ຕອນບ່າຍຂອງວັນພຸດ, ວັນທີ 15 ກຸມພາ 2022, ຢູ່ທີ່ຫ້ອງປະຊຸມສະພາປະຊາຊົນແຂວງ ກໍາມະບານຮາກຖານສະພາປະຊາຊົນແຂວງ ໄດ້ເຜີຍແຜ່ມູນເຊື້ອ ວັນສ້າງຕັ້ງສະຫະພັນກຳມະບານລາວ ຄົບຮອບ 67 ປີ(1 ກຸມພາ 1956-1 ກຸມພາ 2023) ໂດຍການເປັນປະທານຂອງສະຫາຍ ນ. ວັນສີ ພວງມະໄລ ກໍາມະການປະຈໍາ-ຮອງເລຂາໜ່ວຍພັກສະພາປະຊາຊົນແຂວງ, ມີທ່ານ ຄໍາເຜີຍ ງອນວັນຄໍາ ຮອງປະທານສະພາປະຊາຊົນແຂວງ, ບັນດາທ່ານຄະນະກໍາມະບານ ແລະ ສະມາຊິກກໍາມະບານພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

  ສະຫາຍ ນ. ວັນສີ ພວງມະໄລ ກໍາມະການປະຈໍາ-ຮອງເລຂາໜ່ວຍພັກສະພາປະຊາຊົນແຂວງ, ໄດ້ເລົ່າໃຫ້ຮູ້ກ່ຽວກັບການກໍາເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງກຳມະບານລາວວ່າ: ໃນໄລຍະປີ 1956-1965 ພາຍຫຼັງສ້າງຕັ້ງພັກປະຊາຊົນປະຕິວັດລາວເກີອບ 1 ປີ, ມາເຖິງວັນທີ 1 ກຸມພາ 1956 ກົມການເມືອງສູນກາງພັກ ໄດ້ມີມະຕິຕົກລົງສ້າງຕັ້ງອົງການກຳມະບານລາວຂຶ້ນຢ່າງເປັນທາງການ ຢູ່ເຂດທີ່ໝັ້ນແຂວງຫົວພັນ, ໂດຍແມ່ນທ່ານ ສີສົມພອນ ລໍວັນໄຊ ເປັນຜູນໍາໂດຍກົງ ຈຸດປະສົ່ງແມ່ນສືບຕໍ່ຂົນຂວາຍເຕົ້າໂຮມກໍາມະກອນ, ຊາວຜູ້ອອກແຮງງານລາວບັນດາເຜົ່າໃຫ້ມີຄວາມຕື່ນຕົວປະຕິວັດ, ມີນໍ້າໃຈຮັກຊາດ, ມີທັດສະນະຊົນຊັ້ນກໍາມະກອນ, ມີຄວາມຕື່ນຕົວທາງດ້ານຊົນຊັ້ນຢ່າງຈະແຈ້ງ, ເສີມຂະຫຍາຍປະຊາທິປະໄຕ, ມີລະບຽບແບບແຜນ, ເປັນຜົນລະເມືອງດີຂອງຊາດ, ສົ່ງເສີມການມີວຽກເຮັດງານທໍາ ແລະ ເປັນຕົວແທນໃນການປົກປ້ອງສິດຜົນປະ ໂຫຍດອັນຊອບທໍາໃຫ້ແກ່ກໍາມະກອນ, ຊາວຜູ້ອອກແຮງງານລາວບັນດາເຜົ່າ ກາຍເປັນກໍາລັງແຮງເຂົ້າຮ່ວມຢ່າງຕັ້ງໜ້າ ແລະ ເປັນເຈົ້າການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາປະເທດຊາດ ຕາມເສັ້ນທາງກ້າວຂຶ້ນສັງຄົມນິຍົມ.

ປະຕິບັດຕາມວາລະ, ຍັງໄດ້ຮັບຟັງການຜ່ານຂໍ້ຕົກລົງຂອງເລຂາທິການສະພາປະຊາຊົນແຂວງ ວ່າ ດ້ວຍ ການແຕ່ງຕັ້ງກອງເລຂາຊ່ວຍວຽກຄະນະປະທານ ແລະ ຄະນະປະຈໍາສະພາປະຊາຊົນແຂວງ, ຜ່ານຂໍ້ຕົກລົງຂອງເລຂາທິການສະພາປະຊາຊົນແຂວງ ວ່າດ້ວຍ ການຍົກຍ້າຍ-ສັບຊ້ອນໜ້າທີ່ ຂອງພະນັກງານ-ລັດຖະກອນ ພາຍໃນສະພາປະຊາຊົນແຂວງ, ຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານ ປະຈໍາເດືອນ ທັນວາ ປີ 2022 -ມັງກອນ 2023 ແລະ ທິດທາງແຜນການປະຈໍາເດືອນ ກຸມພາ ປີ 2023 ຂອງກໍາມະບານຮາກຖານສະພາປະຊາຊົນແຂວງ ແລະ ໄດ້ຜ່ານກົດລະບຽບກອງທຶນພັດທະນາ 3 ອົງການຈັດຕັ້ງມະຫາຊົນ ຂອງສະພາປະຊາຊົນແຂວງອຸດົມໄຊ.

ຫລັງຈາກນັ້ນ, ບັນດາທ່ານສະມາຊິກກຳມະບານ ໄດ້ປະກອບຄໍາຄິດຄໍາເຫັນຢ່າງກົງໄປກົງມາ ຕໍ່ຮ່າງບົດສະຫຼຸບ ແລະ ກົດລະບຽບຂອງກອງທຶນພັດທະນາ 3 ອົງການຈັດຕັ້ງມະຫາຊົນ, ເພື່ອເຮັດໃຫ້ມີເນື້ອໃນຄົບຖ້ວມ, ສົມບູນ, ຖືກຕ້ອງຕາມແນວທາງນະໂຍບາຍຂອງພັກ, ກົດໝາຍຂອງລັດ ແລະ ຄວາມເປັນເອກະພາບໃນການຈັດຕັ້ງປະຕິບັດກອງທຶນພັດທະນາ 3 ອົງການຈັດຕັ້ງມະຫາຊົນດັ່ງກ່າວໃຫ້ໄດ້ຮັບຜົນດີ.ພາບ/ຂ່າວ: ແສງພອນ ອິນນະລົງ.