(ສປນວ) ໃນວັນທີ 9 ທັນວາ 2022 ນີ້, ສະພາປະຊາຊົນ ນະຄອນຫຼວງວຽງຈັນ ໄດ້ຈັດພິທີປາຖະກະຖາຫວນຄືນມູນເຊື້ອ ວັນຊາດ ທີ 2 ທັນວາ ຄົບຮອບ 47 ປີ (2 ທັນວາ 1975 – 2 ທັນວາ 2022) ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 102 ປີ (13 ທັນວາ 1920 – 13 ທັນວາ 2022), ໂດຍພາຍໃຕ້ການເປັນປະທານຂອງ ທ່ານ ນາງ ລຳພອຍ ສີອັກຄະຈັນ ຄະນະປະຈຳພັກ, ຮອງປະທານສະພາປະຊາຊົນ ນວ, ມີບັນດາທ່ານ ຮອງປະທານ ຄະນະກຳມະການ ແລະ ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ແລະ ວິຊາການກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານ ນາງ ລຳພອຍ ສີອັກຄະຈັນ ກໍໄດ້ຜ່ານເນື້ອໃນເອກະສານມູນເຊື້ອວັນຊາດ ທີ 2 ທັນວາ ຄົບຮອບ 47 ປີ, ເຊິ່ງເປັນວັນແຫ່ງໄຊຊະນະຂອງການຕໍ່ສູ້ທີ່ຍືດເຍື້ອຍາວນານ, ລະອິດລະອ້ຽວ ຢ່າງພິລະອາດຫານຂອງປະຊາຊົນລາວບັນດາເຜົ່າ,ໂດຍພາຍໃຕ້ການຊີ້ນຳ – ນຳພາ ຂອງພັກປະຊາຊົນປະຕິວັດລາວ ທີ່ສະຫຼາດຫຼັກແຫຼມ, ເຊິ່ງພັກໄດ້ເຕົ້າໂຮມຄວາມສາມັກຄີຂອງປະຊາຊົນລາວບັນດາເຜົ່າ ລຸກຮື້ຂື້ນຕໍ່ສູ້ຕ້ານກັບພວກຈັກກະພັດລ່າເມືອງຂື້ນ ແບບເກົ່າ ແລະ ແບບໃໝ່ ຢ່າງອົງອາດກ້າຫານຈົນສາມາດປົດປ່ອຍປະເທດຊາດໄດ້ຢ່າງມີໄຊ ແລະ ສະຖາປານາເປັນປະເທດ ສາທາ ລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ 1975. ຫຼັງຈາກນັ້ນມາ ປະເທດຊາດເຮົາກໍ່ເລີ່ມມີຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສີວິໄລຂື້ນເທື່ອລະກ້າວ.
ວັນຊາດທີ 2 ທັນ ວາ ແມ່ນວັນທີ່ມີຄວາມໝາຍ-ຄວາມສຳຄັນ ສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ກູ້ຊາດ, ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດ ຢ່າງແທ້ຈິງ, ແມ່ນວັນທີ່ປະເທດລາວໄດ້ມີເອກະລາດ ຢ່າງສົມ ບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, ແມ່ນວັນແຫ່ງສັນ ຕິພາບກ້າວສູ່ຍຸກສະໄໝໃໝ່ ແຫ່ງການສ້າງປະເທດໃຫ້ມີສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ, ພ້ອມກັນນັ້ນ ຍັງໄດ້ຍົກໃຫ້ເຫັນຊີວິດ ແລະ ການເຄື່ອນໄຫວຂອງ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ເຊິ່ງແມ່ນລູກຮັກຫຼານແພງຂອງປະຊາຊົນລາວບັນດາເຜົ່າ, ແມ່ນຜູ້ຮັກຊາດ, ນັກປະຕິວັດຢ່າງຍິ່ງໃຫຍ່ຂອງຊາດ ແມ່ນວິລະບູລຸດ ແລະ ເປັນຜູ້ນຳຂອງພັກ-ລັດ ທີ່ປີຊາສາມາດ, ສະ ຫຼາດສ່ອງໃສ ແລະ ສະດຸ້ງໄວ, ຍັງເປັນນັກທິດສະດີ ແລະ ພຶດຕິກຳ, ເປັນນັກປຸກລະດົມຂົນຂວາຍໂຄສະນາ ທັງເປັນນັກຍຸດທະສາດ, ນັກອອກແບບຍຸດໂທບາຍ ແລະ ວິທີຈັດຕັ້ງປະຕິບັດອັນສະຫຼາດຄ່ອງແຄ່ວ, ເປັນແກ່ນສານຂອງຄວາມສາ ມັກຄີພາຍໃນພັກ ແລະ ໃນຊາດ, ເປັນຜູ້ທີ່ມີຄຸນສົມບັດ-ສິນທຳປະຕິວັດສູງສົ່ງ, ມີທັດສະນະມະຫາຊົນຢ່າງກ້ວາງຂວາງ, ເປັນຜູ້ທີ່ດຸໝັ້ນໃນການດຳລົງຊີວິດແບບງ່າຍດາຍ, ປະຢັດ ແລະ ບໍລິສຸດປອດໃສ, ທັງເປັນຜູ້ວາງແນວທາງ ແລະ ເປັນແບບຢ່າງປະຕິບັດແນວທາງການຕ່າງປະເທດຢ່າງຖືກຕ້ອງ ເຮັດໃຫ້ ສປປ ລາວ ມີບົດບາດໃນເວທີສາກົນ.
