(ສພຊ) ໃນລະຫວ່າງວັນທີ 17-18 ມັງກອນ 2023 ທີ່ສະພາແຫ່ງຊາດ ກໍາມາທິການການຕ່າງປະເທດ ສະພາແຫ່ງຊາດ ໄດ້ເປີດກອງປະຊຸມຄົບຄະນະ ປະຈຳປີ 2022 ຂອງຕົນຂຶ້ນ ໂດຍການເປັນປະທານຂອງທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ; ກອງປະຊຸມໂດຍການເຂົ້າຮ່ວມ ແລະ ມີຄໍາເຫັນໂອ້ລົມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນຳວຽກງານການຕ່າງປະເທດສະພາແຫ່ງຊາດ. ພ້ອມກັນນັ້ນ, ກໍຍັງມີທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ; ຄະນະນຳຈາກກະຊວງທີ່ກ່ຽວຂ້ອງ, ຕາງໜ້າບັນດາກຳມາທິການ ແລະ ຄະນະເລຂາທິການສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ ທີ່ເປັນກຳມະການຂອງກຳມາທິການການຕ່າງປະເທດ ຈາກບັນດາເຂດເລືອກຕັ້ງໃນທົ່ວປະເທດ ພ້ອມດ້ວຍແຂກຖືກເຊີນ ລວມທັງໝົດ 101 ທ່ານ ຍິງ 26 ທ່ານ, ພິເສດ ກອງປະຊຸມຄັ້ງນີ້ ໄດ້ເຊື້ອເຊີນເອົາບັນດາທ່ານ ເອກອັກຄະລັດຖະທູດ, ທ່ານກົງສູນໃຫຍ່ ແລະ ຜູ້ຕາງໜ້າສຳນັກງານ ສປປລາວ ປະຈຳຢູ່ຕ່າງປະເທດ ຈຳນວນ 36 ທ່ານ ເຂົ້າຮ່ວມໂດຍຜ່ານລະບົບອອນລາຍ.
ກອງປະຊຸມໄດ້ຮັບຟັງບົດສະຫຼຸບການເຄື່ອນໄຫວວຽກງານປະຈໍາປີ 2022 ແລະ ທິດທາງແຜນການ ປະຈໍາປີ 2023 ຂອງກໍາມາທິການການຕ່າງປະເທດ ແລະ ແຜນການເບື້ອງຕົ້ນໃນການກະກຽມເປັນເຈົ້າພາບຈັດກອງປະຊຸມສຸດຍອດລັດຖະສະພາ ຂອງ 3 ປະເທດ ກໍາປູເຈຍ-ລາວ-ຫວຽດນາມ (CLV) ຄັ້ງທີ 1 ໃນປີ 2023, ຮັບຟັງການລາຍງານ ກ່ຽວກັບການເຄື່ອນໄຫວວຽກງານຕ່າງປະເທດຂອງລັດຖະບານ ປະຈໍາປີ 2022, ການຈັດຕັ້ງປະຕິບັດບັນດາສົນທິສັນຍາ, ສັນຍາ ແລະ ຂໍ້ຕົກລົງຕ່າງໆ ທີ່ລັດຖະບານລາວໄດ້ເຊັນກັບຕ່າງປະເທດ, ບັນຫາພົ້ນເດັ່ນຂອງວຽກງານຊາຍແດນ, ວຽກງານກົງສຸນ, ວຽກງານສິດທິມະນຸດ ແລະ ທິດທາງແຜນການປະຈໍາປີ 2023; ບົດລາຍງານ ກ່ຽວກັບການຮ່ວມມື ລາວ-ຫວຽດນາມ ແລະ ລາວ-ຈີນ ປະຈຳປີ 2022 ແລະ ແຜນການຮ່ວມມື ປະຈໍາປີ 2023 ແລະ ບົດລາຍງານການປະຕິບັດໂຄງການທ່າບົກ-ທ່ານາແລ້ງ ເຊິ່ງເປັນໂຄງການໜຶ່ງໃນການປະຕິບັດນະໂຍບາຍເຊື່ອມໂຍງ-ເຊື່ອມຈອດຂອງລັດຖະບານ ພ້ອມທັງໄດ້ມີຂໍ້ສະເໜີຈຳນວນໜຶ່ງ ເພື່ອຍົກສູງຄຸນນະພາບການເຄື່ອນໄຫວຕ່າງປະເທດ ໃນສະພາບການພາກພື້ນ-ສາກົນພວມມີການຜັນແປຢ່າງສັບສົນ ຄືປັດຈຸບັນ.
