ໃນລະຫວ່າງວັນທີ 14-15 ກຸມພາ 2023, ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈໍາເຂດເລືອກທີ 12 ແຂວງຄໍາມ່ວນ, ພ້ອມດ້ວຍຄະນະ ໄດ້ເຄື່ອນໄຫວ ຕິດຕາມກວດກາ ແລະ ຊຸກຍູ້ການຈັດຕັ້ງປະຕິວຽກງານການຂຸດຄົ້ນແຮ່ທາດ ຢູ່ແຂວງຄໍາມ່ວນ ເຂົ້າຮ່ວມມີ ທ່ານເຈົ້າເມືອງ ແລະ ບັນດາທ່ານຫົວໜ້າ-ຮອງຫົວໜ້າພະແນກການ.

ການເຄື່ອນໄຫວເຮັດວຽກຄັ້ງນີ້ ທ່ານ ຮອງປະທານສະພາແຫ່ງຊາດ ພ້ອມຄະນະ ໄດ້ຮັບຟັງການລາຍງາກ່ຽວກັບສະພາບການລົງທຶນ, ເຂດຂຸດຄົ້ນ, ລາຍຮັບການສົ່ງອອກ ແລະ ການເສຍພັນທະ, ລວມໄປເຖິງການສ້າງວຽກເຮັດງານທຳໃຫ້ປະຊາຊົນ ແລະ ການມີສ່ວນຮ່ວມໃນການສ້າງສາພັດທະນາແຂວງຄໍາມ່ວນ ກໍ່ຄືປະເທດຊາດ, ຈາກພະແນກການຂອງແຂວງ ແລະ ພາກສ່ວນທີ່ກ່ຽວຂ້ອງລາຍງານ. ຈາກນັ້ນ, ຄະນະໄດ້ເດີນທາງຢ້ຽມຢາມ ບໍລິສັດ ຊີໂນ-ອາກຣິ ໂປຕາສ ຈໍາກັດ ທີ່ບ້ານ ດົງໃຕ້ ເມືອງທ່າແຂກ, ໂດຍການຕ້ອນຂອງ ທ່ານ ໂຖງຢົງເຫີງ ຜູ້ອຳນວຍການບໍລິສັດ ຊີໂນ-ອາກຣີ ໂປຕາສ ຈໍາກັດ, ພ້ອມຮັບຟັງການລາຍງານໂດຍຫຍໍ້ກ່ຽວກັບການລິເລີ່ມຈັດຕັ້ງປະຕິບັດພັດທະນາໂຄງການບໍລິສັດຊີໂນ-ອາກຣີ ໂປຕາສ ຈຳກັດ ແມ່ນໄດ້ເຊັນສັນຍາຂຸດຄົ້ນ ແລະ ປຸງແຕ່ງເກືອໂປຕາສ ໃນເດືອນ ມັງກອນ 2009 ແລະ ໄດ້ເລີ່ມທົດລອງຜະລິດໃນປີ 2011 ໃນປະລິມານ 1 ແສນໂຕ່ນຕໍ່ປີ ແລະ ໃນປີ 2021 ແມ່ນໄດ້ສໍາເລັດການກໍ່ສ້າງໂຄງການຜະລິດເກືອໂປຕາສ 1 ລ້ານໂຕ່ນຕໍ່ປີ, ມາຮອດ ໃນປີ 2022 ໄດ້ສໍາເລັດການກໍ່ສ້າງໂຄງການຝຸ່ນໂປຕາສ ຂະໜາດ 1 ລ້ານໂຕ່ນຕໍ່ປີ, ແຫ່ງທີ 2 ແລະ ໄດ້ເປີດທົດລອງຜະລິດໃນວັນທີ 1 ມັງກອນ 2023 ເຊິ່ງກາຍເປັນໂຄງການເກືອໂປຕາສລະດັບ 2 ລ້ານໂຕ່ນແຫ່ງທໍາອິດ, ໃນອານາຄົດໂຄງການຈະຂະຫຍາຍກຳລັງການຜະລິດຈະໃຫ້ໄດ້ 5 ລ້ານໂຕ່ນຕໍ່ປີ, ແລະ ເປັນໂຄງການເກືອໂປຕາສທີ່ໃຫຍ່ທີ່ສຸດໃນອາຊຽນ. ພ້ອມນັ້ນ, ບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ແຂວງຄໍາມ່ວນ ຍັງໄດ້ມີຄໍາເຫັນແລກປ່ຽນມາຍັງບໍລິສັດໃນການປະຕິບັດວຽກງານ, ບັນຫາຂໍ້ສະດວກ ແລະ ຂໍ້ຄົງຄ້າງໃນການດຳເນີນທຸລະກິດໃນຜ່ານມາ.

ໂອກາດດັ່ງກ່າວ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ມີຄໍາເຫັນວ່າ: ການເຄື່ອນໄຫວຕິດຕາມກວດກາ ໃນຄັ້ງນີ້ແມ່ນໄດ້ປະຕິບັດຕາມມະຕິທີ່ສະພາແຫ່ງຊາດ ໄດ້ກຳນົດເຊິ່ງການຄຸ້ມຄອງ ແລະ ນຳໃຊ້ຊັບພະຍາທຳມະຊາດ ໂດຍສະເພາະແມ່ນການຄຸ້ມຄອງສຳຫຼວດ ແລະ ຂຸດຄົ້ນແຮ່ທາດ ແມ່ນຖືວ່າເປັນວຽກງານໜຶ່ງທີ່ສໍາຄັນຕໍ່ການຂະຫຍາຍຕົວຂອງເສດຖະກິດ ແລະ ສ້າງລາຍຮັບແຫ່ງຊາດ, ຄຽງຄູ່ກັນກັບການສ້າງພຶ້ນຖານໂຄງລາງໃຫ້ແກ່ການພັດທະນາເສດຖະກິດ-ສັງຄົມ, ພ້ອມນັ້ນທ່ານ ຮອງປະທານສະພາແຫ່ງຊາດໄດ້ເນັ້ນໃຫ້ບໍລິສັດ ເອົາໃຈໃສ່ວຽກງານການປົກປັກຮັກສາສິ່ງແວດລ້ອມທໍາມະຊາດ ສີຂຽວຢືນຢົງ, ທັນສະໄໝ ແລະ ສະເໜີໃຫ້ໂຄງການເອົາໃຈໃສ່ສ້າງວຽກເຮັດງານທຳໃຫ້ປະຊາຊົນໃນຊຸມຊົນ, ສ້າງຖະໜົນຫົນທາງ, ໂຮງຮຽນ, ສຸກສາລາ ເພື່ອໃຫ້ປະຊາຊົນໄປມາສະດວກສະບາຍ.

ໂດຍ: ເອື້ອ ມະໂນສິງ