ຕອນແລງວັນທີ 9 ກຸມພາ 2023 ນີ້ສະພາປະຊາຊົນແຂວງຫລວວງນ້ຳທາ ໄດ້ເປີດກອງປະຊຸມຕີລາຄາຂະບວນການແຂ່ງຂັນຮັກຊາດ ແລະ ພັດທະນາປີ 2016-2020 ແລະ ທິດທາງແຜນການຮອດປີ 2025 ຂື້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ທັງເປັນຫົວໜ້າຄະນະຊີ້ນຳການແຂ່ງຂັນຍ້ອງຍໍຮັກຊາດ ແລະ ພັດທະນາ ສະພາປະຊາຊົນແຂວງ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການເຂົ້າຮ່ວມທັງໝົດ 40 ກວ່າຄົນ.

ໃນພິທີໄດ້ຮັບຟັງຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນຳການແຂ່ງຂັນຍ້ອງຍໍຮັກຊາດ ເລກທີ 01/ຄຊຂຍຂ, ລົງວັນທີ 12 ມັງກອນ 2023 ແລະ ພັດທະນາ; ຮັບຟັງຮ່າງບົດສະຫລຸບຕີລາຄາຂະບວນການແຂ່ງຂັນຮັກຊາດ ແລະ ພັດທະນາ 2016-2020 ແລະ ທິດທາງແຜນການ ຮອດປີ 2025; ເຊິ່ງໄລຍະ 05 ປີຜ່ານມາ ສາມາດສະຫລຸບ ສັງລວມຍ້ອງຍໍພາຍໃນ ສະພາປະຊາຊົນແຂວງ ຫລວງນ້ຳທາ ລວມທັງໝົດໄດ້ 20 ຫລຽນ ແລະ 14 ໃບ, ໃນນີ້ມີບຸກຄົນ 34 ທ່ານ,; ກົມກອງ 1 ຫລຽນ ຄື: ຫລຽນໄຊແຮງງານຊັ້ນ1 ຈຳນວນ 1 ຫລຽນ, ຫລຽນໄຊແຮງງານຊັ້ນ2 ຈຳນວນ 2 ຫລຽນ, ຫລຽນໄຊແຮງງານຊັ້ນ 3 ຈຳນວນ 6 ຫລຽນ, ໃບຍ້ອງຍໍລັດຖະບານຈຳນວນ 13 ໃບ, ໃບຍ້ອງຍໍເຈົ້າແຂວງ ຈຳນວນ 1 ໃບ ແລະ ກົມກອງແມ່ນຫລຽນໄຊແຮງງານຊັ້ນ2 ຈຳນວນ 1 ຫລຽນ ແລະ ທິດທາງແຜນຈະສືບຕໍ່ຈັດຕັ້ງປະຕິບັດແຂ່ງຂັນຮັກຊາດ ແລະ ພັດທະນາຕາມ 5 ສູ້ຊົນ 4 ເພີ່ມທະວີ ໃຫ້ໄດ້ຕາມຄາດໝາຍທີວາງໄວ້; ພ້ອມດຽວກັນ ຍັງໄດ້ແລກປ່ຽນປະກອບຄຳຄິດເຫັນໃສ່ຮ່າງບົດສະຫລຸບຕີລາຄາຂະບວນການແຂ່ງຂັນຮັກຊາດ ແລະ ພັດທະນາ 2016-2020 ແລະ ທິດທາງແຜນການຕາມ 5 ສູ້ຊົນ 4 ເພີ່ມທະວີຮອດປີ 2025 ຢ່າງກົງໄປກົງມາ ເພື່ອເຮັດໃຫ້ຮ່າງບົດສະຫລຸບດັ່ງກ່າວ ໃຫ້ມີເນື້ອໃນຄົບຖ້ວນຖຶກຕ້ອງ, ສອດຄ່ອງຂຶ້ນກວ່າເກົ່າ.