ວັນທີ 20 ທັນວາ 2022 ນີ້,​ ຄະນະເລຂາທິການສະພາປະຊາຊົນ​ ແຂວງຫົວພັນ ໄດ້ຈັດກອງປະຊຸມສະຫຼຸບວຽກງານຄະນະເລຂາທິການສະພາປະຊາຊົນ ແຂວງຫົວພັນ ປະຈໍາປີ 2022 ແລະ ທິດທາງແຜນການປີ 2023 ຂຶ້ນ​ ທີ່ຫ້ອງປະຊຸມ ສະພາປະຊາຊົນ​ແຂວງ ໂດຍການເປັນປະທານຂອງທ່ານ ຄຳຟອງ ກົ້ວມີໄຊ ກຳມະການຄະນະປະຈຳ, ເລຂາທິການສະພາປະຊາຊົນ ແຂວງຫົວພັນ ເປັນກຽດເຂົ້າຮ່ວມຂອງທ່ານ ສົມສັກ ດອນຈານິດ ກຳມະການພັກແຂວງ, ຮອງປະທານສະພາປະຊາຊົນແຂວງ ຜູ້ຊີ້ນຳວຽກງານຄະນະເລຂາທິການສະພາປະຊາຊົນແຂວງ, ມີບັນດາທ່ານຄະນະປະຈຳ, ຄະນະກຳມະການ, ຄະນະເລຂາທິການ, ຜູ້ຕາງໜ້າຈາກຫ້ອງວ່າການແຂວງ, ຜູ້ຊ່ວຍວຽກ ສສຂ ປະຈໍາເຂດເລືອກຕັ້ງເມືອງຊໍາເໜືອ ແລະ ພະນັກງານ-ລັດຖະກອນພາຍໃນສະພາປະຊາຊົນແຂວງ​ ເຂົ້າຮ່ວມທັງໝົດ.

ໃນກອງປະຊຸມ ໄດ້ຮັບຟັງການຜ່ານຮ່າງບົດສະຫລຸບວຽກງານຄະນະເລຂາທິການ ສະພາປະຊາຊົນ​ ແຂວງຫົວພັນ​ ປະຈຳປີ 2022 ແລະ ທິດທາງແຜນການປີ 2023 ຈາກທ່ານ ສຸກມີໄຊ ສິງບຸນເຮືອງ ຮອງເລຂາທິການ ສະພາປະຊາຊົນແຂວງ, ເຊິ່ງກອງປະຊຸມໄດ້ສະຫລຸບຕີລາຄາຄືນບັນດາຜົນງານການເຄື່ອນໄຫວວຽກງານຄະນະເລຂາທິການ ປະຈຳປີ 2022 ແລະ ກາໍນົດທິດທາງແຜນການ ປະຈໍາປີ 2023 ຂອງຄະນະເລຂາທິການສະພາປະຊາຊົນແຂວງ, ຈາກນັ້ນບັນດາທ່ານທີ່ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດ, ຄຳເຫັນໃສ່ຮ່າງບົດສະຫຼຸບ ເພື່ອໃຫ້ມີເນື້ອໃນຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້, ພ້ອມນີ້ ບັນດາທ່ານເຂົ້າຮ່ວມກອງປະຊຸມຍັງໄດ້ມີຄຳເຫັນເພື່ອເປັນການແລກປ່ຽນບົດຮຽນ ກັບບັນດາຂະແໜງ ທີ່ເປັນເສນາທິການໃຫ້ແກ່ຄະນະເລຂາທິການສະພາປະຊາຊົນແຂວງ ເປັນຕົ້ນແບບແຜນວິທີເຮັດວຽກ,ກົນໄກການປະສານງານ, ວຽກງານເລຂານຸການ, ບໍລິຫານ-ພິທີການ ແລະ ອື່ນໆ ເພື່ອເຮັດໃຫ້ວຽກງານຄະນະເລຂາທິການສະພາປະຊາຊົນແຂວງ ມີຄວາມພ້ອມຮອບດ້ານໃນການເປັນເສນາທິການໃຫ້ແກ່ຄະນະປະຈຳສະພາປະຊາຊົນແຂວງ ໄດ້ເຄື່ອນໄຫວວຽກງານ ຕາມສິດ, ພາລະບົດບາດ ທີ່ກົດໝາຍກຳນົດໄວ້.

ຕອນທ້າຍ ກອງປະຊຸມ​ ທ່ານ ສົມສັກ ດອນຈານິດ ກໍາມະການພັກແຂວງ, ຮອງປະທານສະພາປະຊາຊົນ ແຂວງຫົວພັນ ຜູ້ຊີ້ນຳວຽກງານຄະນະເລຂາທິການສະພາປະຊາຊົນແຂວງ ໄດ້ມີຄໍາເຫັນໂອ້ລົມ ກ່ອນອື່ນໝົດ ທ່ານສະແດງຄວາມຍ້ອງຍໍຊົມເຊີຍຕໍ່ຜົນງານຫຼາຍດ້ານ ທີ່ຄະນະເລຂາທິການ ກໍ່ຄືບັນດາພະນັກງານ-ລັດຖະກອນຍາດມາໄດ້ໃນໄລຍະ 1 ປີຜ່ານມາ ບົນພື້ນຖານຄວາມສາມັກຄີເປັນເອກະພາບ ພ້ອມກັນເຮັດສຳເລັດໜ້າທີ່ການເມືອງຂອງຕົນ, ຄຽງຄູ່ກັບຜົນງານດັ່ງກ່າວ ທ່ານຍັງໄດ້ຮຽກຮ້ອງໃຫ້ຄະນະເລຂາທິການເອົາໃຈໃສ່ ນຳພາ – ຊີ້ນໍາສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ – ລັດຖະກອນ ເປັນບັນຫາສໍາຄັນຕົ້ນຕໍ, ປັບປຸງແກ້ໄຂບັນຫາຂໍ້ຄົງຄ້າງໃຫ້ໝົດໄປ, ບຸກບືນສູ້ຊົນໃນການຄົ້ນ      ຄ້ວາກຳແໜ້ນ ລະບຽບກົດໝາຍ, ຮັກສາມູນເຊື້ອຄວາມສາມັກຄີເປັນເອກະພາບພາຍໃນແໜ້ນແຟ້ນ ແລະ ພາຍນອກກວ້າງຂວາງ, ພ້ອມກັນ ສືບຕໍ່ຈັດຕັ້ງປະຕິບັດວຽກງານຂອງຕົນ ໃຫ້ມີຜົນສຳເລັດຫຼາຍຂຶ້ນກວ່າເກົ່າໃນຕໍ່ໜ້າ.

ພາບ ແລະ ຂ່າວ: ສພຂ ຫົວພັນ