(ສພຊ) ເພື່ອສະແດງຄວາມເຄົາລົບຮັກ ແລະ ລະນຶກເຖິງບຸນຄຸນ ຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ, ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານຄະນະປະຈໍາສະພາແຫ່ງຊາດ ກ່າວຄໍາສະດຸດີ ເນື່ອງໃນໂອກາດວັນຄ້າຍວັນເກີດ ປະທານ ໄກສອນ ພົມວິຫານ ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໃນວັນທີ 13 ທັນວາ 2022 ວ່າ: ມື້ນີ້, ເນື່ອງໃນໂອກາດວັນຄ້າຍວັນເກີດຂອງປະທານ ໄກສອນ ພົມວິຫານ ທີ່ແສນເຄົາລົບຮັກຂອງປະຊາຊົນລາວບັນດາເຜົ່າ ໄດ້ບັນຈົບໝູນວຽນມາຄົບຮອບ 102 ປີ (ວັນທີ 13 ທັນວາ 1920 ຫາ 13 ທັນວາ 2022) ພໍດີຖືກໄລຍະດໍາເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX.

ປະທານ ໄກສອນ ພົມວິຫານ ແມ່ນຜູ້ທີ່ໄດ້ອຸທິດຕະຫຼອດຊີວິດເພື່ອປະເທດຊາດ ແລະ ການປະຕິວັດອັນຍິ່ງໃຫຍ່ຂອງປະເທດເຮົາດ້ວຍການນໍາພາລະກິດປະຕິວັດ ຍາດເອົາໄຊຊະນະຢ່າງສົມບູນ, ເປັນຜູ້ສ້າງຕັ້ງພັກປະຊາຊົນປະຕິວັດລາວ, ທັງເປັນຜູ້ບຳລຸງ ແລະ ຖະນຸຖະໜອມກຳລັງປະກອບອາວຸດປະຕິວັດປະຊາຊົນ, ແນວລາວອິດສະຫຼະ (ແນວລາວສ້າງຊາດໃນປັດຈຸບັນ), ພັກປະຊາຊົນປະຕິວັດລາວ, ບັນດາອົງການຈັດຕັ້ງມະຫາຊົນຂອງພັກ, ນຳພາປົກປັກຮັກສາໝາກຜົນຂອງການປະຕິວັດ ແລະ ສ້າງສາພັດທະນາປະເທດຊາດ, ເປັນຜູ້ນຳພາວາງແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກຢ່າງມີໄຊ ທັງເປັນແບບຢ່າງແຫ່ງການດຳລົງຊີວິດ, ຄຸນສົມບັດສິນທຳປະຕິວັດອັນສຸດກົກສຸດປາຍ, ເປັນມໍລະດົກອັນລໍ້າຄ່າ ທັງໝົດນັ້ນ, ເປັນສິ່ງທີ່ປະເສີດຍິ່ງທີ່ປະທານ ໄກສອນ ພົມວິຫານ ໄດ້ປະໄວ້ໃຫ້ຮຸ່ນຄົນລຸ້ນສືບທອດໄດ້ຮ່ຳຮຽນເອົາເປັນແບບຢ່າງ.

ເພື່ອສະແດງຄວາມເຄົາລົບຮັກ ແລະ ລະນຶກເຖິງບຸນຄຸນ ດ້ວຍຄວາມຈົງຮັກພັກດີຕໍ່ປະທານ ໄກສອນ ພົມວິຫານ ທີ່ເຄົາລົບຮັກ, ທ່ານ ປອ. ນາງ ສູນທອນ ໄຊຍະຈັກ ຕາງໜ້າຄະນະປະທານກອງປະຊຸມ ໄດ້ເຊີນບັນດາທ່ານຜູ້ແທນກອງປະຊຸມ ກົ້ມຫົວຂ່ຳນັບ 3 ວິນາທີ.