ໃນວັນທີ 19 ມັງກອນ 2023 ນີ້ທີ່ກອງບັນຊາການທະຫານແຂວງຄໍາມ່ວນ ສະພາປະຊາຊົນແຂວງຄໍາມ່ວນ ສ້າງກິດຈະກຳກິລາເຕະບານ ຮ່ວມກັບ ກອງບັນຊາການທະຫານແຂວງຄໍາມ່ວນ ເນື່ອງໃນໂອກາດຂໍ່ານັບຮັບຕ້ອນ ແລະ ສະເຫຼີມສະຫຼອງວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 74 ປີ ( 20 ມັງກອນ 1949 – 20 ມັງກອນ 2023 ) ເຊິ່ງນໍາໂດຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍຄະນະ ແລະ ໂດຍໃຫ້ກຽດຕ້ອນຮັບຂອງ ທ່ານ ພັນເອກ ຄໍາສາຍ ເພັດນວນສີ ກຳມະການພັກແຂວງ ຫົວໜ້າຫ້ອງການເມືອງ ກອງບັນຊາການທະຫານແຂວງຄໍາມ່ວນ ພ້ອມດ້ວຍຄະນະ.

ໂອກາດດັ່ງກ່າວ ທ່ານ ບຸນມີ ພິມມະສອນ ໄດ້ອວຍພອນໄຊອັນປະເສີດ ແລະ ກ່າວສະແດງຢື້ຢາມຖາມຂ່າວມາຍັງຄະນະພັກ-ຄະນະນໍາ, ພະນັກງານ-ນັກຮົບທົ່ວທະຫານແຂວງຄໍາມ່ວນ ຈົ່ງມີສຸກຂະພາບເຂັ້ມແຂງ, ມີຄວາມສຸກ ສົມບູນທັງກາຍ-ຈິດໃຈ ແລະ ທ່ານໄດ້ກ່າວສະແດງຄວາມຊົມເຊີຍ, ເຊີດຊູນໍ້າໃຈຮັກຊາດ, ໃນການປົກປັກຮັກສາແນວທາງນະໂຍບາຍຂອງພັກ-ລັດ, ປົກປັກຮັກສາໝາກຜົນຂອງການປະຕິວັດ, ປົກ​ປັກ​ຮັກສາ​ລະບອບ​ໃໝ່​ປະ ຊາທິປະໄຕ​ປະຊາຊົນ​ໄວ້​ໃຫ້​ໝັ້ນຄົງ, ແລະ ການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມສະຫງົບສຸກ, ສີວິໄລ ຂອງບັນດາສະຫາຍນາຍ ແລະ ພົນທະຫານ ທົ່ວກອງທັບປະຊາຊົນປະຕິວັດລາວ ເວົ້າລວມ, ເວົ້າສະເພາະ ພາຍໃນແຂວງຄໍາມ່ວນ ທີ່ເຮັດໜ້າທີ່ພາລະກິດປົກປັກຮັກສາເຂດນໍ້າແດນດິນ, ເປັນເສົາຮົ້ວທີ່ແຂງແກ່ນ ໃຫ້ແຂວງຄໍາມ່ວນ ກໍ່ຄື ໃຫ້ກັບປະເທດຊາດ ຕະຫລອດໄລຍະຜ່ານມາ. ພ້ອມນັ້ນ, ທ່ານ ປະທານສະພາປະຊາຊົນແຂວງ ຍັງໄດ້ມອບເສື້ອກິລາ ແລະ ວັດຖຸປັດໄຈນຳນວນໜຶ່ງໃຫ້ແກ່ກອງບັນຊາການທະຫານແຂວງຄໍາມ່ວນ.

ໂດຍ: ເອື້ອ ມະໂນສິງ