(ສພຊ) ໃນວັນທີ 24 ພະຈິກ 2022, ທີ່ພະນົມເປັນ, ຣາຊະອານາຈັກກໍາປູເຈຍ. ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ໄດ້ສຳເລັດການເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 43. ກອງປະຊຸມດັ່ງກ່າວ ໄດ້ດຳເນີນມາແຕ່ວັນທີ 20-24 ພະຈິກ 2022 ໂດຍການເປັນປະທານຂອງ ສົມເດັດ ອັກຄະ ມະຫາ ໂປເຢຍ ຈັກກຼີ ເຮັງຊໍາຣິນ ປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ, ປະທານໄອປາ ຄັ້ງທີ 43.
ກອງປະຊຸມຄັ້ງນີ້, ຄະນະຜູ້ແທນທີ່ເຂົ້າຮ່ວມ ໄດ້ສຸມໃສ່ຄົ້ນຄວ້າ, ປຶກສາຫາລື ແລະ ແລກປ່ຽນຄຳຄິດຄຳເຫັນ ພາຍໃຕ້ຫົວຂໍ້: “ການກ້າວໄປພ້ອມກັນ ເພື່ອອາຊຽນທີ່ຍືນຍົງ, ກວມລວມ ແລະ ເຂັ້ມແຂງ” ພ້ອມທັງຄົ້ນຄວ້າ ແລະ ປະກອບຄຳເຫັນຕໍ່ບັນດາຮ່າງມະຕິທີ່ສະເໜີໃນກອງປະຊຸມຄະນະກຳມາທິການຕ່າງໆຂອງໄອປາ ຄື: ກອງປະຊຸມຄະນະສະມາຊິກລັດຖະສະພາເພດຍິງ, ກອງປະຊຸມສະມາຊິກລັດຖະສະພາໜຸ່ມ, ກອງປະຊຸມກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ ແລະ ກຳມາທິການວຽກງານພາຍໃນ ຂອງໄອປາ ເຊິ່ງໄດ້ມີການພິຈາລະນາ ຮ່າງມະຕິທັງໝົດ ຈຳນວນ 38 ສະບັບ ທີ່ປິ່ນອ້ອມຫົວຂໍ້ຂອງກອງປະຊຸມ ໂດຍສະເພາະແມ່ນການສົ່ງເສີມບົດບາດຂອງສະມາຊິກລັດຖະສະພາເພດຍິງ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງ, ການຊຸກຍູ້ການພົວພັນຮ່ວມມືຂອງຊາວໜຸ່ມ, ການສົ່ງເສີມສັນຕິພາບ, ຄວາມສາມັກຄີ, ການສົ່ງເສີມການທູດລັດຖະສະພາ, ການຮ່ວມມືຂອງລັດຖະສະພາ ເພື່ອການພັດທະນາແບບຍືນຍົງ ແລະ ການເຕີບໂຕຂອງເສດຖະກິດແບບກວມລວມ, ການສົ່ງເສີມວິສາຫະກິດຈຸລະພາກ, ຂະໜາດນ້ອຍ ແລະ ກາງ (MSMEs), ການຫັນເປັນດີຈີຕອນ, ການປົກປັກຮັກສາສັງຄົມແບບກວມລວມ, ການຮັກສາສຸຂະພາບ. ພ້ອມກັນນີ້, ກອງປະຊຸມຍັງໄດ້ມີການປັບປຸງບົດບັນທຶກການຮ່ວມມືລະຫວ່າງໄອປາ ກັບຄູ່ຮ່ວມອື່ນໆຈຳນວນໜຶ່ງ, ພ້ອມທັງເຫັນດີສ້າງຕັ້ງຫ້ອງສະໝຸດກົດໝາຍດີຈີຕອນ, ຕົກລົງເຫັນດີຮັບເອົາລັດຖະສະພາ ສ.ອາເມລິກາ, ເນປານ, ອາແຊກໄບຈັນ ແລະ ຈໍເຈຍ ເຂົ້າເປັນປະເທດສັງເກດການໃໝ່ຂອງໄອປາ ແລະ ມອບລາງວັນກຽດຕິຄຸນໃຫ້ແກ່ຜູ້ທີ່ມີຜົນງານດີເດັ່ນ 3 ທ່ານ ຈາກລັດຖະສະພາບຣູໄນ, ກຳປູເຈຍ ແລະ ຟີລິບປິນ ທີ່ໄດ້ປະກອບສ່ວນເຂົ້າໃນວຽກງານໄອປາ. ນອກຈາກນັ້ນ, ກອງປະຊຸມຍັງໄດ້ຊົມເຊີຍຕໍ່ການສຳເລັດໜ້າທີ່ການເປັນເລຂາທິການໃຫຍ່ໄອປາ ຄົນທີ 5 ຂອງທ່ານ ນາງ Nguyen Tuong Van, ຈາກ ສສ.ຫວຽດນາມ ແລະ ຮັບຮອງເອົາການແຕ່ງຕັ້ງ ທ່ານ ນາງ Siti Rozaimeriyanty DSLJ Haji Abdul Rahman, ຈາກ ບຣູໄນ ເປັນເລຂາທິການໃຫຍ່ໄອປາ ຄົນໃໝ່ ຕາມລຳດັບ.
ພ້ອມດຽວກັນນັ້ນ, ໃນການເຂົ້າຮ່ວມກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນຄັ້ງນີ້ ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມກັບຄະນະຜູ້ແທນສະມາຊິກໄອປາ ພົບປະກັບປະເທດສັງເກດການອີກ ຈໍານວນ 16 ປະເທດ ເພື່ອປຶກສາຫາລືກັນ ໃນການສົ່ງເສີມການຮ່ວມມືລະຫວ່າງໄອປາ ແລະ ບັນດາປະເທດດັ່ງກ່າວ ພາຍໃຕ້ຫົວຂໍ້: “ການສົ່ງເສີມສັນຕິພາບ, ການພັດທະນາແບບຍືນຍົງ ແລະ ການຟື້ນຟູຫຼັງການແຜ່ລະບາດຂອງພະຍາດໂຄວິດ-19”.
ໃນຕອນທ້າຍຂອງກອງປະຊຸມ, ຫົວໜ້າຄະນະຜູ້ແທນຂອງແຕ່ລະປະເທດສະມາຊິກໄອປາ ໄດ້ຮັບຮອງເອົາບົດລາຍງານຂອງກອງປະຊຸມກຳມາທິການຕ່າງໆ ແລະ ຮ່ວມກັນລົງນາມໃນຖະແຫຼງການຮ່ວມກອງປະຊຸມໃຫຍ່ສະມັດຊາ ລັດຖະສະພາລະຫວ່າງຊາດອາຊຽນ ຄັ້ງທີ 43 ພ້ອມທັງເຫັນດີຮັບຮອງເອົາ ລັດຖະສະພາອິນໂດເນເຊຍ ເປັນປະທານໄອປາ ແລະ ເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 44 ໃນປີ 2023 ທີ່ປະເທດອິນໂດເນເຊຍ.
