(ສພຊ) ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ເຂົ້າຮ່ວມພິທີປິດງານມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ຫຼື ຊຽງຂວາງເກມ 2022 ເຊິ່ງງານດັ່ງກ່າວ ໄດ້ເລີ່ມມາແຕ່ວັນທີ 13 ທັນວາ 2022 ແລະ ໄດ້ປິດລົງດ້ວຍຜົນສຳເລັດຢ່າງຈົບງາມ ໃນວັນທີ 22 ທັນວາ 2022 ໂດຍມີບັນດາທ່ານການນໍາພັກ-ລັດຂັ້ນສູງ, ຂັ້ນສູນກາງ ແລະ ທ້ອງຖິ່ນ ເຂົ້າຮ່ວມ.
ງານມະຫາກຳກິລາແຫ່ງຊາດ ຄັ້ງທີ XI, ມີການແຂ່ງຂັນທັງໝົດ 25 ປະເພດກິລາ, ຊິງຫຼຽນທັງໝົດ 2.500 ກວ່າຫຼຽນ, ມີທັບນັກກິລາຈາກ 17 ແຂວງ, 1 ນະຄອນຫຼວງ ແລະ 4 ກະຊວງ ເຂົ້າຮ່ວມ. ຜ່ານການແຂ່ງຂັນທັງໝົດ 25 ປະເພດກິລາ ແຂວງຊຽງຂວາງ ເຈົ້າພາບເປັນເຈົ້າຫຼຽນຄຳ ເປັນອັນດັບ 1 ຂອງຕາຕະລາງສະຫຼຸບຫຼຽນ ສາມາດຍາດໄດ້ 62 ຫຼຽນຄຳ, 60 ຫຼຽນເງິນ, 95 ຫຼຽນທອງ, ລວມ 217 ຫຼຽນ, ອັນດັບທີ 2 ນະຄອນຫຼວງວຽງຈັນ ໄດ້ 58 ຫຼຽນຄຳ, 51 ຫຼຽນເງິນ, 97 ຫຼຽນທອງ, ລວມ 206 ຫຼຽນ ແລະ ອັນດັບທີ 3 ກະຊວງປ້ອງກັນປະເທດ ໄດ້ 51 ຫຼຽນຄຳ, 49 ຫຼຽນເງິນ, 36 ຫຼຽນທອງ, ລວມ 136 ຫຼຽນ.
ໃນໂອກາດດັ່ງກ່າວ, ທ່ານ ພັນຄຳ ວິພາວັນ ນາຍົກລັດຖະມົນຕີ ໄດ້ມີຄຳເຫັນ ກ່າວປິດງານມະຫາກຳກິລາແຫ່ງຊາດ ຄັ້ງທີ XI ຢ່າງ ເປັນທາງການ ໂດຍທ່ານໄດ້ສະແດງຄວາມຍ້ອງຍໍຊົມເຊີຍຕໍ່ທຸກຂະແໜງການທີ່ກ່ຽວຂ້ອງ ເປັນຕົ້ນ ຄະນະຈັດງານກິລາ, ຄະນະກໍາມະການ, ຄະນະນັກກິລາ, ຄູເຝິກ ທີ່ໄດ້ສຸມທຸກກຳລັງແຮງ ປະກອບສ່ວນເຮັດໃຫ້ງານມະຫາກຳກິລາແຫ່ງຊາດ ຄັ້ງທີ XI ດໍາເນີນໄປດ້ວຍດີ ແລະ ປິດລົງດ້ວຍຜົນສຳເລັດອັນຈົບງາມ.
ໃນຕອນທ້າຍ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ຕາງໜ້າໃຫ້ນະຄອນຫຼວງວຽງຈັນ ຂຶ້ນຮັບທຸງກິລາແຫ່ງຊາດ ຕໍ່ຈາກແຂວງຊຽງຂວາງ ເພື່ອເປັນເຈົ້າພາບຈັດງານມະຫາກໍາກິລາແຫ່ງຊາດ ຄັ້ງທີ XII ໂດຍທ່ານໄດ້ສະແດງຄວາມຊົມເຊີຍຕໍ່ຜົນສຳເລັດຂອງການຈັດງານມະຫາກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງເປັນເຈົ້າພາບ, ພ້ອມທັງເຊີນຊວນ ໃຫ້ທຸກພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ຕະຫຼອດຮອດປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ຈົ່ງພ້ອມກັນມີສ່ວນຮ່ວມ ກໍຄື ພ້ອມກັນກະກຽມຈັດງານມະຫາກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ຈະໄດ້ຮັບກຽດເປັນເຈົ້າພາບ, ຄາດວ່າຈະຈັດຂຶ້ນໃນປີ 2025 ທີ່ຈະມາເຖິງນີ້.