(ສພຊ) ເພື່ອພົບປະແລກປ່ຽນບົດຮຽນ ລະຫວ່າງ ສະມາຊິກສະພາແຫ່ງຊາດໜຸ່ມ ຂອງສະພາແຫ່ງຊາດ ແຫ່ງ ສປປລາວ ແລະ ສະມາຊິກສະພາແຫ່ງຊາດໜຸ່ມ ຂອງສະພາແຫ່ງຊາດ ແຫ່ງ ສສ.ຫວຽດນາມ, ທັງເປັນກິດຈະກຳ ສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ-ລາວ ປີ 2022 ຂອງສອງສະພາແຫ່ງຊາດ ລາວ-ຫວຽດນາມ. ຄະນະຜູ້ແທນສະມາຊິກສະພາແຫ່ງຊາດຫວຽດນາມ ນໍາໂດຍສະຫາຍ ດິງ ກົງ ສີ ຮອງປະທານກໍາມາທິການວັດທະນະທໍາ-ສຶກສາ, ຮອງປະທານຜູ້ປະຈຳການຄະນະສະມາຊິກສະພາແຫ່ງຊາດໜຸ່ມ ຂອງສະພາແຫ່ງຊາດຫວຽດນາມ ຊຸດທີ XV ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ, ໃນລະຫວ່າງວັນທີ 23-27 ທັນວາ 2022.

ໃນຕອນບ່າຍວັນທີ 23 ທັນວາ 2022 ຄະນະສະມາຊິກສະພາແຫ່ງຊາດໜຸ່ມຫວຽດນາມ ນໍາໂດຍສະຫາຍ ດິງ ກົງ ສີ ພ້ອມດ້ວຍຄະນະ ໄດ້ພົບປະ ແລະ ເຮັດວຽກກັບສະຫາຍ ແກ້ວຈະເລີນ ເຊ່ຍຢີ້ງຢ່າງ ຮອງປະທານກຳມາທິການບັນດາເຜົ່າ ພ້ອມດ້ວຍຄະນະສະມາຊິກສະພາແຫ່ງຊາດໜຸ່ມ ຂອງສະພາແຫ່ງຊາດລາວ ດ້ວຍບັນຍາກາດສະໜິດສະໜົມເປັນກັນເອງ ດ້ວຍໄມຕິຈິດຖານອ້າຍນ້ອງ. ສອງຝ່າຍ ໄດ້ແລກປ່ຽນຄໍາຄິດຄໍາເຫັນ ແລະ ບົດຮຽນນຳກັນ ກ່ຽວກັບ ການເປັນຕົວແທນແຫ່ງສິດ ແລະ ຜົນປະໂຫຍດຂອງປະເທດຊາດ ແລະ ປະຊາຊົນບັນດາເຜົ່າ; ບົດຮຽນໃນການປະຕິບັດສິດ, ໜ້າທີ່, ພາລະບົດບາດ ແລະ ການເຄື່ອນໄຫວຂອງສະມາຊິກສະພາແຫ່ງຊາດໜຸ່ມ, ບົດຮຽນ ແລະ ປະສົບການໃນການເຄື່ອນໄຫວວຽກງານ ຢູ່ເວທີລັດຖະສະພາພາກພື້ນ ແລະ ສາກົນ ເປັນຕົ້ນ AIPA, IPU, APPF ແລະ ອົງການອື່ນໆ ຂອງສະມາຊິກສະພາແຫ່ງຊາດໜຸ່ມ. ສອງຝ່າຍ ໄດ້ເປັນເອກະພາບກັນຕໍ່ກັບທິດທາງແຜນການຮ່ວມມືໃນຕໍ່ໜ້າ ເປັນຕົ້ນ ສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນໃນຂັ້ນຕ່າງໆ ຂອງສອງສະພາແຫ່ງຊາດ ລາວ-ຫວຽດນາມ, ການປະກອບສ່ວນຮັດແໜ້ນການພົວພັນຮ່ວມມື ລະຫວ່າງ ສອງອົງການນິຕິບັນຍັດ ກໍຄືສືບຕໍ່ຈັດຕັ້ງປະຕິບັດບົດບັນທຶກການຮ່ວມມື ທີ່ໄດ້ລົງນາມຮ່ວມກັນລະຫວ່າງສອງສະພາແຫ່ງຊາດ ຂອງສອງປະເທດ.

