(ສພຊ) ໃນຕອນເຊົ້າວັນທີ 13 ທັນວາ 2022 ນີ້, ທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ຕາງໜ້າຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນສຳເລັດການພິຈາລະນາ ບົດລາຍງານຂອງລັດຖະບານ ກ່ຽວກັບການສ້າງວິຊາຊີບ, ການພັດທະນາສີມືແຮງງານ ແລະ ວຽກເຮັດງານທໍາໃຫ້ປະຊາຊົນບັນດາເຜົ່າ ເພື່ອແກ້ໄຂບັນຫາການວ່າງງານ ໃນໄລຍະດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ວ່າ: ຕາງໜ້າຄະນະປະຈຳສະພາແຫ່ງຊາດ, ມີຄວາມຍິນດີ ແລະ ຖືເປັນກຽດຢ່າງສູງ, ແຈ້ງມາຍັງພະນັກງານ-ລັດຖະກອນ, ພໍ່ແມ່ພີ່ນ້ອງປະຊາຊົນລາວບັນດາເຜົ່າໃນທົ່ວປະເທດ ແລະ ພີ່ນ້ອງເຊື້ອຊາດລາວທີ່ອາໄສຢູ່ຕ່າງປະເທດ ຮັບຊາບຕໍ່ຜົນສຳເລັດຂອງການຄົ້ນຄວ້າ ແລະ ພິຈາລະນາວຽກງານໃນຂົງເຂດວັດທະນະທໍາ-ສັງຄົມ ກ່ຽວກັບການສ້າງວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທໍາໃຫ້ປະຊາຊົນບັນດາເຜົ່າ.

ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 9 ທັນວາ 2022 ໄດ້ຮັບຟັງການລາຍງານໂດຍສັງເຂບຈາກລັດຖະບານ ທີ່ນຳສະເໜີໂດຍທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ. ຫຼັງຈາກນັ້ນ, ຜູ້ຕາງໜ້າຄະນະປະຈໍາສະພາແຫ່ງຊາດ ໄດ້ຂຶ້ນມີຄໍາເຫັນຕໍ່ບົດລາຍງານດັ່ງກ່າວ, ບັນດາທ່ານສະມາຊິກສະພາແຫ່ງຊາດ ໄດ້ສຸມໃສ່ຄົ້ນຄວ້າ ແລະ ປະກອບຄວາມຄິດເຫັນຢ່າງກົງໄປກົງມາດ້ວຍຄວາມຮັບຜິດຊອບສູງ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າ, ພ້ອມທັງສະເໜີວິທີການ ແລະ ມາດຕະການ ເພື່ອໃຫ້ລັດຖະບານ ກໍຄືພາກສ່ວນກ່ຽວຂ້ອງນໍາໄປຄົ້ນຄວ້າ, ປັບປຸງວຽກງານດັ່ງກ່າວໃຫ້ມີຜົນສໍາເລັດດີຂຶ້ນ.

ຜູ້ແທນສ່ວນຫຼາຍແມ່ນເຫັນດີເປັນເອກະພາບ ແລະ ຊົມເຊີຍຕໍ່ລັດຖະບານ ທີ່ໄດ້ເອົາໃຈໃສ່ວຽກງານສ້າງວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທໍາໃຫ້ປະຊາຊົນບັນດາເຜົ່າ ເພື່ອແກ້ໄຂບັນຫາການວ່າງງານ ເຊິ່ງໄລຍະຜ່ານມາເຫັນວ່າ ອັດຕາການວ່າງງານຫຼຸດລົງເຫຼືອພຽງ 18%, ແຕ່ເຖິງຢ່າງໃດກໍຕາມ ຜ່ານການຕິດຕາມກວດກາຕົວຈິງຂອງສະພາແຫ່ງຊາດ, ຜູ້ແທນຍັງສະແດງຄວາມເປັນຫ່ວງເປັນໃຍ ແລະ ສະເໜີໃຫ້ລັດຖະບານ ເອົາໃຈໃສ່ແກ້ໄຂບາງດ້ານ ດັ່ງນີ້:

