ໃນຕອນເຊົ້າຂອງວັນທີ 25 ມັງກອນ 2023 ທ່ານ ຄໍາຫຼ້າ ສີສຸວົງ ເລຂາທິການສະພາປະຊາຊົນແຂວງວຽງຈັນໄດ້ຖະແຫຼ່ງຂ່າວການດໍາເນີນກອງປະຊຸມສະໄໜສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II.

ໂດຍປະຕິບັດຕາມ ມາດຕາ 59 ຂອງກົດໝາຍວ່າດ້ວຍ  ການປັບປຸງບາງ​ມາດຕາ ກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນຂັ້ນແຂວງກ່ຽວກັບການດໍາເນີນກອງປະຊຸມສະໄໝສາມັນປະຈໍາປີ ຂອງສະພາປະຊາຊົນແຂວງ,ກໍ່ຄືພາລະບົດບາດ, ສິດ ແລະ ໜ້າທີ່ ຂອງຄະນະປະຈໍາ ສະພາປະຊາຊົນແຂວງ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍສະພາປະຊາຊົນແຂວງ ໃນການກະກຽມ ຮຽກໂຮມ ແລະ ນໍາພາດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງວຽງຈັນ ຊຸດທີ II.

ເພື່ອປະຕິບັດຕາມເນື້ອໃນຈິດໃຈດັ່ງກ່າວ ຄະນະປະຈໍາສະພາປະຊາຊົນແຂວງ,ບັນດາຄະນະກໍາມະການ, ຄະນະເລຂາທິການ ແລະ ກົງຈັກທີ່ຄະນະປະຈໍາສະພາປະຊາຊົນແຂວງສ້າງຕັ້ງ ໄດ້ປະສານສົມທົບກັບອົງການປົກຄອງ ,ບັນດາພະແນກການ ແລະ ອົງການກ່ຽວຂ້ອງ ກະກຽມເນື້ອໃນທີ່ຈະນຳສະເໜີຕໍ່ກອງປະຊຸມໃນຄັ້ງນີ້ ມາເຖິງປັດຈຸບັນເຫັນວ່າການກະກຽມເນື້ອໃນແມ່ນຄົບຖ້ວນ, ຮອບດ້ານ,ສອດຄ່ອງກັບກົດໝາຍ ແລະ ນິຕິກຳໃຕ້ກົດໝາຍແລ້ວ.

ຂ້າພະເຈົ້າ, ຄະນະປະຈໍາ, ເລຂາທິການ ຫົວໜ້າກອງເລຂານຸການກອງປະຊຸມສະໄໜສາມັນເທື່ອທີ 4 ຂອງສະພາປະຊາຊົນແຂວງວຽງຈັນ ມີຄວາມຍິນດີ ແລະ ຂໍຖືເປັນກຽດຢ່າງສູງ ແຈ້ງມາຍັງບັນດາທ່ານ ການນໍາພັກ-ລັດ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກສຶກສາປັນຍາຊົນ,ກໍາມະກອນ,ຊາວຜູ້ອອກແຮງງານ, ຜູ້ປະກອບການ,ພໍ່ແມ່ພີ່ນ້ອງປະຊາຊົນລາວບັນດາເຜົ່າ, ຊາວຕ່າງດ້າວ,ທີ່ດໍາລົງຊິວິດຢູ່ພາຍໃນແຂວງວຽງຈັນ ຮັບຊາບ ກ່ຽວກັບການດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນຊຸດທີ II ມີດັ່ງນີ້:

ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນຊຸດທີ II ຈະໄດ້ໄຂຂື້ນຢ່າງເປັນທາງການ ໃນຕອນເຊົ້າ ຂອງວັນທີ 31 ມັງກອນ ແລະ ຈະດໍາເນີນເຖິງວັນທີ 3 ກຸມພາ 2023 ຢູ່ທີ່ຫ້ອງປະຊຸມໃຫ່ຍ ຫ້ອງວ່າການປົກຄອງແຂວງວຽງຈັນ ເຊິ່ງຈະໄດ້ດໍາເນີນເປັນເວລາ 04 ວັນ,ພາຍໃຕ້ການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ,ປະທານສະພາປະຊາຊົນແຂວງວຽງຈັນ.

ກອງປະຊຸມສະໄໜສາມັນຄັ້ງນີ້ ຈະໄດ້ສຸມໃສ່ຄົ້ນຄວ້າພິຈາລະນາ ແລະ ຮັບຮອງເອົາ 05 ບັນຫາສໍາຄັນຂອງແຂວງ ພ້ອມທັງປະກອບຄໍາຄິດ ຄໍາເຫັນ, ຊັກຖາມຕໍ່ບົດລາຍງານ ແລະ ການປະຕິບັດໜ້າທີ່ຕ່າງໆຂອງອົງການປົກຄອງແຂວງ ດັ່ງນີ້:

1. ວຽກງານອົງການບໍລິຫານລັດຂັ້ນແຂວງ:

1). ຮັບຟັງການລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈໍາປີ 2022 ແລະ ທິດທາງແຜນການ ປີ 2023.

2). ຮັບຟັງການລາຍງານ ຂອງຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບການຈັດຕັ້ງປະຕິບັດແຜນພັດທະເສດຖະກິດ-ສັງຄົມ ປະຈໍາປີ 2022 ແລະ ທິດທາງແຜນປີ 2023.