ໃນວັນດຽວກັນ, ສະຫາຍ ດິງ ກົງ ສີ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບສະຫາຍ ຈະເລີນ ເຍຍປາວເຮີ ຮອງປະທານສະພາແຫ່ງຊາດລາວ ດ້ວຍບັນຍາກາດອົບອຸ່ນເຕັມໄປດ້ວຍໄມຕີຈິດມິດຕະພາບຖານສະຫາຍອ້າຍນ້ອງ, ສະຫາຍ ດິງ ກົງ ສີ ໄດ້ສະແດງຄວາມຂອບໃຈທີ່ ສະຫາຍ ຮອງປະທານສະພາແຫ່ງຊາດລາວ ໄດ້ໃຫ້ການຕ້ອນຮັບໃນຄັ້ງນີ້, ພ້ອມທັງໄດ້ລາຍງານຜົນການພົບປະເຮັດວຽກ ກັບຄະນະສະມາຊິກສະພາແຫ່ງຊາດໜຸ່ມ ຂອງສະພາແຫ່ງຊາດລາວ ດ້ວຍຜົນສຳເລັດອັນຈົບງາມ. ສະຫາຍ ຮອງປະທານສະພາແຫ່ງຊາດລາວ ຕີລາຄາສູງຕໍ່ການມາຢ້ຽມຢາມ ສປປລາວ ຂອງສະຫາຍ ດິງ ກົງ ສີ ແລະ ຄະນະ, ທັງເປັນການສະເຫຼີມສະຫຼອງປີສາມັກຄີມິດຕະພາບຂອງສອງຊາດ ລາວ-ຫວຽດ-ລາວ ປີ 2022, ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສຳເລັດການພົບປະເຮັດວຽກ ລະຫວ່າງ ສອງຄະນະສະມາຊິກສະພາແຫ່ງຊາດໜຸ່ມ ຂອງສອງສະພາແຫ່ງຊາດລາວ ແລະ ຫວຽດນາມ, ພ້ອມທັງໃຫ້ທິດຊີ້ນຳຕໍ່ ສອງຄະນະສະມາຊິກສະພາແຫ່ງຊາດໜຸ່ມ ລາວ-ຫວຽດນາມ ສືບຕໍ່ພົວພັນຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນ ໃນການເຄື່ອນໄຫວວຽກງານທັງໃນຂອບສອງຝ່າຍ ແລະ ຫຼາຍຝ່າຍ ໃນເວທີລັດຖະສະພາພາກພື້ນ ແລະ ສາກົນ ກໍຄືການປະກອບສ່ວນຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ໃຫ້ເຂົ້າສູ່ລວງເລິກ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ.

ໂອກາດຢ້ຽມຢາມ ສປປລາວ ໃນຄັ້ງນີ້, ສະຫາຍ ດິງ ກົງ ສີ ແລະ ຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເດີນທາງຢ້ຽມຢາມ ແລະ ເຮັດວຽກຮ່ວມກັບ ສະມາຊິກສະພາປະຊາຊົນໜຸ່ມແຂວງຊຽງຂວາງ ແລະ ສະມາຊິກສະພາປະຊາຊົນແຂວງວຽງຈັນ, ຢ້ຽມຢາມບັນດາໂຄງການ, ພື້ນຖານເສດຖະກິດ, ແຫຼ່ງທ່ອງທ່ຽວທາງທໍາມະຊາດ ແລະ ວັດທະນະທຳ ຈຳນວນໜຶ່ງ ຢູ່ນະຄອນຫຼວງວຽງຈັນ, ແຂວງຊຽງຂວາງ ແລະ ແຂວງວຽງຈັນ.