1) ການສ້າງ, ປັບປຸງບັນດາກົດໝາຍ ແລະ ນິຕິກຳໃຕ້ກົດໝາຍ ທີ່ກ່ຽວຂ້ອງກັບການສ້າງວິຊາຊີບ, ການພັດທະນາສີມືແຮງງານ, ການຈັດຫາວຽກເຮັດງານທໍາທີ່ມີແລ້ວ ໃຫ້ສອດຄ່ອງກັບການຂະຫຍາຍຕົວ ຂອງເສດຖະກິດ-ສັງຄົມໃນປັດຈຸບັນ ໃຫ້ເປັນລະບົບຄົບຊຸດຕື່ມ;

2) ສະເໜີລັດຖະບານ ຄົ້ນຄວ້າ, ພິຈາລະນາການລົງທຶນສ້າງ ແລະ ປັບປຸງລະບົບຖານຂໍ້ມູນ-ຂ່າວສານກ່ຽວກັບແຮງງານ, ອັດຕາການວ່າງງານ, ຕະຫຼາດແຮງງານພາຍໃນ ແລະ ຕ່າງປະເທດ ໃຫ້ລວມສູນ, ເປັນເອກະພາບ, ຈະແຈ້ງ ແລະ ເປັນລະບົບທັນສະໄໝ, ສາມາດເຊື່ອມໂຍງ ແລະ ເຂົ້າເຖິງໄດ້ງ່າຍໃນຂອບເຂດທົ່ວປະເທດ;

3) ສະເໜີໃຫ້ລັດຖະບານ ຄົ້ນຄວ້າເພີ່ມຄ່າແຮງງານຂັ້ນຕ່ຳ ເພື່ອເປັນການປັບປຸງຊີວິດການເປັນຢູ່ຂອງຜູ້ອອກແຮງງານໃຫ້ດີຂຶ້ນ, ທັງເປັນແຮງຈູງໃຈໃຫ້ຜູ້ອອກແຮງງານ ແລະ ຮັບປະກັນການມີສະຫວັດດີການທີ່ດີໃຫ້ແກ່ຜູ້ອອກແຮງງານ ຕາມກົດໝາຍກຳນົດ;

– ສະເໜີເພີ່ມອັດຕາເບ້ຍລ້ຽງໃຫ້ນັກຮຽນ ຢູ່ໂຮງຮຽນກິນນອນຊົນເຜົ່າ, ໂຮງຮຽນເຕັກນິກວິຊາຊີບ ໃຫ້ແທດເໝາະກັບຄ່າຄອງຊີບແຕ່ລະໄລຍະ ພ້ອມທັງສະໜອງງົບປະມານໃຫ້ທັນກໍານົດເວລາ;

4) ຄົ້ນຄວ້າສ້າງ ແລະ ປັບປຸງພື້ນຖານໂຄງລ່າງ, ສະໜອງອຸປະກອນການຮຽນ-ການສອນ, ສ້າງສະພາບແວດລ້ອມທີ່ເອື້ອອໍານວຍ ເພື່ອສ້າງແຮງຈູງໃຈໃຫ້ນັກຮຽນມາຮຽນ ລວມທັງຈັດສັນຄູສອນໃຫ້ພຽງພໍ;

5) ປັບປຸງ ແລະ ພັດທະນາຫຼັກສູດ, ວິທີການຮຽນ-ການສອນ, ການເຝິກວິຊາຊີບ ແລະ ການພັດທະນາສີມືແຮງງານ ໃຫ້ໄດ້ມາດຕະຖານ ສອດຄ່ອງກັບຍຸກການພັດທະນາອຸດສາຫະກໍາ 4.0, ເຕັກໂນໂລຊີດ້ານຂໍ້ມູນ ແລະ ການສື່ສານ, ທັກສະດ້ານພາສາຕ່າງປະເທດ;

6) ຊຸກຍູ້ ແລະ ສົ່ງເສີມໃຫ້ພາກເອກະຊົນ ມີສ່ວນຮ່ວມໃນການລົງທຶນ ໃສ່ວຽກງານການເຝິກວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທຳແກ່ປະຊາຊົນລາວບັນດາເຜົ່າ ໂດຍສະເພາະຢູ່ເຂດຊົນນະບົດ ຫ່າງໄກສອກຫຼີກ;

