(ສພຊ) ເພື່ອສະຫຼຸບ, ຕີລາຄາການເຄື່ອນໄຫວວຽກງານໃນປີ 2022 ແລະ ທິດທາງແຜນການເຄື່ອນໄຫວວຽກງານໃນປີ 2023 ຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຊຸດທີ IX; ເພື່ອຮັບຟັງການປະກອບຄຳຄິດ, ຄຳເຫັນ, ຄຳສະເໜີ, ຄວາມສົນໃຈຂອງກໍາມະການ, ຂອງຕົວແທນຂະແໜງການທີ່ກ່ຽວຂ້ອງ, ແຂກຖືກເຊີນເຂົ້າຮ່ວມກອງປະຊຸມ ແລະ ສ້າງຄວາມເປັນເອກະພາບ ຫັນເປັນມະຕິຂອງກອງປະຊຸມຄົບຄະນະກໍາມາທິການ ທັງເພື່ອຮັບຮອງເອົາມະຕິຂອງກອງປະຊຸມຄົບຄະນະຂອງກຳມາທິການ ປະຈຳປີ 2022. ໃນວັນທີ 9 ມັງກອນ 2023 ທີ່ສະພາແຫ່ງຊາດ ກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ໄດ້ຈັດກອງປະຊຸມຄົບຄະນະຂອງຕົນ ໂດຍການເປັນປະທານຂອງທ່ານ ພົຕ. ປອ. ວົງສັກ ພັນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ, ເຂົ້າຮ່ວມມີທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການປ້ອງກັນຊາດ-ປ້ອງກັນຄວາມສະຫງົບ, ມີບັນດາປະທານ-ຮອງປະທານກຳມາທິການ, ຄະນະເລຂາທິການພາຍໃນສະພາແຫ່ງຊາດ, ຄະນະກຳມະການທີ່ສັງກັດກຳມາທິການປ້ອງກັນຊາດ-ປ້ອງກັນຄວາມສະຫງົບ 17 ເຂດເລືອກຕັ້ງ ພ້ອມດ້ວຍແຂກຖືກເຊີນ.

ກອງປະຊຸມ ໄດ້ຮັບຟັງການຜ່ານຮ່າງບົດສະຫຼຸບ, ຕີລາຄາການເຄື່ອນໄຫວວຽກງານໃນປີ 2022 ຜ່ານມາ ແລະ ທິດທາງແຜນການເຄື່ອນໄຫວວຽກງານ ປີ 2023 ຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ສະເໜີໂດຍທ່ານ ພົວ. ປອ. ມາລາ ວິລະຈິດ ຮອງປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ. ພ້ອມນັ້ນ, ຍັງໄດ້ຮັບຟັງການລາຍງານຂອງບັນດາທ່ານຄະນະປະສານງານຈາກກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນັກຮົບເກົ່າແຫ່ງຊາດລາວ ທີ່ໄດ້ລາຍງານກ່ຽວກັບການພັດທະນາເຂດຈຸດສຸມ, ການພັດທະນາໝູ່ບ້ານ ລຽບຕາມຊາຍແດນ ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ; ບັນຫາປາກົດການຫຍໍ້ທໍ້ເກີດຂຶ້ນໃນສັງຄົມປັດຈຸບັນ ແລະ ມາດຕະການແກ້ໄຂ ແລະ ຍຸດທະສາດພັດທະນາສະຫະພັນນັກຮົບເກົ່າລາວໃນໄລຍະໃໝ່.

ໂອກາດດັ່ງກ່າວ, ຍັງໄດ້ຮັບຟັງບົດລາຍງານ ຂອງບັນດາທ່ານ ກຳມະການສັງກັດກຳມາທິການ ກ່ຽວກັບຜົນຂອງການຕິດຕາມກວດກາວຽກງານ ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ ໃນເຂດເລືອກຕັ້ງຂອງຕົນ ໃນປີ 2022 ຜ່ານມາ ແລະ ທິດທາງຕິດຕາມກວດກາ ໃນປີ 2023; ການປະກອບຄຳຄິດ, ຄຳເຫັນຂອງບັນດາທ່ານກຳມະການ ກໍຄືຜູ້ແທນກອງປະຊຸມ ຕໍ່ບົດລາຍງານຕ່າງໆທີ່ໄດ້ລາຍງານໃນກອງປະຊຸມ ເພື່ອຄວາມເປັນເອກະພາບ ແລະ ຮັບຮອງເອົາມະຕິຂອງກອງປະຊຸມຄົບຄະນະຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຊຸດທີ IX ປະຈຳປີ 2022.

ໃນຕອນທ້າຍ, ທ່ານ ພົທ. ສຸວອນ ເລືອງບຸນມີ ຍັງໄດ້ມີຄຳເຫັນໂອ້ລົມ ໃຫ້ທິດຊີ້ນຳຕໍ່ກອງປະຊຸມ ເຊິ່ງທ່ານໄດ້ເນັ້ນບາງບັນຫາສຳຄັນ ໂດຍສະເພາະແມ່ນວຽກງານທາງດ້ານນິຕິບັນຍັດ, ການຕົກລົງບັນຫາສຳຄັນພື້ນຖານຂອງຊາດ, ການຕິດຕາມກວດກາ, ການສ້າງຄວາມເຂັ້ມແຂງ, ການພົວພັນຕ່າງປະເທດ ແລະ ກຳມະການສັງກັດກຳມາທິການ ປະຈຳເຂດເລືອກຕັ້ງ ຕ້ອງມີການເພີ່ມທະວີເອົາໃຈໃສ່ ແລະ ປະສານສົມທົບກັບພາກສ່ວນກ່ຽວຂ້ອງ ເພື່ອເຮັດໃຫ້ວຽກງານສຳເລັດ ແລະ ບັນລຸໄດ້ຕາມລະດັບຄາດໝາຍທີ່ວາງໄວ້ ຢ່າງມີປະສິດທິພາບ ແລະ ປະສິດທິຜົນ.

(ພາບ ແລະ ຂ່າວ: ນາງ ປາກາລັກ ພົມມີໄຊ)