ໃນວັນທີ 18-19 ກຸມພາ 2023 ທີ່ຜ່ານມານີ້ ແຂວງສະຫວັນນະເຂດ ໄດ້ເຂົ້າຮ່ວມຄາຣາວານລົດທ່ອງທ່ຽວ  ເພື່ອການກຸສົນຕ້ານໄພໜາວ ເພື່ອໄປຊ່ວຍເຫຼືອປະຊາຊົນຢູ່ຈຸດສຸມລາດຫໍ້-ຜາບັງ ເມືອງເຊໂປນ ໃຫ້ກຽດເປີດຂະບວນ ໂດຍແມ່ນທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ທ່ານ ຄໍາຜັນ ຄູນສະຫວັນ ຮອງປະທານສະພາປະຊາຊົນແຂວງ, ທ່ານ ໂພສີສ້ອຍ      ກຸທິລາດ ຫົວໜ້າ ພະແນກ ຖວທ ແຂວງ, ທ່ານ ອະທິປັດ ໂຣດຈະນະໄພບູນ ກົງສຸນໃຫຍ່ແຫ່ງຣາຊະອານາຈັກໄທ ປະຈໍາແຂວງສະຫວັນນະເຂດ  ພ້ອມດ້ວຍພະແນກການ, ຫ້ອງການ,ອົງການຈັດຕັ້ງທາງພາກລັດ ແລະ ເອກະຊົນ, ສະໂມສອນສະຫວັນໂຟຣວິນດາຍສ, ນັກທຸລະກິດຕະຫຼອດເຖິງນັກທ່ອງທ່ຽວຈາກແຂວງສະຫວັນນະເຂດ ແລະ ແຂວງມຸກດາຫານ ພ້ອມນີ້ຍັງມີບັນດານັກທ່ອງທ່ຽວຈາກ10 ແຂວງ ແຫ່ງຣາຊະອານາຈັກໄທເຂົ້າຮ່ວມນໍາ.

ທ່ານ ໂພສີສ້ອຍ ກຸທິລາດ ຫົວໜ້າ ພະແນກ ຖວທ ແຂວງໄດ້ລາຍງານວ່າ: ໂຄງການຈັດຄາຣາວານລົດທ່ອງທ່ຽວ ເພື່ອການກຸສົນ ຮ່ວມໃຈຕ້ານໄພໜາວນີ້ ເປັນໂຄງການໜື່ງທີ່ມີຈຸດປະສົງ ແນໃສ່ ເພື່ອເປັນການຟື້ນຟູ ແລະ ສົ່ງເສີມການທ່ອງທ່ຽວທາງດ້ານທໍາມະຊາດ ຕິດພັນກັບວັດທະນະທໍາ ແລະ ວິຖີການດໍາລົງຊີວິດຂອງຊາວແຂວງສະຫວັນນະເຂດ, ເປັນການແບ່ງປັນຄວາມສຸກ ໃຫ້ແກ່ປະຊາຊົນ ແລະ ນັກຮຽນ ທີ່ຢູ່ໄກສອກຫຼີກ ພ້ອມທັງເປັນການກະຕຸ້ນເສດຖະກິດຂອງແຂວງສະຫວັນນະເຂດ ໃຫ້ກັບມາຄຶກຄື້ນອີກຄັ້ງ, ພາຍຫຼັງທີ່ຄວບຄຸມສະພາບຂອງພະຍາດໂຄວິດ 19 ໄດ້,ການຈັດກິດຈະກໍາປີນີ້ ແມ່ນໄດ້ຮ່ວມກັບ ສະໂມສອນ ສະຫວັນໂຟວິນດາຍ ພ້ອມບັນດາທ່ານການນໍາແຂວງ ຜູ້ປະກອບການທຸລະກິດກໍ່ຄືນັກທ່ອງທ່ຽວພາຍໃນແຂວງສະຫວັນນະເຂດເຂົ້າຮ່ວມ ຊຶ່ງມີຄາຣາວານລົດທ່ອງທ່ຽວຈໍານວນ 100 ກວ່າຄັນ ໃນນີ້ມີນັກທ່ອງທ່ຽວຈາກແຂວງມຸກດາຫານ ແລະ ບັນດາແຂວງຈາກ 10 ແຂວງແຫ່ງຣາຊະອານາຈັກໄທເຂົ້າຮ່ວມທັງໜົດ 90 ກວ່າຄັນ.

