1. ສະມາຊິກສະພາແຫ່ງຊາດ ກໍຄື ສະມາຊິກສະພາປະຊາຊົນແຂວງ ສ່ວນຫຼາຍກໍເປັນຜູ້ໃໝ່, ເພື່ອເຮັດໃຫ້ການເຄື່ອນໄຫວວຽກງານ ມີປະສິດທິພາບນັ້ນ ຈະຕ້ອງໄດ້ເພີ່ມທະວີການຄົ້ນຄວ້າ, ກໍາແໜ້ນ ແນວທາງນະໂຍບາຍຂອງພັກ, ເນື້ອໃນຂອງ ລັດຖະທໍາມະນູນ, ກົດໝາຍ, ບັນດານິຕິກໍາ ກ່ຽວກັບການຈັດຕັ້ງ ແລະ ການເຄື່ອນໄຫວ, ພາລະບົດບາດ, ສິດ ແລະ ໜ້າທີ່ຂອງຕົນ ເພື່ອເຮັດໃຫ້ການເຄື່ອນໄຫວວຽກງານໄດ້ຮັບຜົນສໍາເລັດ ແລະ ມີຄຸນນະພາບດີ.

             2. ເອົາໃຈໃສ່ການຄົ້ນຄວ້າສັບຊ້ອນບັນດາ ສະມາຊິກສະພາປະຊາຊົນແຂວງໄຊຍະບູລີ ຊຸດທີ II ເຂົ້າສັງກັດຢູ່ໃນກົງຈັກຕ່າງໆ ໃຫ້ມີຄວາມສອດຄ່ອງກັບ ວິຊາສະເພາະ, ຄວາມຮູ້ຄວາມສາມາດ; ປັບປຸງສັບຊ້ອນກົງຈັກການຈັດຕັ້ງທີ່ເປັນເສນາທິການ ທີ່ຮັບຜິດຊອບວຽກງານແຕ່ລະຂົງເຂດ ເພື່ອຮັບປະກັນການປະຕິບັດໜ້າທີ່ ເປັນເສນາທິການໃຫ້ແກ່ສະພາປະຊາຊົນແຂວງ ກໍຄືຄະນະສະມາຊິກສະພາແຫ່ງຊາດ ນັບມື້ມີປະສິດທິຜົນສູງຂຶ້ນ.

             3. ເອົາໃຈໃສ່ສ້າງກົນໄກການປະສານງານ ລະຫວ່າງ ຄະນະປະຈໍາສະພາປະຊາຊົນແຂວງ ກັບອໍານາດການປົກຄອງແຂວງ, ລະຫວ່າງ ຄະນະກໍາມະການ ກັບ ພະແນກການຂອງແຂວງ ຕາມຂອບເຂດວຽກງານຂອງແຕ່ລະພາກສ່ວນ ເພື່ອເຮັດໃຫ້ການເຄື່ອນໄຫວວຽກງານຂອງ ສະພາປະຊາຊົນແຂວງ ມີປະສິດທິພາບ ແລະ ທັນເວລາ.

             4. ເອົາໃຈໃສ່ການກະກຽມໃຫ້ແກ່ ການດໍາເນີນກອງປະຊຸມສະໄໝສາມັນຂອງ ສະພາປະຊາຊົນແຂວງ ໃຫ້ບັນລຸຜົນສໍາເລັດຕາມກົດໝາຍກໍານົດ ແລະ ມີປະສິດທິຜົນ, ຮັບປະກັນຜົນປະໂຫຍດລວມຂອງການສ້າງສາພັດທະນາເສດຖະກິດ-ສັງຄົມຂອງແຂວງ ແລະ ຜົນປະໂຫຍດຂອງປະຊາຊົນບັນດາເຜົ່າພາຍໃນແຂວງ; ເຂົ້າຮ່ວມແຕ່ຫົວທີ ຮ່ວມກັບຂະແໜງການກ່ຽວຂ້ອງຂອງແຂວງ ໃນການກະກຽມດ້ານເນື້ອໃນຂອງກອງປະຊຸມສະໄໝສາມັນແຕ່ລະຄັ້ງ, ນໍາເອົາຄໍາສະເໜີຂອງປະຊາຊົນ ໃນການສ້າງສາພັດທະນາຢູ່ບັນດາຮາກຖານ ຄົ້ນຄວ້າປະກອບເຂົ້າເນື້ອໃນເອກະສານຕ່າງໆຂອງກອງປະຊຸມ.

