(ສພຊ) ໃນວັນທີ 22 ກຸມພາ 2023 ທີ່ສະພາແຫ່ງຊາດ ນະຄອນຫຼວງວຽງຈັນ, ນັກເຝິກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ XV ຂອງມະຫາວິທະຍາໄລແຫ່ງຊາດ ໄດ້ມາທັດສະນະສຶກສາທີ່ສະພາແຫ່ງຊາດ ຈຳນວນ 170 ສະຫາຍ.
ທັງນີ້, ເພື່ອເຮັດໃຫ້ສະມາຊິກພັກ-ພະນັກງານ ທີ່ເປັນເປົ້າໝາຍກໍ່ສ້າງ ເປັນພະນັກງານນຳພາຫຼັກແຫຼ່ງ ໄດ້ເຊື່ອມຊຶມແນວທາງປ່ຽນແປງໃໝ່, ກຳແໜ້ນແນວທາງການເມືອງຂອງພັກ ເຂົ້າໃຈຢ່າງເລິກເຊິ່ງກ່ຽວກັບພາລະບົດບາດຂອງສະພາແຫ່ງຊາດ.
ການທັດສະນະສຶກສາໃນຄັ້ງນີ້, ບັນດານັກເຝິກອົບຮົມ ໄດ້ຮັບຟັງການແນະນຳກ່ຽວກັບພາລະບົດບາດ, ສິດ ແລະ ໜ້າທີ່ ຂອງສະພາແຫ່ງຊາດໂດຍຫຍໍ້ ຈາກສະຫາຍ ອຳໄພ ຈິດມານົນ ກຳມະການຄະນະບໍລິຫານງານພັກສະພາແຫ່ງຊາດ, ຮອງປະທານກຳມາທິການກົດໝາຍ; ພ້ອມນັ້ນ, ກໍໄດ້ມີຖາມ-ຕອບ ແລະ ສົນທະນາແລກປ່ຽນໃນຈຸດທີ່ນັກເຝິກອົບຮົມໃຫ້ຄວາມສົນໃຈ; ຈາກນັ້ນ, ຍັງໄດ້ເຂົ້າຢ້ຽມຊົມຕຶກອາຄານຫໍສະພາແຫ່ງຊາດຕື່ມອີກ.
(ພາບ ແລະ ຂ່າວ: ນາງ ສຸພາວັນ ຫອມສະນິດ)