(ສພຊ) ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຽງຂວາງ ຊຸດທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 15 ກຸມພາ 2023 ໂດຍການເປັນປະທານຂອງທ່ານ ບຸນໂຮມ ເທດທານີ ປະທານສະພາປະຊາຊົນແຂວງຊຽງຂວາງ ໂດຍການເຂົ້າຮ່ວມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ບຸນຈັນ ສີວົງພັນ ເຈົ້າແຂວງໆຊຽງຂວາງ, ມີບັນດາທ່ານຮອງປະທານສະພາປະຊາຊົນແຂວງ, ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ບັນດາສະມາຊິກສະພາປະຊາຊົນແຂວງ, ບັນດາຫົວໜ້າພະແນກການ, ອົງການຈັດຕັ້ງພາຍໃນແຂວງເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ ທ່ານ ບຸນໂຮມ ເທດທານີ ໄດ້ໃຫ້ຮູ້ວ່າ: ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຊຽງຂວາງ ຊຸດທີ II ຄັ້ງນີ້ ຈະໄດ້ຄົ້ນຄວ້າ, ພິຈາລະນາເອົາບັນດາເນື້ອໃນທີ່ສຳຄັນ ດັ່ງນີ້:

1. ລາຍງານຜົນກອງປະຊຸມຄະນະປະຈຳ, ຮັບຮອງເອົາການແຕ່ງຕັ້ງ ຕາມການສະເໜີຂອງທ່ານເຈົ້າແຂວງ;

2. ບົດລາຍງານ ການເຄື່ອນໄຫວວຽກງານພົ້ນເດັ່ນເປັນຈຸດສຸມຂອງແຂວງ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງອົງການປົກຄອງແຂວງ;

3. ບົດລາຍງານ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນການລົງທຶນຂອງລັດ ປະຈຳປີ 2022 ແລະ ທິດທາງແຜນການປະຈຳປີ 2023 ຂອງພະແນກແຜນການ ແລະ ການລົງທຶນ;

4. ບົດລາຍງານ ການຈັດຕັ້ງປະຕິບັດແຜນງົບປະມານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງພະແນກການເງິນ;

5. ບົດລາຍງານ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ພ້ອມຮັບຟັງການລາຍງານ ຂອງພະແນກການກ່ຽວຂ້ອງຕາມຄຳຖາມເຈາະຈີ້ມຄື: ພະແນກກະສິກຳ ແລະ ປ່າໄມ້ແຂວງ; ພະແນກພະລັງງານ ແລະ ບໍ່ແຮ່ແຂວງ; ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ; ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ;

6. ບົດລາຍງານ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ພ້ອມຮັບຟັງການລາຍງານ ຕາມຄຳຖາມເຈາະຈີ້ມຂອງບັນດາພາກສ່ວນທີກ່ຽວຂ້ອງຄື: ກອງບັນຊາການ ປກສ ແຂວງ; ພະແນກສຶກສາທິການ ແລະ ກິລາແຂວງ;

7. ບົດລາຍງານ ການຈັດຕັ້ງປະຕິບັດວຽກງານປີ 2022 ແລະ ທິດທາງແຜນການປີ 2023 ຂອງອົງການກວດສອບພາກເໜືອ, ລາຍງານຜົນການກວດສອບ ບົດສະຫຼຸບຂາດຕົວ ການຈັດຕັ້ງປະຕິບັດ ແຜນງົບປະມານແຫ່ງລັດຂອງແຂວງ ປະຈຳປີ 2021;

8. ບົດລາຍງານ ການຈັດຕັ້ງປະຕິບັດ ການເຄື່ອນໄຫວວຽກງານ ປະຈຳປີ 2022 ແລະ ແຜນການເຄື່ອນໄຫວວຽກງານ ປະຈຳປີ 2023 ຂອງອົງການກວດກາລັດແຂວງ; ລາຍງານຜົນການກວດກາ ຕາມຜົນການກວດສອບ ປະຈຳປີ 2020;

9. ບົດລາຍງານ ການຈັດຕັ້ງປະຕິບັດ ການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈຳປີ 2023 ຂອງສານປະຊາຊົນແຂວງ;

10. ບົດລາຍງານ ການຈັດຕັ້ງປະຕິບັດ ການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈຳປີ 2023 ຂອງອົງການໄອຍະການປະຊາຊົນແຂວງ;

11. ບົດລາຍງານ ການຈັດຕັ້ງປະຕິບັດ ການເຄື່ອນໄຫວວຽກງານ ປະຈຳປີ 2022 ແລະ ທິດທາງແຜນການເຄື່ອນໄຫວວຽກງານ ປະຈຳປີ 2023 ຂອງສະພາປະຊາຊົນແຂວງ;

12. ຮັບຟັງການໂອ້ລົມຂອງທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຄະນະປະຈຳສະພາແຫ່ງຊາດ, ຮອງປະທານສະພາແຫ່ງຊາດ.

ເພື່ອພິຈາລະນາຮັບຮອງເອົາບັນຫາທີ່ສຳຄັນຂອງແຂວງ ຄືດັ່ງທີ່ກ່າວມານັ້ນ ໃນນາມປະທານກອງປະຊຸມ ຂໍຮຽກຮ້ອງມາຍັງທຸກພາກສ່ວນ ຈົ່ງໃຫ້ຄວາມຮ່ວມມື, ກະກຽມບົດລາຍງານ, ບົດຊີ້ແຈງ ແລະ ສະໜອງຂໍ້ມູນໃສ່ບັນດາເນື້ອໃນ ທີ່ນຳເຂົ້າຄົ້ນຄວ້າພິຈາລະນາໃນກອງປະຊຸມຄັ້ງນີ້. ຮຽກຮ້ອງມາຍັງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ຈົ່ງນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບ ໜ້າທີ່ການເມືອງຂອງຕົນ ໃນການຄົ້ນຄວ້າ, ປະກອບຄຳເຫັນ ຕໍ່ກັບທຸກບັນຫາຢ່າງຖີ່ຖ້ວນ ພາວະວິໄສ, ກົງໄປກົງມາ ແລະ ເລິກເຊິ່ງ ບົນພື້ນຖານ ແນວທາງນະໂຍບາຍຂອງພັກ-ລັດ, ກົດໝາຍ, ລະບຽບການຕ່າງໆ ຕາມສະພາບຄວາມເປັນຈິງຂອງແຂວງໃນປັດຈຸບັນ ເພື່ອເຮັດໃຫ້ບັນດາເນື້ອໃນທີ່ຈະຮັບຮອງໃນກອງປະຊຸມຄັ້ງນີ້ ມີຄຸນນະພາບ ແລະ ສາມາດນຳໄປຈັດຕັ້ງປະຕິບັດໄດ້ຢ່າງເປັນຮູບປະທຳ.