ຕອນບ່າຍຂອງວັນພະຫັດ, ວັນທີ 22 ທັນວາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ, ໜ່ວຍພັກ ສະພາປະຊາຊົນແຂວງອຸດົມໄຊ ໄດ້ດຳເນີນຊີວິດປະຈຳເດືອນ 12 ປີ 2022, ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາໜ່ວຍພັກສະພາປະຊາຊົນແຂວງ, ມີສະຫາຍ ຄໍາເຜີຍ ງອນວັນຄຳ ກຳມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ບັນດາສະຫາຍສະມາຊິກພັກສົມບູນ-ສໍາຮອງພາຍໃນໜ່ວຍພັກ ສະພາປະຊາຊົນແຂວງ ເຂົ້າຮ່ວມ.

ການດຳເນີນຊີວິດພັກໃນຄັ້ງນີ້, ສະຫາຍເລຂາໜ່ວຍພັກໄດ້ຜ່ານຮ່າງບົດສະຫຼຸບການເຄື່ອນໄຫວ ນຳພາ-ຊີ້ນຳ ຂອງຄະນະພັກສະພາປະຊົນແຂວງ ປະຈໍາເດືອນ 12 ປີ 2022 ແລະ ວາງທິດທາງແຜນການ ປະຈໍາເດືອນ 1 ປີ 2023, ຫລັງຈາກນັ້ນ ຜູ້ເຂົ້າຮ່ວມໄດ້ປະກອບຄໍາເຫັນໃສ່ຮ່າງບົດສະຫຼຸບການເຄື່ອນໄຫວດັ່ງກ່າວ, ຕໍານິສົ່ງຂ່າວ, ກໍ່ສ້າງເຊິ່ງກັນ ແລະ ກັນ ພາຍໃນໜ່ວຍພັກຢ່າງກົງໄປກົງມາ ເປັນປົກກະຕິ.  ຕອນທ້າຍ, ສະຫາຍເລຂາໜ່ວຍພັກ ໄດ້ມີຄຳເຫັນສະຫລຸບ, ທ່ານໄດ້ສະແດງຄວາມຂອບໃຈຕໍ່ການປະກອບຄໍາເຫັນ, ມີຄຳສະເໜີແລກປ່ຽນຂອງສະມາຊິກພາຍໃນໜ່ວຍ ແລະ ໄດ້ເນັ້ນໜັກໃຫ້ສະມາຊິກພັກຍົກສູງວຽກງານການເມືອງແນວຄິດຂອງຕົນເອງ, ບຸກບືນປະຕິບັດກົດລະບຽບຂອງພັກປະຊາຊົນປະຕິວັດລາວ-ກົດຫມາຍຂອງລັດ, ຝຶກຝົນຫລໍ່ຫລອມຕົນເອງໃຫ້ກາຍເປັນສະມາຊິກພັກດີເດັ່ນ. ເຂົ້າຮ່ວມດໍາເນີນຊີວິດແຕ່ລະເດືອນ, ເສຍເງິນສະຕິໃຫ້ປົກກະຕິ, ເຂົ້າຮ່ວມບັນດາວຽກງານຂອງອົງການຈັດຕັ້ງມະຫາຊົນ, ເສີມຂະຫຍາຍຄວາມສາມັກຄີຊ່ວຍເຫລືອເຊິ່ງກັນ ແລະ ກັນ ໃນອົງການຈັດຕັ້ງ, ໃນສັງຄົມ, ສຸມໃສ່ໃນການກະກຽມບັນດາເນື້ອໃນເອກະສານຕ່າງໆ ໃນການກະກຽມດໍາເນີນກອງປະຊຸມ ຄົບຄະນະຂອງແຕ່ລະຄະນະກໍາມະການ ແລະ ກະກຽມດຳເນີນກອງປະຊຸມສະໄໝສາມັນເທື່ອ 4 ຂອງສະພາປະຊາຊົນແຂວງ ໃຫ້ສໍາເລັດໂດຍພື້ນຖານ, ພ້ອມທັງສືບຕໍ່ປະຕິບັດຫນ້າທີ່ວຽກງານວິຊາສະເພາະຕົນຮັບຜິດຊອບໃຫ້ສໍາເລັດຕາມການມອບໝາຍ.