ໂອກາດນີ້ ທ່ານ ນາງຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ກໍໄດ້ກ່າວເປີດຂະບວນຄາຣາວານລົດທ່ອງທ່ຽວຢ່າງເປັນທາງການວ່າ:  ເພື່ອເປັນການຟື້ນຟູ ແລະ ສົ່ງເສີມການທ່ອງທ່ຽວຮ່ວມກັນລະຫວ່າງ 2 ປະເທດ ຄື: ສະຫວັນນະເຂດ – ບັນດາແຂວງທີ່ນອນໃນແລວທາງເສດຖະກິດຕາເວັນອອກ – ຕົກ, ພ້ອມທັງເປັນການຮ່ວມໃຈຕ້ານໄພໜາວ, ແບ່ງປັນ ແລະ ມອບຄວາມສຸກໃຫ້ພໍ່ແມ່ປະຊາຊົນ ແລະ ນ້ອງນັກຮຽນ ທີ່ຢູ່ເຂດຫ່າງໄກສອກຫຼີກ ຂອງເມືອງເຊໂປນ, ການເຂົ້າຮ່ວມຂອງບັນດາ ທ່ານໃນຄັ້ງນີ້ແມ່ນ ເປັນພະລັງແຮງອັນໜຶ່ງໃນການສົ່ງເສີມການທ່ອງທ່ຽວພາຍໃນແຂວງສະຫວັນນະເຂດ ທີ່ຖືກຜົນກະທົບຈາກການແຜ່ລະບາດພະຍາດໂຄວິດ 19 ພ້ອມທັງເປັນການປະກອບສ່ວນທາງດ້ານວັດຖຸ ແລະ ປັດໃຈ ຊຶ່ງມັນສື່ໃຫ້ເຫັນເຖິງຄວາມສາມັກຄີ ແລະ ຊ່ວຍເຫຼືອເຊີ່ງກັນ ແລະກັນໃນສັງຄົມ ກໍ່ໃຫ້ເກີດຜົນສໍາເລັດ ແລະ ບັນລຸເປົ້າໝາຍທີ່ກໍານົດໄວ້ ດ້ວຍບັນຍາກາດທີ່ຟົດຟື້ນ ແລະ ອົບອຸ່ນ.

ໃນການມອບເຄື່ອງຊ່ວຍເຫຼືອ ຄັ້ງນີ້ ຕາງໜ້າໃຫ້ຄະນະປະຈໍາສະພາປະຊາຊົນແຂວງ ໂດຍ ທ່ານ ຄຳຜັນ ຄູນສະຫວັນ ຮອງປະທານສະພາປະຊາຊົນແຂວງ ພ້ອມຄະນະທີ່ເດີນທາງໄປໃນບວນຊຶ່ງເຄື່ອງທີ່ນໍາມາຊ່ວຍເຫຼືອແມ່ນໄດ້ມາຈາກການປະກອບສ່ວນຂອງສັງຄົມ ທັງພາຍໃນແຂວງສະຫວັນນະເຂດ ແລະ 10 ແຂວງແຫ່ງຣາຊະອານາຈັກໄທ ຊຶ່ງມີເຄື່ອງນຸ່ງຫົ່ມ, ອາຫານແຫ້ງອຸປະກອນການຮຽນ – ການສອນ, ເຄື່ອງກິລາ ແລະ ເຄື່ອງໃຊ້ອື່ນໆໃນຄົວເຮືອນ ແລະ ເງິນສົດຈໍານວນໜຶ່ງ ລວມມູນຄ່າທັງໜົດ: 200 ກວ່າລ້ານ ກີບ ໃຫ້ 05 ບ້ານຄື: ບ້ານ ຜາບັງ, ບ້ານທ່າຜິງ, ບ້ານລະເວິນ, ບ້ານໃໝ່ທ່າແດງ, ບ້ານສະປ໊ອງ ແລະ 02 ໂຮງຮຽນ ເປົ້າໝາຍຄື: ມສ ຜາບັງ, ໂຮງຮຽນບ້ານໃໝ່ທ່າແດງ ແລະ ກໍາລັງປ້ອງກັນຊາດ-ປ້ອງກັນຄວາມສະຫງົບຢູ່ເຂດຈຸດສຸມດັ່ງກ່າວ.