(ສພຊ) ວັນທີ 7 ພະຈິກ 2022, ທີ່ກະຊວງປ້ອງກັນປະເທດ ໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານປະສານງານລະຫວ່າງກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ກັບຄະນະປະສານງານກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນັກຮົບເກົ່າແຫ່ງຊາດ ໂດຍການເປັນປະທານຂອງສະຫາຍ ພົນໂທ ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ, ມີຄະນະນໍາກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ສະຫະພັນນັກຮົບເກົ່າແຫ່ງຊາດ, ບັນດາສະຫາຍຕາງໜ້າຈາກກໍາມາທິການສະພາແຫ່ງຊາດ ຊຸດທີ IX ແລະ ບັນດາສະຫາຍຈາກອົງການທີ່ກ່ຽວຂ້ອງເຂົ້າຮ່ວມ.

ສະຫາຍ ພົ.ວ ປອ. ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ໄດ້ຜ່ານບົດສະຫຼຸບຕີລາຄາການເຄື່ອນໄຫວປະສານງານໃນໄລຍະ 10 ເດືອນ ປີ 2022, ທິດທາງແຜນການທ້າຍປີ 2022 ແລະ ແຜນການປະຈຳປີ 2023 ເຊິ່ງໄດ້ຍົກໃຫ້ເຫັນ ການຊີ້ນຳ-ນຳພາ ຂອງແຕ່ລະພາກສ່ວນ ໃນການຊຸກຍູ້ຈັດຕັ້ງປະຕິບັດຂໍ້ຕົກລົງຮ່ວມໃຫ້ແກ່ການປະສານສົມທົບກັບພາກສ່ວນທີ່ກ່ຽວຂ້ອງແຕ່ຫົວທີ ແມ່ນເປັນຜົນດີຕໍ່ການແກ້ໄຂວຽກງານດ້ານຕ່າງໆ ເພື່ອຄວາມເປັນເອກະພາບໃນສະເພາະໜ້າ ແລະ ຍາວນານ, ພາກສ່ວນທີ່ກ່ຽວຂ້ອງແຕ່ລະຂັ້ນ ໄດ້ຍົກສູງຄວາມຮັບຜິດຊອບຂອງຕົນ ຕໍ່ການຈັດຕັ້ງປະຕິບັດລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ເວົ້າລວມ, ເວົ້າສະເພາະແມ່ນການຈັດຕັ້ງປະຕິບັດຂໍ້ຕົກລົງຮ່ວມຂອງແຕ່ລະພາກສ່ວນ ດ້ວຍຄວາມຮັບຜິດຊອບສູງ, ກຳແໜ້ນສິດ ແລະ ໜ້າທີ່ຂອງສະພາແຫ່ງຊາດ ເປັນຕົ້ນແມ່ນສິດ ແລະ ໜ້າທີ່ດ້ານນິຕິບັນຍັດ, ສິດ ແລະ ໜ້າທີ່ດ້ານການຕົກລົງບັນຫາສຳຄັນພື້ນຖານຂອງປະເທດຊາດ ແລະ ສິດ ແລະ ໜ້າທີ່ດ້ານການຕິດຕາມກວດກາ. ກອງປະຊຸມສະຫຼຸບຖອດຖອນບົດຮຽນໃນຄັ້ງນີ້ ກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ, ຄະນະປະສານງານກະຊວງປ້ອງກັນປະເທດ-ປ້ອງກັນຄວາມສະຫງົບ ແລະ ສະຫະພັນນັກຮົບເກົ່າແຫ່ງຊາດ ຍັງໄດ້ປະກອບຄໍາຄິດຄໍາເຫັນໃສ່ຮ່າງເນື້ອໃນແນໃສ່ໃຫ້ມີຄວາມເປັນເອກະພາບ ແລະ ການສ້າງຄວາມເຂົ້າໃຈເຊິ່ງກັນ ແລະ ກັນ ຂອງແຕ່ລະພາກສ່ວນໃນການຈັດຕັ້ງປະຕິບັດລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ໃຫ້ໄປທິດທາງດຽວກັນ.

ໂອກາດດັ່ງກ່າວ, ສະຫາຍ ພົນໂທ ສຸວອນ ເລືອງບຸນມີ ກໍໄດ້ມີຄໍາເຫັນໂອ້ລົມຫຼາຍບັນຫາທີ່ສຳຄັນ ພ້ອມທັງເນັ້ນໃຫ້ແຕ່ລະພາກສ່ວນປະຕິບັດຕາມຫຼັກການປະສານງານຢ່າງເຂັ້ມງວດ ເປັນຕົ້ນແມ່ນການປະຕິບັດຕາມລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ແລະ ຂໍ້ຕົກລົງຮ່ວມຂອງຕົນຢ່າງເຂັ້ມງວດ, ເຄົາລົບ ແລະ ປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງແຕ່ລະພາກສ່ວນໃຫ້ຖືກຕ້ອງ, ສອດຄ່ອງກັບລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ, ປະຕິບັດຫຼັກການລວມສູນປະຊາທິປະໄຕ, ຕັດສິນເປັນໝູ່ຄະນະດ້ວຍຄວາມຮັບຜິດຊອບສູງ ແລະ ສໍາຄັນແມ່ນຮັກສາຄວາມລັບຂອງວຽກງານຕົນຢ່າງເດັດຂາດ, ເຂັ້ມງວດ, ແຕ່ລະພາກສ່ວນ ຕ້ອງຄົ້ນຄວ້າກໍາແໜ້ນຢ່າງເລິກເຊິ່ງ ບັນດາເນື້ອໃນຂອງແຜນການປະສານງານ ທີ່ໄດ້ຜ່ານກອງປະຊຸມໄປແລ້ວນັ້ນ ເພື່ອຫັນເປັນແຜນການປະຈຳປີ, ປະຈຳເດືອນ ຢ່າງລະອຽດ ຂອງແຕ່ລະພາກສ່ວນ ແລະ ມີມາດຕະການຈັດຕັ້ງປະຕິບັດຢ່າງເໝາະສົມ ເຮັດໃຫ້ທຸກເນື້ອໃນຂອງແຜນການຖືກຈັດຕັ້ງປະຕິບັດຢ່າງມີຄຸນນະພາບ ແລະ ມີປະສິດທິຜົນສູງ. ເອົາໃຈໃສ່ໃນການສ້າງຄວາມເຂັ້ມແຂງໃຫ້ແກ່ການປະສານງານ ໂດຍສະເພາະແມ່ນການຈັດເຝິກອົບຮົມສ້າງຂີດຄວາມສາມາດໃນການປະຕິບັດໜ້າທີ່ວຽກງານໃຫ້ແກ່ກົງຈັກການຈັດຕັ້ງທີ່ເປັນເສນາທິການຊ່ວຍວຽກຂອງແຕ່ລະພາກສ່ວນ ໃຫ້ມີລະດັບຄວາມຮູ້ ແລະ ຄວາມຊໍານິຊໍານານໃນການປະຕິບັດໜ້າທີ່ວຽກງານ ໂດຍສະເພາະແມ່ນການຍົກລະດັບຄວາມຮັບຮູ້ດ້ານກົດໝາຍ, ລະດັບການຂີດຂຽນ, ລະດັບການຄົ້ນຄວ້າ, ວິເຄາະ, ວິໄຈ ແລະ ສະໜອງຂໍ້ມູນຂ່າວສານໃຫ້ຖືກຕ້ອງ, ຈະແຈ້ງ, ວ່ອງໄວ ແລະ ທັນກັບສະພາບການຫຼາຍຂຶ້ນ.