3). ຮັບຟັງການລາຍງານ ຂອງຫົວໜ້າພະແນກການເງິນແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປີ 2022 ແລະ ແຜນການ ປີ 2023.

4). ຮັບຟັງການລາຍງານ ຂອງພະແນກສຶກສາທິການ ແລະ ກິລາແຂວງ ກ່ຽວກັບການປັບປຸງຄຸນນະພາບລະບົບການຮຽນ-ການສອນ ທຸກຊັ້ນທຸກສາຍໃນໄລຍະໃໜ່ ແລະ ການຄຸ້ມຄອງວຽກງານກິລາກາຍະກໍາ.

5.) ຮັບຟັງບົດລາຍງານ ຂອງຫົວໜ້າພະແນກຖະແຫຼ່ງຂ່າວວັດຖະນະທໍາ ແລະ ທ່ອງທ່ຽວ ກ່ຽວກັບການຈັດຕັ້ງປະຕິບັດວຽກງານທ່ອງທ່ຽວສີຂຽວ ແລະ ການເປີດປະເທດທີ່ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ – 19.

1. ວຽກງານຂອງ ອົງການກວດສອບພາກກາງ ແລະ ອົງການກວດກາລັດແຂວງ:

1). ຮັບຟັງການລາຍງານ ຂອງອົງການກວດສອບປະຈໍາພາກກາງ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປີ 2023 ແລະ ຜົນຂອງການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານ ຂອງແຂວງປະຈໍາປີ 2021.

2.) ຮັບຟັງບົດລາຍງານ ອົງການກວດກາລັດແຂວງ ປະຈໍາປີ 2022 ແລະ ທິດທາງແຜນການ ປະຈໍາປີ 2023.

• ວຽກງານຂອງ ອົງການໄອຍະການປະຊາຊົນແຂວງ ແລະ ສານປະຊາຊົນແຂວງ:

1.) ຮັບຟັງບົດລາຍງານ ຂອງອົງການໄອຍະການປະຊາຊົນ ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023

2.) ຮັບຟັງບົດລາຍງານ ຂອງສານປະຊາຊົນແຂວງ ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023

1. ຄົ້ນຄວ້າ,ພິຈາລະນາຮັບຮອງ ນິຕິກໍາໃຕ້ກົດໜາຍ ຈໍານວນ 02 ສະບັບ:

1.) ຮັບຟັງການລາຍງານ ຮ່າງຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍ ການຄຸ້ມຄອງ ແລະ ນໍາໃຊ້ຢາປາບສັດຕູ້ພືດ.

2.) ຮັບຟັງຮັບການລາຍງານ ຮ່າງຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍການສະກັດກັ້ນ ແລະ ຫຼຸດຜອ່ນອຸປະຕິເຫດ.

1. ວຽກງານຂອງສະພາປະຊາຊົນແຂວງວຽງຈັນ:
2. ຮັບຟັງບົດລາຍງານ ຂອງສະພາປະຊາຊົນແຂວງ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການປີ 2023.

ທັງໜົດນັ້ນ,ແມ່ນບັນດາເນື້ອໃນທີ່ຈະນໍາເຂົ້າຄົ້ນຄວ້າພິຈາລະນາຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງວຽງຈັນຊຸດທີ II

ອີກເທື່ອໜຶ່ງ,ໃນນາມຕາງໜ້າໃຫ້ແກ່ຄະນະປະຈໍາສະພາປະຊາຊົນແຂວງ,ຂ້າພະເຈົ້າຂໍເຊີນຊວນມາຍັງທຸກພາກສ່ວນ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນຮູ້, ນັກສຶກສາປັນຍາຊົນ, ກໍາມະກອນ, ຊາວຜູ້ອອກແຮງງານ, ຜູ້ປະກອບການ, ພໍ່ແມ່ພີນ້ອງປະຊາຊົນບັນດາເຜົ່າ, ຊາວຕ່າງດ້າວທີ່ດໍາລົງຊິວິດຢູ່ພາຍໃນແຂວງວຽງຈັນ ຈົ່ງໄດ້ຕິດຕາມ, ສະໜັບສະໜູນ,ໃຫ້ຄວາມຮ່ວມມື ແລະ ປະກອບສ່ວນສົງຄໍາຄິດຄໍາເຫັນ, ຄໍາສະເໜີໂດຍກົງ ເຖິງກອງປະຊຸມຂອງພວກເຮົາໄດ້ ໂດຍຜ່ານໂທລະສັບສາຍດ່ວນໜາຍເລກ: 023 156 (ບໍ່ໄດ້ເສຍຄ່າໂທ) ຫຼື ຈະຂຽນເປັນໂທລະສານສົ່ງມາຍັງກອງປະຊຸມ ຕາມວາລະດໍາເນີນກອງປະຊຸມກໍ່ໄດ້ພວກເຮົາໄດ້ແຕ່ງຕັ້ງໜ່ວຍງານຮັບຜິດຊອບຄອຍຮັບໃຊ້ບໍລິການທ່ານໃນໂມງລັດຖະການ.

ທ້າຍນີ້, ຂ້າພະເຈົ້າຫັວງຢ່າງຍິງວ່າ ບັນດາທ່ານຄົງຈະໃຫ້ຄວາມຮ່ວມມື, ສະໜັບສະໜູນ ຕິດຕາມການດໍາເນີນກອງປະຊຸມໃນຄັ້ງນີ້ດ້ວຍ.