ຕອນບ່າຍຂອງວັນທີ 12 ມັງກອນ 2023 ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຜູ້ຊີ້ນຳວຽກງານອົງການໄອຍະການປະຊາຊົນ, ພະແນກຍຸຕິທຳ ແລະ ສານປະຊາຊົນແຂວງ ພ້ອມດ້ວຍຄະນະລົງຢ້ຽມຢາມ, ໂອ້ລົມພະນັກງານຢູ່ອົງການໄອຍະການປະຊາຊົນແຂວງ ມີຜູ້ເຂົ້າຮ່ວມທັງຫມົດ22 ທ່ານ ,ຍິງ 9 ທ່ານ

ໃນກອງປະຊຸມ ທ່ານ ນາງ ວອນແສງ ບົວດອກທອງ ຫົວໜ້າອົງການໄອຍະການປະຊາຊົນແຂວງ ໄດ້ລາຍງານຫຍໍ້ຂອງອົງການໄອຍະການປະຊາຊົນແຂວງກ່ຽວກັບຜົນງານການຈັດຕັ້ງປະຕິບັດວຽກງານຂອງອົງການໄອຍະການຂໍ້ສະດວກ, ຂໍ້ຫຍຸ້ງຍາກ ໃນໄລຍະຜ່ານມາ ພ້ອມທັງສະເໜີບັນຫາທີຍັງພົບຄວາມຫຍຸ້ງຍາກໃນການຈັດຕັ້ງປະຕິບັດວຽກງານຕົວຈິງ

ແລະໃນຕອນເຊົ້າຂອງວັນທີ 13 ມັງກອນ 2023 ທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຜູ້ຊີ້ນຳວຽກງານອົງການໄອຍະການປະຊາຊົນ, ພະແນກຍຸຕິທຳ ແລະ ສານປະຊາຊົນແຂວງ ພ້ອມດ້ວຍຄະນະລົງຢ້ຽມຢາມ, ໂອ້ລົມພະນັກງານຢູ່ພະແນກຍຸຕິທຳແຂວງ ມີຜູ້ເຂົ້າຮ່ວມທັງຫມົດ 30 ທ່ານ ,ຍິງ 14 ທ່ານ

ໃນກອງປະຊຸມໄດ້ຮັບຟັງ ທ່ານ ນາງ ມະລີພອນ ນາບຸນແພງ ກຳມະການພັກແຂວງ ຫົວໜ້າພະແນກຍຸຕິທຳແຂວງ ໄດ້ລາຍງານຫຍໍ້ຂອງພະແນກຍຸຕິທຳແຂວງເຊິ່ງທ່ານໄດ້ລາຍງານກ່ຽວກັບຜົນງານການຈັດຕັ້ງປະຕິບັດວຽກງານຂອງພະແນກຍຸຕິທຳແຂວງ, ຂໍ້ສະດວກ, ຂໍ້ຫຍຸ້ງຍາກ ໃນໄລຍະຜ່ານມາ ພ້ອມທັງສະເໜີບັນຫາທີ່ຍັງພົບຄວາມຫຍຸ້ງຍາກໃນການຈັດຕັ້ງປະຕິບັດວຽກງານຕົວຈິງ

ໃນຕອນທ້າຍ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ຜູ້ຊີ້ນຳວຽກງານອົງການໄອຍະການປະຊາຊົນ, ພະແນກຍຸຕິທຳ ແລະ ສານປະຊາຊົນແຂວງ ໄດ້ມີຄຳເຫັນໂອ້ລົມ ແລະ ເນັ້ນໜັກ ເຊິ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງອົງການໄອຍະການປະຊາຊົນແຂວງ ແລະ ພະແນກຍຸຕິທຳແຂວງໃນໄລຍະຜ່ານມາ ພ້ອມທັງເນັ້ນໜັກໃຫ້ເພີ່ມທະວີຄວາມກະຕື້ລື້ລົ້ນຄວາມເປັນເຈົ້າການຄວາມເປັນແບບຢ່າງທີ່ດີ, ເອົາໃຈໃສ່ ສ້າງແຜນການແຜນງານລະອຽດເພື່ອແກ້ໄຂບັນຫາຄົງຄ້າງ, ເພີ່ມທະວີຄວາມຮັບຜິດຊອບຕໍ່ຫນ້າທີ່ວຽກງານທີໄດ້ຮັບມອບຫມາຍ,  ເພີ່ມທະວີຄວາມເຄັ່ງຄັດເຂັ້ມງວດໃນການຈັດຕັ້ງປະຕິບັດໜ້າທີ່ວຽກງານ, ສືບຕໍ່ເຮັດວຽກງານການເມືອງນຳພາແນວຄິດໃຫ້ດີ, ວຽກງານກໍ່ສ້າງພັກກໍ່ສ້າງພະນັກງານ, ເພີ່ມຄວາມສາມັກຄີເປັນເອກະພາບ,ເພີ່ມທະວີການຕິດຕາມກວດກາການຈັດຕັ້ງປະຕິບັດກົດຫມາຍແຕ່ລະຂົງເຂດວຽກງານໃຫ້ດີຂຶ້ນກວ່າເກົ່າ.

ໂດຍ ນາງ ອຳພອນ ສີປະເສີດ