ວັນທີ 12 ມັງກອນ 2023 ຜ່ານມານີ້, ການນຳຂັ້ນສູງແຂວງເຊກອງ ນຳໂດຍທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງເຊກອງ ແລະທ່ານ ຄຳສອນ ກອນເຍີ ຄະນະປະຈຳພັກແຂວງ,ຮອງເຈົ້າແຂວງ ພ້ອມຄະນະນຳຂັ້ນສູງຂອງແຂວງ ໄດ້ເຂົ້າອວຍພອນການນໍາແຂວງເທືອທຽນເຫວ້ ສສ ຫວຽດນາມ ເນື່ອງໃນໂອກາດປີໃໝ່ປະຈຳຊາດຫວຽດນາມ ຄສ 2023 ທີ່ຈະມາເຖິງນີ້ ໂດຍໄດ້ຮັບການຕ້ອນຮັບຈາກທ່ານ ຟານ ງັອກ ທໍ້ ຮອງເລຂາພັກແຂວງເທືອທຽນເຫວ້ ແລະທ່ານ ຫວງຽນ ກວາງ ຕວນ ຄະນະປະຈຳພັກແຂວງ,ຮອງປະທານສະພາປະຊາຊົນແຂວງ ພ້ອມຄະນະ.

          ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງເຊກອງໄດ້ກ່າວອວຍພອນວ່າ:ເນື່ອງໃນໂອກາດທີ່ທົ່ວພັກ-ລັດແລະປະຊາຊົນຊາວຫວຽດນາມເວົ້າສະເພາະແມ່ນແຂວງເທືອທຽນເຫວ້ພວມຫ້າງຫາກະກຽມສະເຫຼີມສະຫຼອງບຸນປີໃໝ່ປະຈຳຊາດຫວຽດນາມຄສ 2023 ທີ່ຈະມາເຖິງນີ້ນີ້ ຕາງໜ້າຄະນະພັກ-ອົງການປົກຄອງ ແລະ ປະຊາຊົນບັນດາເຜົ່າແຂວງ ເຊກອງ ຂໍຝາກຄວາມຢ້ຽມຢາມຖາມຂ່າວ ແລະ ຄໍາອວຍພອນໄຊອັນປະເສີດມາຍັງ ທ່ານ ຟານ ງັອກ ທໍ້ ພ້ອມດ້ວຍຄະນະນໍາ ແລະ ປະຊາຊົນບັນດາເຜົ່າພາຍໃນແຂວງ,ອວຍພອນບັນດາທ່ານຈົ່ງຍາດໄດ້ຜົນສໍາເລັດໃໝ່ທີ່ໃຫຍ່ຫຼວງກວ່າເກົ່າ ໃນພາລະກິດປົກປັກຮັກສາ ແລະ ພັດທະນາປະເທດຊາດເວົ້າລວມ, ເວົ້າສະເພາະແຂວງເທືອທຽນເຫວ້ໃຫ້ນັບມື້ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມຍຸຕິທໍາ ແລະ ສີວິໄລກ້າວຂຶ້ນຢ່າງບໍ່ຢຸດຢັ້ງ ແລະໃນປີ 2022 ຜ່ານມາ ເປັນປີທີ່ມີຄວາມໝາຍສໍາຄັນ ເຊິ່ງເປັນປີທີ່ສອງປະເທດຫວຽດນາມ-ລາວພ້ອມກັນສະຫຼອງວັນສ້າງຕັ້ງສາຍພົວພັນທາງການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ-ລາວ ຄົບຮອບ 45 ປີ ໄດ້ສຳເລັດຜົນໂດຍດີເຊິ່ງທັງໝົດນັ້ນສະແດງເຖິງຄວາມສາມັກຄີແບບພິເສດ ລະຫວ່າງສອງຊາດລາວ – ຫວຽດນາມ, ຫວຽດນາມ – ລາວ ເວົ້າລວມ, ເວົ້າສະເພາະ ກໍ່ຄືເຊກອງແລະແຂວງເທືອທຽນເຫວ້ ນັບມື້ເຂົ້າສູ່ລ່ວງເລິກແລະມີບາດກ້າວໃໝ່ໃຫຍ່ຫຼວງກ່ວາເກົ່າ.

           ຂະນະທີ່ ທ່ານ ຟານ ງັອກ ທໍ້ ຮອງເລຂາພັກແຂວງເທືອທຽນເຫວ້ ກໍໄດ້ກ່າວສະແດງຄວາມຂອບໃຈມາຍັງທ່ານ ດົງເພັດ ພະຍົນ ຮອງເລຂາພັກແຂວງເຊກອງ ພ້ອມຄະນະ ທີ່ໄດ້ເຂົ້າມາອວຍພອນງານບຸນປີໃໝ່ຫວຽດນາມຄສ2023ນີ້,ສຸດທີ່ມີຄວາມໝາຍສຳຄັນອັນເລິກເຊິ່ງເພາະສະແດງເຖິງໄມຕີຈິດມິດຕະພາບອັນດູດດື່ມ, ສະໜິດສະໜົມ, ຄວາມສາມັກຄີແບບພິເສດລະຫວ່າງສອງຊາດລາວ-ຫວຽດນາມ ໂດຍສະເພາະສອງແຂວງເຊກອງ-ເທືອທຽນເຫວ້ທີ່ເປັນມູນເຊື້ອມາແຕ່ດົນນານ ເຊິ່ງຍາມໃດກໍໄດ້ອູ້ມຊູຊ່ວຍເຫຼືອເຊິ່ງກັນ ແລະ ກັນຕະຫຼອດມາ,ນອກນັ້ນຍັງເປັນການເສີມຂະຫຍາຍສາຍພົວພັນສັນຍາທັງສອງຝ່າຍ ທີ່ໄດ້ຕົກລົງຮ່ວມກັນໃນກອງປະຊຸມຜູ້ແທນຂັ້ນສູງຂອງສອງແຂວງ ທີ່ໄດ້ຕົກລົງຮ່ວມກັນໃນຊຸມປີຜ່ານມາຕື່ມອີກ.

#ຂ່າວ-ພາບ: ວິລະກອນ ຄຳວິໄລ.