ຄະນະສະມາຊິກສະພາແຫ່ງຊາດ (ຄສຊ) ປະຈໍາເຂດເລືອກຕັ້ງທີ 17 ແຂວງອັດຕະປື. ເປີດກອງປະຊຸມປະຈໍາປີ 2022. ໃນວັນທີ 6 ກຸມພາ 2023 ນີ້. ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງ ທ່ານ ນາງ ມີນາພອນ ໄຊສົມພູ  ປະທານ ຄສຊ ປະຈໍາເຂດເລືອກຕັ້ງທີ 17, ປະທານສະພາປະຊາຊົນແຂວງ. ເຂົ້າຮ່ວມມີບັນດາທ່ານ ຄສຊ ປະຈໍເຂດເລືອກຕັ້ງທີ 17, ຄະນະປະຈໍາພັກແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ (ສສຂ), ພະແນກການອ້ອມຂ້າງແຂວງ,  ແລະ ແຂກທີ່ຖືກເຊີນເຂົ້າຮ່ວມ.

ກອງປະຊຸມ, ທ່ານ ນາງ ພອນມະນີ ຂຽນໄຊຍະວົງ ຮອງປະທານ ຄສຊ ປະຈໍາເຂດເລືອກຕັ້ງທີ 17, ຮອງປະທານສະພາປະຊາຊົນແຂວງ ຂື້ນຜ່ານບົດສະຫລຸບການຈັດຕັ້ງປະຕິບັດ ວຽກງານປະຈຳປີ 2022, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 17 ແຂວງອັດຕະປື  ເຊິ່ງໄດ້ເພີ່ມທະວີນຳພາວຽກງານການເມືອງ-ແນວຄິດ, ຕິດຕາມຊຸກຍູ້ພະນັກງານລັດຖະກອນ ເຊື່ອມຊຶມແນວທາງ, ແຜນນະໂຍບາຍ, ມະຕິ ແລະ ຄໍາສັ່ງຕ່າງໆ ໃນການ ຝຶກຝົນ ລໍຫຼອມຄຸນສົມບັດສິນທໍາປະຕິວັດ ໃຫ້ເຂັ້ມແຂງ ແລະ ໜັກແໜ້ນ, ຖືເອົາລະບອບສ່ອງແສງວຽກງານເພື່ອແກ້ໄຂຂໍ້ຄົງຄ້າງ ແລະ ກໍ່ສ້າງເຊິ່ງກັນ ແລະ ກັນ ແນ່ໃສ່ປັບປຸງລະບອບແບບແຜນວິທີເຮັດວຽກໃຫ້ຮັບປະກັນໃນການປະຕິບັດພາລະບົດບາດຂອງຕົນ ໃຫ້ມີປະສິດທິຜົນສູງຂຶ້ນ, ຍົກສູງຄວາມຮັບຜິດຊອບ ຕໍ່ໜ້າທີການເມືອງ ທີ່ພັກ-ລັດ ມອບໝາຍໃຫ້ ດ້ວຍຄວາມຮັບຜິດຊອບ ແລະ ມີຜົນສຳເລັດ,ໄດ້ປະຕິບັດ ສິດ ແລະ ໜ້າທີ ແຕ່ລະດ້ານ ການສ້າງ ແລະ ປັບປຸງກົດໝາຍ, ການຕົກລົງບັນຫາສຳຄັນພື້ນຖານຂອງຊາດ, ການປະຕິບັດພາລະບົດບາດຕິດຕາມກວດ ເປັນຕົ້ນ: ເປັນເຈົ້າການ ເອົາໃຈໃສ່ເຂົ້າຮ່ວມ ຄົ້ນຄວ້າປະກອບຄຳເຫັນ ແລະພິຈາລະນາຮັບຮອງເອົາບັນດາກົດໝາຍ ຮ່ວມກັບຄະນະສະມາຊິກສະພາແຫ່ງຊາດ ໃນທົ່ວປະເທດ ທີ່ໄດ້ນໍາມາ ສະເໜີກອງປະຊຸມສະໄໝວິສາມັນເທື່ອທີ 1  ແລະ ກອງປະຊຸມສະໄໝສາມັນເທື່ອທີ 3 ແລະ 4 ຂອງສະພາແຫ່ງຊາດຊຸດທີ IX ມີທັງໝົດ 21 ສະບັບ, ອອກນິຕຳກຳໃຕ້ກົດໝາຍ ເພື່ອຮັບໃຊ້ເຂົ້າໃນການເຄື່ອນໄຫວວຽກງານຂອງຕົນ ມີທັງໝົດ 45 ສະບັບ, ຂໍ້ຕົກລົງ 28 ສະບັບ, ແຜນການເຄື່ອນໄຫວ 6 ສະບັບ ບົດລາຍງານ 11 ສະບັບ, ໄດ້ປະສານສົມທົບກັບ ຄະນະປະຈໍາສະພາປະຊາ ຊົນຂັ້ນແຂວງ ແລະ ສະມາຊິກສະພາປະຊາຊົນຂັ້ນແຂວງ ຄົ້ນຄວ້າປະກອບຄຳເຫັນໃສ່ຮ່າງນິຕິກໍາໃຕ້ກົດໝາຍ ຂອງ ອົງການປົກຄອງແຂວງ ມີທັງໝົດ 05 ສະບັບ, ປະຕິບັດພາລະບົດບາດການຕົກລົງບັນຫາສຳຄັນພື້ນຖານຂອງຊາດ ກໍ່ຄືຂອງທ້ອງຖີ່ນ ໂດຍຖືເອົາການແລກປ່ຽນທັດສະນະຄວາມມຸ້ງມາດປາດຖະຫາ ເພື່ອເປັນຂໍ້ມູນໃນການປະກອບຄໍາເຫັນ ແລະ ເປັນບ່ອນອີງໃນການພິຈາລະນາຮັບຮອງ ບັນຫາສໍາຄັນຕ່າງໆຂອງຊາດ ກໍ່ຄືຂອງທ້ອງຖິ່ນ ໂດຍສະເພາະ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳປີ 2022 ແລະ ທິດທາງແຜນການ ປີ 2023 ແລະ ບັນຫາທີ່ມີຄວາມຈໍາເປັນຮີບດ່ວນຈໍານວນໜື່ງ ຂອງທ້ອງຖິ່ນ ເປັນຕົ້ນ: ພິຈາລະນາຮັບຮອງເອົາເນື້ອໃນທີ່ຈະນຳເຂົ້າຄົ້ນຄວ້າ ພິຈາລະນາ ແລະ ຮັບຮອງ ໃນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນຂັ້ນແຂວງ ຊຸດທີ II ທັງໝົດ 17 ເນື້ອໃນ; ພິຈາລະນາ ຮັບຮອງເອົາແຜນການສ້າງນິຕິກໍາໃຕ້ກົດໝາຍ ຈໍານວນ 02 ສະບັບ ແລະ ນິຕິກໍາໃຕ້ກົດໝາຍ 01 ສະບັບ, ພິຈາລະນາ ຮັບຮອງເອົາໜັງສືສະເໜີ ຂອງສານປະຊາຊົນແຂວງ ກ່ຽວກັບການເລື່ອນຊັ້ນຜູ້ພິພາກສາ ຈໍານວນ 02 ຄັ້ງ 04 ທ່ານ,  ຈາກຜູ້ຊ່ວຍເປັນຜູ້ພິພາກສາຊັ້ນI; ຈາກຊັ້ນII ຂື້ນເປັນຊັ້ນIII ເພື່ອສະເໜີໄປຍັງສານປະຊາຊົນສູງສຸດ, ສົມທົບກັບສະມາຊິກສະພາປະຊາຊົນຂັ້ນແຂວງ ແລະ ຄະນະກຳມະການ ລົງຕິດຕາມ ແລະ ເກັບກໍາຂໍ້ມູນກ່ຽວກັບບັນຫາຜົນກະທົບດ້ານສິ່ງແວດລ້ອມສັງຄົມ ແລະ ທຳມະຊາດ ເພື່ອລາຍງານໃຫ້ແກ່ຄະນະປະຈຳສະພາແຫ່ງຊາດ ເປັນຂໍ້ມູນພື້ນຖານ ໃນການພິຈາລະນາຮັບຮອງເອົາການຫັນປ່ຽນທີ່ດິນທຳມະຊາດ 2 ໂຄງການທີ່ລັດຖະບານສະເໜີມາຄື: (1) ຂໍຫັນປ່ຽນທີ່ດິນປ່າໄມ້ທໍາມະຊາດ ໄປເປັນທີ່ດິນອຸດສາຫະກຳແບບຊົ່ວຄາວ ເຂດທີ່ເປັນປ່າສະຫງວນດົງອຳພາມ ເພື່ອນໍາໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງແຮ່ຄຳ ຢູ່ບ້ານວັງຕັດໃຫຍ່, ບ້ານຢຽງດາກ; ເມືອງ ຊານໄຊ ຂອງບໍລິສັດວັງຕັດຂຸດຄົ້ນບໍ່ແຮ່ຈຳກັດ; (2) ຂໍຫັນປ່ຽນທີ່ດິນປ່າໄມ້ທຳມະຊາດ ໄປເປັນທີ່ດິນປະເພດອື່ນຖາວອນ ໃນເຂດທີ່ດິນປ່າປ້ອງກັນແຫ່ງຊາດ ເຊກະໝານ, ນໍ້າອາງ, ຫ້ວຍວີ ເພື່ອນໍາໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງແຮ່ຄຳຢູ່ບ້ານ ດາກລະ, ບ້ານ ດອນຈັນ, ບ້ານ ນໍ້າງອນເໜືອ ແລະ ບ້ານ ນໍ້າງອນໃຕ້ ເມືອງຊານໄຊ ຂອງບໍລິສັດເຄເອັນການລົງທຶນ ແລະ ບໍ່ແຮ່ຈຳກັດ,  ຈາກນັ້ນ, ຜູ້ແທນກອງປະຊຸມ ໄດ້ແລກປ່ຽນປະກອບຄຳເຫັນ.

( ພາບ-ຂ່າວ: ສພຂ ອັດຕະປື)