            5. ເພີ່ມທະວີຄວາມເອົາໃຈໃສ່ ໃນການປະສານສົມທົບວຽກງານຮ່ວມກັນ ລະຫວ່າງ ສະພາປະຊາຊົນແຂວງ ກັບຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ເພື່ອປຶກສາຫາລື, ສະຫຼຸບຕີລາຄາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຢູ່ພາຍໃນແຂວງ ໃນແຕ່ລະໄລຍະ ໃຫ້ມີຄວາມເປັນເອກະພາບ ແລະ ນໍາສະເໜີຕໍ່ກອງປະຊຸມສະໄໝສາມັນຂອງສະພາແຫ່ງຊາດ ແຕ່ລະຄັ້ງ ເພື່ອພິຈາລະນາ.

            6. ຍົກສູງປະສິດທິພາບການຕິດຕາມກວດກາ ການຈັດຕັ້ງປະຕິບັດມະຕິ ກອງປະຊຸມສະພາແຫ່ງຊາດ, ມະຕິກອງປະຊຸມສະພາປະຊາຊົນແຂວງໄຊຍະບູລີ ກ່ຽວກັບການຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໃຫ້ມີບາດກ້າວຫັນປ່ຽນຢ່າງຕັ້ງໜ້າ ແລະ ມີປະສິດທິຜົນນັບມື້ດີຂຶ້ນ ເພື່ອກະຕຸກຊຸກຍູ້ພາກສ່ວນກ່ຽວຂ້ອງ ໃນການຈັດຕັ້ງປະຕິບັດ.

            7. ເອົາໃຈໃສ່ການລົງພົບປະກັບ ພໍ່ແມ່ປະຊາຊົນບັນດາເຜົ່າ ຢູ່ພາຍໃນແຂວງ ໃຫ້ໄດ້ຢ່າງກວ້າງ ຂວາງ, ທົ່ວເຖິງ ເພື່ອເຜີຍແຜ່ການເຄື່ອນໄຫວວຽກງານຂອງ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ໃຫ້ຜູ້ມີສິດເລືອກຕັ້ງຮັບຊາບ; ເກັບກໍາຄໍາສະເໜີ, ຄວາມຂັດຂ້ອງໝອງໃຈຂອງປະຊາຊົນ ຕໍ່ການຄຸ້ມຄອງບໍລິຫານລັດ ເພື່ອເປັນຂໍ້ມູນໃນການປະສານສົມທົບກັບ ພາກສ່ວນກ່ຽວຂ້ອງພິຈາລະນາແກ້ໄຂ.

            8. ເອົາໃຈໃສ່ການຕ້ອນຮັບພໍ່ແມ່ປະຊາຊົນ ທີ່ມີຈຸດປະສົງເຂົ້າພົບ ສະມາຊິກສະພາແຫ່ງຊາດ ກໍຄືສະມາຊິກສະພາປະຊາຊົນແຂວງ ເພື່ອສະເໜີບັນຫາ, ຄວາມຂັດຂ້ອງໝອງໃຈຕ່າງໆ ແລະ ພາກສ່ວນກ່ຽວຂ້ອງຂອງສະພາປະຊາຊົນແຂວງ ກໍຕ້ອງເອົາໃຈໃສ່ຄົ້ນຄວ້າແກ້ໄຂ ໃຫ້ສອດຄ່ອງຕາມກົດໝາຍກໍານົດ.

            9. ໃນສະພາບການຂອງໂລກມີການຜັນແປໄປຢ່າງສະຫຼັບຊັບຊ້ອນ ໄດ້ສົ່ງຜົນກະທົບຕໍ່ສະພາບເສດຖະກິດ-ສັງຄົມຂອງປະເທດເຮົາໃນຫຼາຍດ້ານ, ສົ່ງຜົນກະທົບຕໍ່ຊີວິດການເປັນຢູ່ຂອງພະນັກງານ, ທະຫານ,​ ຕໍາຫຼວດ ກໍຄືປະຊາຊົນບັນດາເຜົ່າ. ສະນັ້ນ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ ຈະຕ້ອງໄດ້ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ ພະນັກງານ-ລັດຖະກອນພາຍໃນສະພາປະຊາຊົນແຂວງ ໃຫ້ມີຄວາມເຂົ້າໃຈ ແລະ ມີຄວາມອົດທົນຜ່ານຜ່າຄວາມຫຍຸ້ງຍາກຕ່າງໆ, ພ້ອມກັນຈັດຕັ້ງປະຕິບັດໜ້າທີ່ວຽກງານ ທີ່ໄດ້ຮັບການມອບໝາຍ ໃຫ້ມີຜົນສໍາເລັດ.