(ສພຊ) ໃນວັນທີ 8 ກຸມພາ 2023 ທີ່ສະພາແຫ່ງຊາດ ນະຄອນຫຼວງວຽງຈັນ, ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ Kenji Okamura ຮອງຜູ້ອຳນວຍການໃຫຍ່ກອງທຶນການເງິນສາກົນ (IMF) ພ້ອມດ້ວຍຄະນະ.
ໃນໂອກາດນີ້, ທ່ານ ທັນຕາ ກອງຜາລີ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍ ທ່ານ Kenji Okamura ພ້ອມດ້ວຍຄະນະ ທີ່ເດີນທາງມາເຮັດວຽກຮ່ວມກັບພາກສ່ວນກ່ຽວຂ້ອງ ຂອງ ສປປລາວ ໃນການປະເມີນເສດຖະກິດມະຫາພາກ ຂອງ ສປປລາວ ປະຈໍາປີ 2022 ຕາມພັນທະປະເທດສະມາຊິກ ພາຍໃຕ້ມາດຕາ (Article IV Consultation) ເຊິ່ງການປະເມີນດັ່ງກ່າວ ແມ່ນມີຄວາມສຳຄັນ ສຳລັບ ສປປລາວ ໂດຍສະເພາະ ໃນໄລຍະມີຄວາມຫຍຸ້ງຍາກດ້ານເສດຖະກິດ-ການເງິນ ແລະ ກຳລັງປະເຊີນກັບສິ່ງທ້າທາຍຫຼາຍຢ່າງ ຈາກທັງປັດໄຈພາຍໃນ ແລະ ພາຍນອກ ຜົນການປະເມີນ ຈະເປັນຂໍ້ມູນທີ່ສໍາຄັນໃຫ້ແກ່ການຈັດລຳດັບຄວາມໜ້າເຊື່ອຖື ຂອງ ສປປລາວ ໃນການຍາດແຍ່ງການຊ່ວຍເຫຼືອຈາກສາກົນ ແລະ ດຶງດູດການລົງທຶນຂອງຕ່າງປະເທດ ເຊິ່ງນັກລົງທຶນ, ຄູ່ຮ່ວມພັດທະນາ ແລະ ບໍລິສັດຂອງຕ່າງປະເທດ ກຳລັງລໍຖ້າຜົນການປະເມີນສະພາບເສດຖະກິດມະຫາພາກ ຂອງ ສປປລາວ ໃນປີນີ້; ພ້ອມດຽວກັນນັ້ນ, ທ່ານ ທັນຕາ ກອງຜາລີ ຍັງໄດ້ສະເໜີໃຫ້ກອງທຶນການເງິນສາກົນສືບຕໍ່ໃຫ້ການສະໜັບສະໜູນຊ່ວຍເຫຼືອທາງດ້ານວິຊາການໃຫ້ແກ່ພາກສ່ວນກ່ຽວຂ້ອງ ຂອງ ສປປລາວ ເພື່ອໃຫ້ສາມາດຮັບມືກັບບັນດາຄວາມສ່ຽງທີ່ ສປປລາວ ກຳລັງປະເຊີນຢ່າງມີປະສິດທິພາບ ແລະ ທັນສະພາບການ.
ໃນໂອກາດດຽວກັນນີ້, ທ່ານ ຮອງຜູ້ອຳນວຍການໃຫຍ່ກອງທຶນການເງິນສາກົນ (IMF) ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ລາຍງານຜົນການປະເມີນເສດຖະກິດ ສປປລາວ. ໃນນັ້ນ, ໄດ້ເນັ້ນບັນຫາສຳຄັນຄື: ການພັດທະນາເສດຖະກິດ, ການເງິນພາກລັດ, ນະໂຍບາຍເງິນຕາ ແລະ ການທະນາຄານ, ອັດຕາເງິນເຟີ້ ແລະ ອັດຕາແລກປ່ຽນ ແລະ ການຄາດຄະເນໃນຕໍ່ໜ້າ ເຊິ່ງຜົນຂອງການປະເມີນ ເຫັນວ່າຍັງມີສິ່ງທ້າທາຍ ແລະ ຄວາມອ່ອນໄຫວຂອງເສດຖະກິດໃນຫຼາຍດ້ານທີ່ສົ່ງຜົນກະທົບຕໍ່ການຂະຫຍາຍຕົວ ແລະ ສະຖຽນລະພາບຂອງເສດຖະກິດ ສປປ ລາວ. ແຕ່ເຖິງຢ່າງໃດກໍຕາມ IMF ຄາດວ່າໃນຕໍ່ໜ້າ ເສດຖະກິດຂອງ ສປປລາວ ຈະຟື້ນຕົວເຂົ້າສູ່ສະພາບປົກກະຕິ ແລະ ເຕີບໂຕຢ່າງຕໍ່ເນື່ອງ.
ການປະເມີນເສດຖະກິດມະຫາພາກ ຕາມມາດຕາ IV ຂອງ IMF ແມ່ນການປະຕິບັດພັນທະຂອງ ສປປລາວ ໃນນາມປະເທດສະມາຊິກ ເພື່ອໃຫ້ການຮ່ວມມື ແລະ ອຳນວຍຄວາມສະດວກແກ່ຄະນະວິຊາການຂອງ IMF ໃນການຕິດຕາມ ແລະ ປະເມີນຄວາມຄືບໜ້າການພັດທະນາເສດຖະກິດໃນທຸກໆປີ. ການປະເມີນໃນປີນີ້ ເຫັນວ່າ ພິເສດ ເພາະວ່າເປັນຄັ້ງທຳອິດທີ່ມີການນຳຂັ້ນຮອງຜູ້ອຳນວຍການໃຫຍ່ຂອງ IMF ເປັນຜູ້ນຳພາຄະນະມາປະເມີນເສດຖະກິດຂອງ ສປປລາວ ເຊິ່ງສະແດງໃຫ້ເຫັນເຖິງຄວາມເອົາໃຈໃສ່ຂອງ IMF ທີ່ມີຕໍ່ ສປປລາວ ແລະ ຖືເປັນບາດກ້າວທີ່ສຳຄັນຂອງການພົວພັນຮ່ວມມືຂອງສອງຝ່າຍ.