ກອງປະຊຸມຄັ້ງນີ້, ບັນດາຜູ້ແທນໄດ້ຮັບຟັງຄຳເຫັນໂອ້ລົມ ແລະ ໃຫ້ທິດຊີ້ນຳຈາກທ່ານ ປອ. ນາງ ສູນທອນ ໄຊຍະຈັກ ເຊິ່ງທ່ານໄດ້ຊົມເຊີຍ ແລະ ຕີລາຄາສູງ ຕໍ່ຜົນສຳເລັດຂອງການເຄື່ອນໄຫວວຽກງານ ຂອງກຳມາທິການການຕ່າງປະເທດ, ຍົກໃຫ້ເຫັນບາງຂໍ້ຄົງຄ້າງທີ່ຄວນເອົາໃຈໃສ່ໃນການປັບປຸງ ແລະ ແກ້ໄຂໃນຕໍ່ໜ້າ, ໄດ້ເນັ້ນໃຫ້ກຳມາທິການການຕ່າງປະເທດ ເພີ່ມທະວີການປະຕິບັດພາລະບົດບາດ ຂອງອົງການນິຕິບັນຍັດ, ຍົກສູງຄວາມຮັບຜິດຊອບທາງດ້ານໜ້າທີ່ການເມືອງ ໃຫ້ແກ່ຄະນະນຳ, ກຳມະການກຳມາທິການການຕ່າງປະເທດ ແລະ ຍົກສູງຄວາມຮູ້ຄວາມສາມາດດ້ານວິຊາສະເພາະ ແລະ ພາສາຕ່າງປະເທດ ໃຫ້ພະນັກງານວິຊາການ ທີ່ເປັນເສນາທິການຂອງກຳມາທິການການຕ່າງປະເທດໃຫ້ມີປະສິດທິພາບສູງກວ່າເກົ່າ, ສອດຄ່ອງກັບແນວທາງການຕ່າງປະເທດຂອງພັກ ແລະ ລະບຽບກົດໝາຍຂອງລັດ ແລະ ປະກອບສ່ວນເຂົ້າໃນການຍົກສູງບົດບາດຂອງພັກ, ລັດເຮົາ ໃນເວທີພາກພື້ນ ແລະ ສາກົນ.
ໃນຕອນທ້າຍ, ກອງປະຊຸມໄດ້ພິຈາລະນາຮັບຮອງເອົາມະຕິຂອງກອງປະຊຸມຄົບຄະນະກຳມາທິການການຕ່າງປະເທດ ສະພາແຫ່ງຊາດ ປະຈຳປີ 2022 ແລະ ທິດທາງແຜນການປະຈຳປີ 2023; ກອງປະຊຸມໄດ້ມອບໃຫ້ກໍາມາທິການການຕ່າງປະເທດ ຮ່ວມກັບກະຊວງທີ່ກ່ຽວຂ້ອງ ນໍາເອົາຜົນຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍ ຕາມແຜນການເຄື່ອນໄຫວວຽກງານ ປະຈຳປີ 2023 ຂອງຕົນຢ່າງເປັນເຈົ້າການ ໂດຍສະເພາະການປະຕິບັດພາລະບົດບາດທາງດ້ານນິຕິບັນຍັດ, ການຊຸກຍູ້ຕິດຕາມກວດກາການເຄື່ອນໄຫວວຽກງານ ໃນຂົງເຂດການຕ່າງປະເທດ, ເປັນເຈົ້າການໃນການຄົ້ນຄວ້າ, ເຂົ້າຮ່ວມກອງປະຊຸມ ພາຍໃນ-ສາກົນ ແລະ ອໍານວຍຄວາມສະດວກໃຫ້ແກ່ການເຄື່ອນໄຫວວຽກງານການຕ່າງປະເທດ ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ; ສືບຕໍ່ປັບປຸງກົນໄກປະສານງານ ລະຫວ່າງ ສະພາແຫ່ງຊາດ, ກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ເພື່ອຍົກສູງຄຸນນະພາບໃນການເຄື່ອນໄຫວຕ່າງປະເທດຂອງ ສປປລາວ.