ໃນຕອນແລງຂອງວັນທີ 27 ທັນວາ 2022 ນີ້, ຢູ່ທີ່ຫ້ອງປະຊຸມຫ້ອງວ່າການແຂວງ ໄດ້ເປີດກອງປະຊຸມ ພົບປະແລກປ່ຽນບົດຮຽນ ລະຫວ່າງ ຫ້ອງວ່າການແຂວງ ແລະ ຄະນະເລຂາທິການ ສະພາປະຊາຊົນແຂວງ ຂຶ້ນໂດຍພາຍໃຕ້ການເປັນປະທານຮ່ວມຂອງ ທ່ານ ອານຸເດດ ສີຄຳໄຊ ກຳມະການພັກແຂວງ ຫົວໜ້າຫ້ອງວ່າການແຂວງ ແລະ ທ່ານ ຄຳຟອງ ກົ້ວມີໄຊ ກຳມະການຄະນະປະຈຳ ເລຂາທິການສະພາປະຊາຊົນແຂວງ ມີບັນດາທ່ານ ຮອງເລຂາທິການ, ຮອງຫົວໜ້າຫ້ອງວ່າການ, ຫົວໜ້າ, ຮອງຫົວໜ້າຂະແໜງ ຕະຫຼອດຮອດພະນັກງານ-ລັດຖະກອນ ທັງສອງພາກສ່ວນເຂົ້າຮ່ວມ.

              ໃນວາລະກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານ ປະຈຳປີ 2022 ຈາກຜູ້ຕ່າງໜ້າທັງສອງພາກສ່ວນ ຈາກນັ້ນໄດ້ພ້ອມກັນແລກປ່ຽນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເພື່ອໃຫ້ຮັບຮູ້, ເຂົ້າໃຈແຈ້ງ ກ່ຽວກັບໜ້າທີ່ ພາລະບົດບາດ, ການເຄື່ອນໄຫວວຽກງານ ຂອງກັນ ແລະ ກັນ ເພື່ອນຳມາເປັນບົດຮຽນ ໃນການປັບປຸງວຽກງານ, ຂອດການປະສານງານ ໃນການເປັນເສນາທິການໃຫ້ແກ່ການນຳຂອງຕົນ ກໍ່ຄືວຽກງານ ຂອງທັງສອງຝ່າຍໃຫ້ມີຄວາມເປັນເອກະພາບໄປໃນທິດທາງດຽວກັນ ແລະ ໄດ້ຮັບການພັດທະນາດີຂື້ນເປັນກ້າວໆ.

              ຕອນທ້າຍ ປະທານກອງປະຊຸມຍັງໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນທ່ານສະແດງຄວາມຍ້ອງຍໍຊົມເຊີຍ ແລະ ໄດ້ຕີລາຄາສູງຕໍ່ຜົນສຳເລັດການຈັດຕັ້ງປະຕິບັດວຽກງານ ຂອງສອງພາກສ່ວນໃນໄລຍະຜ່ານມາ ດ້ວຍຄວາມຮັບຜິດຊອບສູງ ແລະ ມີຜົນສຳເລັດໃນຫຼາຍໆດ້ານ, ພ້ອມນັ້ນ ທ່ານຍັງໄດ້ເໜັ້ນໜັກໃຫ້ທັງສອງພາກສ່ວນພ້ອມກັນເອົາໃຈໃສ່ໃນການປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດສູງ, ກຳຈັດບັນດາຈຸດອ່ອນຂໍ້ຄົງຄ້າງໃຫ້ໝົດໄປ ພ້ອມທັງເສີມຂະຫຍາຍດ້ານດີຜົນງານ, ບົດຮຽນທີ່ຖອດຖອນໄດ້ ເພື່ອນຳໄປປັບປຸງກົນໄກການປະສານງານ, ແບບແຜນວິທີເຮັດວຽກ ທັງສອງພາກສ່ວນ ໃຫ້ສອດຂ້ອງກົມກ່ຽວ ແລະ ທັນສະໄໝເທື່ອກ້າວ, ສືບຕໍ່ສ້າງເງື່ອນໄຂ ພົວພັນປະສານງານແລກປ່ຽນວຽກງານຮອບດ້ານເຊິ່ງກັນ ແລະ ກັນ ໃຫ້ນັບມື້ນັບດີຂຶ້ນເລື້ອຍໆ.

ພາບ ແລະ ຂ່າວ: ສພຂ ຫົວພັນ