7) ຊຸກຍູ້ໃຫ້ມີສ່ວນຮ່ວມຂອງບັນດາຫົວໜ່ວຍທຸລະກິດ ກັບໂຮງຮຽນເຕັກນິກ-ວິຊາຊີບ, ສູນ, ສະຖາບັນພັດທະນາສີມືແຮງງານ ເພື່ອສ້າງແຜນພັດທະນາສີມືແຮງງານຮ່ວມກັນ ພ້ອມທັງສ້າງເງື່ອນໄຂທີ່ເໝາະສົມໃນການເຂົ້າເຖິງແຫຼ່ງທຶນ ເພື່ອປະກອບອາຊີບດ້ວຍຕົນເອງ;

8. ຈັດງານຕະຫຼາດນັດແຮງງານ ໂດຍການມີສ່ວນຮ່ວມຂອງຫຼາຍພາກສ່ວນ ເປັນແຕ່ລະໄລຍະຢູ່ແຕ່ລະທ້ອງຖິ່ນ ເພື່ອໃຫ້ແຮງງານລາວ ໄດ້ມີໂອກາດເຂົ້າເຖິງຕະຫຼາດແຮງງານຫຼາຍຂຶ້ນກວ່າເກົ່າ;

9) ເອົາໃຈໃສ່ພັດທະນາລະບົບການສະໜອງຂໍ້ມູນຂ່າວສານ ໂດຍຜ່ານພາຫະນະສື່ມວນຊົນ, ສື່ອອນລາຍ ກ່ຽວກັບການຮຽນວິຊາຊີບ ແລະ ໂຄສະນາເຜີຍແຜ່ໃຫ້ຜູ້ປົກຄອງ, ນັກຮຽນເຫັນໄດ້ຄວາມສຳຄັນຂອງການຮຽນວິຊາຊີບ, ການພັດທະນາສີມືແຮງງານ ແລະ ການສ້າງອາຊີບ ພ້ອມທັງສົ່ງເສີມໃຫ້ມີການພັດທະນາປຶ້ມແບບຮຽນ, ສົ່ງເສີມວັດທະນະທຳການອ່ານ ແລະ ການຮຽນຮູ້ກ່ຽວກັບການສ້າງວິຊາຊີບ ແລະ ວຽກເຮັດງານທໍາໃຫ້ຫຼາຍຂຶ້ນ;

10) ເພີ່ມທະວີການໂຄສະນາເຜີຍແຜ່ກົດໝາຍ ແລະ ນິຕິກຳ ກ່ຽວກັບບັນຫາແຮງງານ, ການປົກປ້ອງສັງຄົມ ເພື່ອໃຫ້ຜູ້ອອກແຮງງານ ແລະ ຜູ້ໃຊ້ແຮງງານ ໄດ້ຮັບການປົກປ້ອງຕາມກົດໝາຍກຳນົດ.

ທັງໝົດນັ້ນ, ແມ່ນໄດ້ສະແດງເຖິງຄວາມຮັບຜິດຊອບໜ້າທີ່ການເມືອງຂອງລັັດຖະບານ ໃນການສ້າງວິຊາຊີບ, ການພັດທະນາສີມືແຮງງານ ແລະ ການສ້າງວຽກເຮັດງານທໍາໃຫ້ປະຊາຊົນ ເພື່ອແກ້ໄຂບັນຫາວ່າງງານ ແລະ ຫຼຸດຜ່ອນອັດຕາການວ່າງງານ ໃຫ້ຍັງເຫຼືອ 15% ໃນປີ 2025.

ໃນນາມຕາງໜ້າຄະນະປະຈໍາສະພາແຫ່ງຊາດ ຂໍຂອບໃຈມາຍັງພະນັກງານ-ລັດຖະກອນ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າໃນທົ່ວປະເທດ ແລະ ພີ່ນ້ອງເຊື້ອຊາດລາວ ທີ່ອາໄສຢູ່ຕ່າງປະເທດ ທີ່ໄດ້ຕິດຕາມການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນຄັ້ງນີ້.

ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈ ມາຍັງສື່ມວນຊົນທຸກພາກສ່ວນ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກໍາຂ່າວ ແລະ ເຜີຍແຜ່ຢ່າງທັນການກ່ຽວກັບການດຳເນີນກອງປະຊຸມໃນຄັ້ງນີ້ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ.