິກອົບຮົມສ້າງຄວາມເຂັ້ມແຂງຍົກລະດັບໃຫ້ແກ່ພະນັກງານ-ລັດຖະກອນຂອງກຳມາທິການວັດທະນະທຳ-ສັງຄົມ ປະຈຳປີ 2022 ເຊິ່ງເປັນ ຊຸດທີ 1 ພາຍໃຕ້ຫົວຂໍ້: ເຊື່ອມຊຶມບັນດານິຕິກໍາຂອງສະພາແຫ່ງຊາດ. ຕໍ່ກັບບັນດານິຕິກໍາທີ່ນໍາມາເຊື່ອມຊຶມຄັ້ງນີ້ ເຫັນວ່າມີຄວາມຈໍາເປັນ ແລະ ມີຄວາມສໍາຄັນຫຼາຍຕໍ່ພະນັກງານ-ລັດຖະກອນຂອງ ກໍາມາທິການວັດທະນະທໍາ-ສັງຄົມ ເພື່ອໃຫ້ສາມາດກໍາແໜ້ນ ແລ້ວນໍາໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງແຕ່ລະທ່ານໃນຂອບເຂດຄວາມຮັບຜິດຊອບຂອງຕົນ. ສະນັ້ນ, ຈຶ່ງສະເໜີໃຫ້ນັກສໍາມະນາກອນ ຈົ່ງພ້ອມກັນເອົາໃຈໃສ່ຮັບຜິດຊອບໜ້າທີ່ການເມືອງຂອງຕົນ ໃນການຕັ້ງໃຈຮັບຟັງ ເພື່ອເຊື່ອມຊຶມ, ເອົາໃຈໃສ່ຄົ້ນຄວ້າ ແລະ ເສີມຂະຫຍາຍຫົວຄິດປະດິດສ້າງ, ສຸມສະຕິປັນຍາຂອງຕົນໃນການມີຄໍາເຫັນເຈາະຈີ້ມຕໍ່ບັນດາເນື້ອໃນຂອງກອງປະຊຸມໃນຄັ້ງນີ້ ໃຫ້ກວ້າງຂວາງ, ເລິກເຊິ່ງ, ມີລັກສະນະສ້າງສັນ ເຮັດໃຫ້ບົດຮຽນໃນກອງປະຊຸມໃນຄັ້ງນີ້ ສາມາດຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານຕົວຈິງ ຢ່າງມີປະສິດທິພາບ ແລະ ປະສິດທິຜົນ.

(ພາບ ແລະ ຂ່າວ: ນາງ ກົງໃຈ ແສງອໍາພັນ)