(ສພຊ) ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ ຮ່ວມກັບທ່ານ ເພັງນິລັນ ຄຳພັນເພັງ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາໂຄງການຍົກຍ້າຍບ້ານຈັດສັນກິ່ວງິ້ວ ເມືອງເງິນ ແຂວງໄຊຍະບູລີ ໃນວັນທີ 24 ກຸມພາ 2023.

ທ່ານ ສີທະນົນໄຊ ທອງເທພາ ຕາງໜ້າໃຫ້ແກ່ຄະນະຮັບຜິດຊອບຊີ້ນໍາການຍົກຍ້າຍ, ຈັດສັນບ້ານກິ່ວງິ້ວ ເມືອງເງິນ ແຂວງໄຊຍະບູລີ ໄດ້ລາຍງານໃຫ້ຮູ້ວ່າ: ບ້ານກິ່ວງິ້ວ ກ່ອນການຍົກຍ້າຍແມ່ນມີທັງໝົດ 85 ຄອບຄົວ, ມີພົນລະເມືອງທັງໝົດ 568 ຄົນ ຍິງ 268 ຄົນ. ແບ່ງເປັນ 6 ໜ່ວຍຄຸ້ມຄອງພົນລະເມືອງ; ອາຊີບຕົ້ນຕໍ ຂອງປະຊາຊົນແມ່ນຖືເອົາການປູກຝັງ-ລ້ຽງສັດ. ລວມຍອດລາຍຮັບພາຍໃນບ້ານທັງໝົດ 2,97 ຕື້ກີບ, ສະເລ່ຍໃສ່ຫົວຄົນໄດ້ 5,23 ລ້ານກີບ.

ໃນໄລຍະການກະກຽມ ແລະ ຍົກຍ້າຍ (2020-2021) ທົ່ວບ້ານມີທັງໝົດມີ 109 ຄອບຄົວ; ມີພົນລະເມືອງທັງໝົດ 629 ຄົນ, ຍິງ 299 ຄົນ, ແບ່ງອອກເປັນ 10 ໜ່ວຍຄຸ້ມຄອງພົນລະເມືອງ, ມີ 117 ຫຼັງຄາເຮືອນ ໃນນີ້: ບ້ານກິ່ວງິ້ວ 112 ຫຼັງ, ບ້ານນໍ້າເງິນ 1 ຫຼັງ, ບ້ານປາງບົງ 1 ຫຼັງ, ບ້ານບໍ່ຫຼວງ 1 ຫຼັງ, ບ້ານຂອນ 1 ຫຼັງ ແລະ ບ້ານຈໍາປາ (ເມືອງຫົງສາ) 1 ຫຼັງ ແລະ ພາຍຫຼັງສໍາເລັດການຍົກຍ້າຍ ໃນປັດຈຸບັນ ມີ 108 ຄອບຄົວ. ປະກອບມີ 2 ເຜົ່າໃຫຍ່ຄື: ເຜົ່າມົ້ງ 93 ຄອບຄົວ ແລະ ເຜົ່າກຶມມຸ 15 ຄອບຄົວ, ມີພົນລະເມືອງ 652 ຄົນ ຍິງ 314 ຄົນ, ແບ່ງອອກເປັນ 10 ໜ່ວຍຄຸ້ມຄອງພົນລະເມືອງ, ມີ 136 ຫຼັງຄາເຮືອນ. ອາຊີບສ່ວນໃຫຍ່ ຂອງປະຊາຊົນ ແມ່ນຖືເອົາການປູກຝັງ, ລ້ຽງສັດ, ການຜະລິດກະສິກໍາເປັນສິນຄ້າ, ການບໍລິການຄ້າ-ຂາຍ ແລະ ອື່ນໆ. ລວມຍອດລາຍຮັບພາຍໃນບ້ານທັງໝົດ 4,92 ຕື້ກີບ, ລະເລ່ຍໃສ່ຫົວຄົນໄດ້ 7,54 ລ້ານກີບ ຫຼື ເທົ່າກັບ 755 ໂດລາສະຫະລັດ (ລາຍຮັບທັງໝົດ ແມ່ນບໍ່ນັບເອົາລາຍຮັບຈາກຄ່າຊົດເຊີຍ).

ຈາກນັ້ນ, ທ່ານຮອງປະທານສະພາແຫ່ງຊາດ ຍັງເນັ້ນໃຫ້ສືບຕໍ່ການຟື້ນຟູອາຊີບໃຫ້ປະຊາຊົນພາຍໃນບ້ານ ຕາມຂໍ້ຕົກລົງ ຂອງທ່ານເຈົ້າແຂວງ; ສືບຕໍ່ກະກຽມອອກໃບຕາດິນປຸກສ້າງຖາວອນບ້ານຈັດສັນໃໝ່ ໃຫ້ແກ່ປະຊາຊົນໄດ້ຄຸ້ມຄອງ-ນໍາໃຊ້ ແລະ ສືບຕໍ່ຊີ້ນໍາການສໍາຫຼວດວັດແທກເນື້ອທີ່ດິນທໍາການຜະລິດໃຫ້ປະຊາຊົນໃຫ້ສໍາເລັດຕາມແຜນການ.

ຄະນະ ຍັງໄດ້ຢ້ຽມຢາມປ້ອມນໍ້າຂາມ-ນ້ຳຍາງ ຂຶ້ນກັບກອງຮ້ອຍ 153 ພ້ອມທັງໄດ້ມອບເຄື່ອງຈຳນວນໜຶ່ງ.