(ສພຊ) ໃນຕອນເຊົ້າຂອງວັນທີ 23 ມັງກອນ 2023, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ຄະນະຜູ້ແທນລາຊະດອນ ແຫ່ງຣາຊະອານາຈັກໄທ ນຳໂດຍທ່ານ ສົມສັກ ຄຸນເງິນ ປະທານຄະນະກຳມາທິການການເງິນ, ການຄັງສະຖາບັນການເງິນ ແລະ ການຕະຫຼາດການເງິນ ທີ່ເດີນທາງຢ້ຽມຢາມ ສປປລາວ ແຕ່ວັນທີ 21-24 ມັງກອນ 2023.

ໃນການຢ້ຽມຂ່ຳນັບຄັ້ງນີ້, ທ່ານຮອງປະທານສະພາແຫ່ງຊາດ ໄດ້ສະແດງຄວາມຂ່ຳນັບຮັບຕ້ອນຄະນະຜູ້ແທນສະພາລາຊະດອນດັ່ງກ່າວ ແລະ ຕີລາຄາສູງຜົນການພົບ ປະ ລະຫວ່າງກຳມາທິການແຜນການ, ການເງິນ ແລະ ການກວດສອບຂອງສະພາແຫ່ງຊາດລາວ ແລະ ຄະນະຜູ້ແທນໄທ ເຊິ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອ ລະ ຫວ່າງປະຊາຊົນ 2 ຊາດ ແລະ ໄດ້ສະແດງຄວາມຫວັງວ່າ 2 ອົງການນິຕິບັນຍັດຂອງ 2 ປະເທດ ຈະສືບຕໍ່ຮ່ວມມືນຳກັນ ເພື່ອເສີມສ້າງມິດຕະພາບ, ປະຕິບັດຕາມບົດບັນທຶກຂໍ້ຕົກ ລົງຂອງ 2 ອົງການນິຕິບັນຍັດທີ່ໄດ້ລົງນາມ ໂດຍປະທານຂອງ 2 ອົງການນິຕິບັນຍັດ ເມື່ອທ້າຍປີ 2022 ຜ່ານມາ ໃນໂອກາດທີ່ ປະທານສະພາແຫ່ງຊາດລາວ ຢ້ຽມຢາມຣາຊະອານາຈັກໄທ ຢ່າງເປັນທາງການ.

ໃນວັນດຽວກັນ ທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດລາວ ໄດ້ຕ້ອນຮັບ ແລະ ພົບປະສອງຝ່າຍກັບທ່ານ ສົມສັກ ຄຸນເງິນ, ໂດຍມີຮອງປະທານ, ຮອງເລຂາທິການ, ກຳມະການກຳມາທິການ, ພະນັກງານທີ່ກ່ຽວຂ້ອງຂອງສອງຝ່າຍ ເຂົ້າຮ່ວມຢ່າງພ້ອມພຽງ. ໃນການພົບປະ, ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງອົງການນິຕິບັນຍັດຂອງ ລາວ ແລະ ໄທ ໃນໄລຍະຜ່ານມາ ແລະ ປຶກສາຫາລືທິດທາງຮ່ວມມືໃນຕໍ່ໜ້າ ຕາມເນື້ອໃນບົດບັນທຶກຮ່ວມມືຂອງ 2 ຝ່າຍ. ພ້ອມດຽວກັນນີ້, ສອງຝ່າຍໄດ້ປຶກສາຫາລື ແລະ ແຈ້ງໃຫ້ກັນຊາບໂດຍຫຍໍ້ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ເປັນຕົ້ນແມ່ນຄາດໝາຍດ້ານເສດຖະກິດມະຫາພາກ, ງົບປະມານແຫ່ງລັດ, ແຜນເງິນຕາ, ສາເຫດທີ່ເຮັດເງິນເຟີ້, ມາດຕະການແກ້ໄຂຕ່າງໆໃນຕໍ່ໜ້າ ແລະ ວຽກງານອື່ນໆອີກຈຳນວນໜຶ່ງ ທີ່ສອງຝ່າຍໃຫ້ຄວາມສົນໃຈຮ່ວມກັນ.