ລະຫວ່າງວັນທີ 12-14 ມັງກອນ 2023 ຜ່ານມານີ້, ຄະນະຜູ້ແທນຂັ້ນສູງແຂວງເຊກອງ ສປປ ລາວ ນຳໂດຍ ສະຫາຍ ເຫຼັກໄຫຼ ສີວິໄລ ກຳມະການສູນກາງພັກ,ເລຂາພັກແຂວງ, ເຈົ້າແຂວງໆເຊກອງ ໄດ້ນຳພາຄະນະເຂົ້າຢ້ຽມຂ່ຳນັບ ແລະອວຍພອນ ຄະນະພັກ-ຄະນະນຳ ຢູ່ 2 ແຂວງພາກກາງຂອງ ສສ ຫວຽດນາມ ຄື: ແຂວງກວາງນາມ ແລະ ແຂວງກອນຕູມ ເນື່ອງໃນໂອກາດບຸນປີໃໝ່ປະຈຳຊາດຫວຽດນາມທີ່ຈະມາເຖິງໃນມໍ່ໆນີ້ ໂດຍການຕ້ອນຮັບອັນອົບອຸ່ນແລະສະໜິດສະໜົມຈາກການນຳພັກ-ລັດກໍ່ຄືປະຊາຊົນບັນດາເຜົ່າສອງແຂວງດັ່ງກ່າວ.
ຂະນະທີ່ ທ່ານ ນາງ ຄໍາເສັງ ທຸມມະວົງສາ ກໍາມະການພັກແຂວງ, ຮອງປະທານສະພາປະຊາຊົນແຂວງ ເຊກອງ ກໍໄດ້ເດີນທາງຮ່ວມກັບຄະນະດັ່ງກ່າວ.
ໂອກາດອັນສະຫງ່າລາສີນີ້, ສະຫາຍ ເຫຼັກໄຫຼ ສີວິໄລ ໄດ້ກ່າວວ່າ: ຄະນະພັກ-ຄະນະນຳກໍ່ຄືປະຊາຊົນສອງຊາດລາວ-ຫວຽດນາມມີມູນເຊື້ອຄວາມສາມັກຄີຮັກແພງຢ່າງສະໜິດແໜ້ນແລະຮ່ວມມືແບບພິເສດຮອບດ້ານມາແຕ່ດົນນານ ໂດຍສະເພາະແຂວງເຊກອງກັບບັນດາແຂວງພາກກາງຂອງ ສສ ຫວຽດນາມ ຊຶ່ງໃນປີ 2022 ຜ່ານມາ,ສອງພັກ-ສອງລັດແລະປະຊາຊົນສອງຊາດລາວ-ຫວຽດນາມເວົ້າລວມ,ເວົ້າສະເພາະແຂວງເຊກອງກັບ ແຂວງກວາງນາມ ແລະ ແຂວງກອນຕູມ ຄະນະຜູ້ແທນຂັ້ນສູງໄດ້ຜັດປ່ຽນກັນໄປຢ້ຽມຢາມເຮັດວຽກຮ່ວມກັນຢ່າງຕໍ່ເນື່ອງຕິດພັນກັບການສະເຫຼີມສະຫຼອງສອງວັນສຳຄັນຄື:ວັນສ້າງຕັ້ງສາຍພົວພັນການທູດຄົບຮອບ 60 ປີແລະວັນເຊັນສົນທິສັນຍາມິດຕະພາບ,ການພົວພັນພິເສດແລະການຮ່ວມມືຮອບດ້ານຄົບຮອບ 45 ປີ ອັນໄດ້ເຮັດໃຫ້ບັນຍາກາດແລະເນື້ອໃນການພົວພັນຮ່ວມມືໄດ້ຮັບການເພີ່ມພູນຄູນສ້າງແລະເລີກເຊິ່ງຍິ່ງໆຂື້ນ. ແນວໃດກໍ່ຕາມສຳລັບປີ 2023 ນີ້ ແມ່ນເປັນປີເລີ່ມຕົ້ນຜັນຂະຫຍາຍບົດບັນທຶກການຮ່ວມມືທີ່ພວກເຮົາໄດ້ລົງນາມຮ່ວມກັນ ໂດຍສະເພາະ ບັນດາໜ້າວຽກ ແລະ ບັນດາກິດຈະກິດຕ່າງໆທີ່ໄດ້ເປັນເອກະພາບກັນນັ້ນຈະໄດ້ຮັບການຈັດຕັ້ງປະຕິບັດໃຫ້ປະກົດຜົນເປັນຈິງ.
ໃນການຢ້ຽມຢາມຄັ້ງນີ້ຕາງໜ້າຄະນະພັກ-ຄະນະນຳ ກໍ່ຄື ປະຊາຊົນບັນດາເຜົ່າແຂວງເຊກອງ, ສະຫາຍໄດ້ກ່າວຄຳອວຍພອນໄຊອັນປະເສີດມາຍັງ ຄະນະພັກ-ຄະນະນຳ ກໍຄື ປະຊາຊົນ ເຊື້ອສາຍຫວຽດນາມ ທຸກທົ່ວໜ້າຈົ່ງມີ ສຸຂະພາບເຂັ້ມແຂງ, ມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນພາລະກິດຂອງຕົນ, ພ້ອມກັນເພີ່ມພູນຄູນສ້າງ ສາຍພົວພົວມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງຊາດ ລາວ-ຫວຽດນາມ ໃຫ້ໝັ້ນຄົງຂະໜົງແກ່ນແລະນັບມື້ໄດ້ຮັບການເສີມຂະຫຍາຍ ຢ່າງບໍ່ຢຸດຢັ້ງ.
ໂອກາດດຽວກັນຄະນະຜູ້ແທນຂັ້ນສູງແຂວງເຊກອງຍັງໄດ້ເຂົ້າຢ້ຽມບູຊາ,ຈູດທູບທຽນ ແລະ ວາງພວງມາລາທີ່ອະນຸສາວະລີຂອງແຂວງກວາງນາມ ແລະ ແຂວງກອນຕູມ ໂດຍການນຳພາຂອງການນຳພັກ-ລັດຂອງສອງແຂວງດັ່ງກ່າວຕື່ມອີກ.
#ໂດຍ: ຂັນຄໍາ.